Festas de S. Ramón e Sta. María

Redacción. -

O Concello de Vilalba anuncia o programa completo das Festas de San Ramón e Santa María, que se celebrarán desde o 19 agosto ata o 4 de setembro. O goberno local xa anunciou algúns eventos, como os concertos de Manu Chao e as Tanxugueiras, aos que se suman agora outros reclamos como as orquestras Combo Dominicano e Olympus, o concerto de Treixadura e algunhas actuacións de música de grupos do municipio.

O programa inclúe actividades para todas as idades e gustos, con variedade nas propostas musicais, así como no tipo de eventos, incluíndo obradoiros, presentacións de libros ou espectáculos de maxia para público familiar. Recuperanse ademais tanto a Xira dos Maiores, que será nesta ocasión unha homenaxe ás persoas maiores cun xantar gratuíto para persoas empadronadas de máis de 65 anos, como a Xira Campestre, ambas limitadas pola pandemia nos últimos anos.

Venres 19 e sábado 20 de agosto
Na primeira fin semana realizarase a final do I Concurso de Música Local, con nove propostas dos grupos Corredores de Sombra, Dúo Estrellas, Tapioca Pudding, Banda de Gaitas Mato Vizoso, Roberto G., Oxygeno, Irmandades do Falo, CRZY e Lambe Lambe. Actuarán o venres 19 de agosto ás 20:30 horas na Praza da Constitución, lugar onde se decidirá o primeiro e segundo premio, con 1.000 e 500 euros respectivamente.

O sábado 20 de agosto ás 12 horas inaugurarase unha escultura creada por José Gómez de Bernardo en memoria de “Concha da Reina”, primeira comadroa titulada da bisbarra, no parque enfronte á Escola Infantil, tal e como acordou a corporación municipal en sesión plenaria.

Ese mesmo sábado celebrarase a primeira Festa interxeracional Irmandade no Campo da Feira, coas actuacións a partir das 13 horas de Los Rastreadores (Ortiga + Grande Amore) e Mekanika Rolling Band. A continuación haberá un xantar e pola noite será a quenda do Dj Litainer e Dj Maler. Esta iniciativa nace da vontade de ofrecer un espazo de encontro entre os veciños e veciñas de Vilalba, unha xuntanza na que todas as persoas se podan reecontrar con antigas amizades, veciños, coñecidos e compañeiros de distintas etapas vitais na localidade. Servirase un menú de polbo, churrasco, postre e café por 29 euros, debendo retirar os tickets previamente para acceder ao recinto no Café Bar Pafe, Café Bar Estudiante, Café Bar O ´Porrás ou Café Bar Centro.

Entre o 22 e o 28 de agosto
A seguinte semana contará co espectáculo de maxia de Patri Zenner dentro do Festival Mundial de Ilusionismo de Galicia o luns 22 de agosto. Na xornada do martes celebrarase a andaina San Ramón e Santa María.

O mércores 24 de agosto organizarase a Xira en homenaxe aos nosos maiores, tras dous anos de parón pola pandemia, que inclúe misa, sesión vermú, a actuación da Charanga de Vilalba, xantar e baile coa Orquestra Supremos.

Tamén haberá oco para a literatura, coa presentación o venres 26 ás 19:30 do libro “Lois Peña Novo. 55 anos despois”, editado polo Colectivo Egeria.

A segunda fin de semana de celebracións comezará o venres 26 coa prexira, na que estarán catro DJ pinchando desde as 22:30h, David García, Cris Vázquez, Alejandro Varela (Doctor Chaff) e Diego Amido (Oxygeno). O sábado 27 e o domingo 28 serán as dúas xornadas da tradicional Xira Campestre, unha cita que se retoma tras a pandemia e que transcorrerá con normalidade, debendo respectar a contorna tanto nos espazos públicos como privados. O sábado haberá sesión vermú e verbena, e pola tarde amenizarán a xira os Festicultores. O domingo, despois da vermú comezará unha sesión musical a cargo de Puzzle animación.

A partir do 29 de agosto
As festas continuarán o 29 de agosto coa XXVII Festa da Bicicleta do Espazo Xove – Casa da Xuventude de Vilalba, con saída ás 19:30h da Praza da Constitución. Poderanse inscribir neste lugar sito na rúa Novo Cazón S/N, dende o día 22 ata o 29 de agosto inclusive.

O martes 30 de agosto, véspera do patrón, realizarase o pregón a cargo de Benita Martínez, matroa do centro de saúde, xusto antes da celebración do XLVIII Certame Literario, ás 19 horas no Auditorio Municipal. Esa mesma xornada, Tanxugueiras actuará en Vilalba, cunha sesión posterior dos Dj Friso & Marcos Peón.

O mércores 31 de agosto, Día de San Ramón, os grupos Buxos Verdes e Banda de Gaitas Mato Vizoso farán o pasarrúas e a procesión que sucederá á misa das 12h, coa actuación da Coral Luar. Antes da sesión vermú, amenizada pola orquestra Pontevedra, haberá un espectáculo de circo itinerante musical. Pola tarde realizarase o concerto da Banda de música de Vilalba, e a verbena correrá a cargo do Combo Dominicano e Solara no Campo da Feira, cunha sesión de fogos artificiais a media noite.

O xoves 1 de setembro de Santa María, A.C Andrade e Entre Lusco e Fusco porán música ao pasarrúas e á procesión, e será a Coral Polifónica de Vilalba quen actúe na misa das 12h. Ritmo Joven fará a sesión vermú e xunto con la Fórmula a verbena desa noite. Ás 22h CRZY realizará un concerto de música urbana.

Na fin de semana, o venres 2 de setembro será o Día infantil, con inchables, tobogáns e festa da espuma. Organizarase tamén ese día a XXVIII Simultánea de Xadrez. Para o público familiar, tamén haberá espectáculos de maxia o sábado 3 co Mago Antón, obradoiros de pompas e títeres o domingo 4.

Na noite do venres 2 de setembro será o concerto de Manu Chao, cuxas entradas gratuítas poden retirarse na Casa da Cultura o xoves 4 de agosto de 15:00 a 21:30 horas, e o venres 5 de agosto de 09:00 a 21:00 horas. Cada persoa poderá retirar un máximo de tres entradas, debendo acudir presencialmente co seu DNI.

O sábado 3 de setembro Cerna de Árbol e Mestura de Nete farán o pasarrúas antes da vermú co Dúo Estrellas. A xornada complétase co XVI Festival de Bandas Pepe Guntín e cunha verbena pola noite a cargo de Olympus e Dúo Estrellas.

O domingo 4 de setembro é o día das parroquias, dedicado este ano a San Cosme de Nete despois de dous anos adiado. Nesa xornada haberá tamén pasarrúas con Asubíos da Chaira e a Charanga de Vilalba, misa coa Coral Polifónica e ofrenda da parroquia, que ademais fará o acompañamento de autoridades desde o concello ata a igrexa cos seus propios músicos. A orquestra Fuego estará na vermú e Treixadura porá o colofón final das festas patronais a noite do 4 de setembro.

Korczak terá o seu espazo en Compostela

Moncho Paz

Hoxe cúmprense 80 anos do pasamento de Janusz Korczak, médico pediatra nado en 1878 no seo dunha familia xudea polaca. Dende 1912 dedicouse a coidar meniños orfos, sen familia ou desamparados. En 1940 foi obrigado polos nazis a trasladarse co persoal do orfanato e douscentos raparigos ao gueto de Varsovia. A resistencia xudea quixo axudalo clandestinamente para salvalo dunha morte segura. El só puxo unha condición: sacar primeiro aos rapaces. Mais non foi posible.

0 6 de agosto de 1942 os nazis deixaron baleiro o hospicio e levaron aos nenos ao campo de exterminio de Treblinka. Korczak acompañounos naquela derradeira viaxe e estivo con eles ata o final. O Concello de Santiago aprobou hai uns días o nomeamento dun espazo público na súa memoria, convertendo a Compostela na primeira cidade en recoñecer a súa figura en España, que pasará así a formar parte do conxunto de países que homenaxearon a este home senlleiro. Parabéns pola iniciativa.

 

Un nome para o Museo do Humor de Fene

Redacción. -

A Corporación Municipal de Fene aprobou por unanimidade o cambio de denominación do Museo Do Humor Fene, que pasa a chamarse dende hoxe "Museo do Humor Xaquín Marín". A proposta, presentada polo goberno municipal, saiu adiante co respaldo de todos os grupos da oposición. #fene #concellodefene

Poucas persoas hai en Fene, de nacemento ou adopción, que conciten tanto afecto xeral como Xaquín Marín Formoso. E motivos sobran. Creador polifacético, dinamizador cultural, reivindicador e un dos máximos expoñentes do humorismo retranqueiro galego posto ao servizo da crítica social. Son moitos os méritos que, sen el pretendelo, se xuntan nun home xa de por si afable e sempre conciliador. Un bo e xeneroso, vaia, que hai case 40 anos teimou en crear o primeiro museo do mundo dedicado ao humor. Fene recoñeceulle durante maio e xuño todo o seu labor a prol do municipio e da Cultura por medio do programa "Volta á orixe", que contou con centos de asistentes á exposición monográfica e ás actividades paralelas. Agora, como culminación deste merecido tributo, o pleno municipal aprobou na mañá deste xoves o cambio de denominación do Museo do Humor para que pase chamarse "Museo do Humor de Fene: Xaquín Marín".

Tal e como se recolle na proposta de acordo da alcaldía, precisamente a raíz da exposición antolóxica sobre o creador "foron moitas as persoas que nos transmitiron a proposta de cambiar o nome do museo". Un sentimento refrendado por Siro López -outro dos grandes do humor gráfico galego, ademais de amigo e compañeiro de andanzas creativas de Marín- que mesmo reivindicou a mudanda da denominación nun artigo publicado en La Voz de Galicia.

O texto que se someteu á valoración plenaria abonda na figura e na obra dun "artista plástico total e polifacético" coñecido e recoñecido por levar case 35 anos publicando unha viñeta diaria nese mesmo xornal e por ser o principal promotor do museo do humor fenés, inaugurado en 1984 e que el dirixiría durante os seus primeiros 25 anos de vida reunindo a que posiblemente sexa a maior colección de humor gráfico do mundo.

Desde a dirección do Museo, Xaquín Marín levou a cabo, ademais, "un inxente labor de difusión do humor galego en todas as súas vertentes ben sexa a través de exposicións permanentes ou itinerantes (Os humoristas e a reconversión, Humor gráfico actual en Galicia, Cómic galego, Humor cru...), de mostras en colaboración con outras institucións, museos ou particulares (Casa do Humor e da Sátira de Gabrovo en Bulgaria, Museo Internacional de Humor de San Antonio de Baños en Cuba, herdeiros de Mort Walker...), da creación das Xornadas de Humor, os premios Curuxa e a revista Sapoconcho ou do apoio ao nacemento da Asociación de Amigos do Museo do Humor".

Porén, a súa figura vai máis aló e, segundo a proposta, o autor acumula "unha vasta traxectoria que abarca outras disciplinas visuais como a banda deseñada, a pintura, o deseño gráfico, o cartelismo, o muralismo ou a ilustración", ademais de ser o humorista gráfico galego "con maior relevancia, recoñecemento e constancia das últimas cinco décadas".

A iniciativa do Goberno municipal cualifica a Marín como "creador dun estilo cunha linguaxe, recursos expresivos e símbolos propios, totalmente innovador ao tempo que inequivocamente enraixado na tradición plástica galega, dunha coherencia estética e ideolóxica incontestables, tan persoal como universal e, por riba de todo, galego".

Estes e outros argumentos sosteñen a petición que se lle presentou ao pleno do pasado xoves ás 10:00h, no sentido de que o Museo do Humor de Fene pase denominarse "Museo do Humor de Fene: Xaquín Marín". A iniciativa superou a comisión informativa cos votos favorables do Grupo de Goberno e a abstención do resto de formacións. 

Premios Rebulir da Cultura Galega

Redacción. -

O Xurado dos IX Premios Rebulir da Cultura Galega 2022 decidiu que as premiadas e premiados nesta edición fosen:

1. CATEGORIA MÚSICA GALEGA:  Ao grupo FUXAN OS VENTOS no seu 50 aniversario pola súa dilatada traxectoria no eido da música tradicional e popular galega, poñendo en valor a poesía e cultura endóxena.  

2.CATEGORÍA ARTES ESCÉNICAS:  A CELSO FERNÁNDEZ SANMARTÍN por preservar e difundir a tradición oral galega desde o respeto, e levar os contos do noso rural a diferentes escenarios poñendo en valor a creatividade propia. 

3. CATEGORIA HOMENAXE: a XOSE LUIS MENDEZ FERRÍN por ser un dos máximos expoñentes da literatura galega contemporánea e difusor da cultura propia a través da súa obra chegando a diferentes públicos. 

Parabéns a todos/as os/as candidatos/as e noraboa aos premiados/as.

'SonDaRúa' no templete da música

Redacción. -

O Instituto de Estudos Chairegos (IESCHA), en colaboración co Concello de Vilalba, organiza para o venres 12 de agosto de 2022, ás 22:30 h., no templete da música da praza da Constitución, o concerto de verán a cargo do grupo musical SONDARÚA, de Ponteareas. A entrada será de balde.

SonDaRúa

SonDaRúa, unha das bandas con maior proxección do panorama galego dos últimos anos, volve á carga con Eterno Combate (PlayPlan 2020), o seu primeiro disco de longa duración tras o lanzamento do EP Liberando mentes (2018).

O grupo, formado por Hugo Guezeta e Álex Arnoso ás voces e That Bass como DJ, plasma neste novo traballo o seu estilo, que sempre bebe da ironía, da musicalidade e a tradición oral popular galega, pero combinándoo co hip hop máis reivindicativo, de crítica social e política.

“Eterno combate”, o disco

Trátase dun LP de 12 cortes no que poderemos gozar das colaboracións de Skandalo GZ, Navia Rivas e Ezetaerre. Ademais, e mantendo a liña habitual de SonDaRúa, Eterno Combate é un disco do máis ecléctico no que teñen cabida unha morea de estilos musicais; dende o rap clásico ao máis puro estilo 90’s, pasando polo ska, o rock e chegando aos sons máis característicos do reggae.

No referente á parte instrumental de Eterno Combate, o maior peso da produción recaeu en Álex Arnoso, membro do grupo. Sen embargo, Eterno Combate conta coa participación de distintos artistas do nivel de Peter Petrowski (Ezetaerre), un habitual nos traballos de SonDaRúa, That Bass, actual DJ da banda, quen tamén aportou o seu gran de area musical neste LP, ou Javier Vicalo, produtor da canción que dá nome ao disco nos estudos The Dub Yard. Destaca tamén o gran traballo realizado por Félix Cebreiro en Quela Records, tanto na mestura e masterización dos temas como nos arranxos musicais do disco.

Aínda que a banda non perde en ningún momento a súa esencia subversiva e reivindicativa, en Eterno Combate poderemos atopar temáticas moi diversas entre as distintas cancións que conforman o disco, así como rítmicas e instrumentais cheas de calidade e frescura.

O disco edítase baixo a discográfica de PlayPlan.

Vídeo da presentación do Proxecto Xorima

Redacción. -

'Proxecto Xorima' acaba de publicar o vídeo da presentación do libro Conversas arredor de Xorima, de Paulo Naseiro, que tivo lugar o pasado 19 de marzo no Auditorio de Vilalba, e que incluiu a actuación do mítico grupo, reunido por primeira vez desde 1989. 

A produción audiovisual do evento, dirixida por Sofía Naseiro e coa produción da propia Sofía e de Laura Rodríguez, dirección de fotografía de Laura León, contou ademáis coa colaboración dos cámaras Pablo Baamonde, Irene Chao e Diego Freijomil. O son estivo a cargo de Ramón Campos, quen tamén fixo as mesturas xunto con Xosé Ramón Vázquez.

A actuación de Xorima, que lembrou pezas como "Feira de Santos", "O gaiteiro avergoñado", "Muiñeira/Jig of Slurs", "Compañeiros" ou "A Cova da Serpe", rematou cunha versión moi especial do Pasacorredoiras de Vilalba, executado conxuntamente co grupo tradicional Buxos Verdes.

'Proxecto Xorima' está a levar adiante un traballo de recuperación e reivindicación da banda que, desde Vilalba, contribuiu ao espertar da música de raíz galega nos anos oitenta. Un libro coa historia do grupo, a páxina web proxectoxorima.com ou o vídeo que se ven de presentar son algunhas das actividades máis destacadas, que culminarán o vindeiro mes de setembro coa preestrea dun documental realizado por Sofía Naseiro.

Pódese ver o vídeo na seguinte ligazón:

https://youtu.be/cYccY_ct8NU

Fredy

Miguel Barrera.-

Olla!

Óllame Fredy, 

non deixes de ollarme, 

non deixes de ollarme, 

son os teus ollos os que me dan a paz, 

os que ma deron sempre 

co teu esculcar sensible, sereno, confiado.

Óllame Fredy, 

axúdame a combater toda resistencia 

co teu sorriso, 

a conquistar (vencer) coa túa faciana vermella 

o estigma da desolación.

Óllame Fredy, 

aluma os atardeceres 

mentres te lembro tocando a batería 

no teu faiado de ensoño. 

Talvez, unha vez máis, 

xunto ao baixo de Mon e a guitarra de Currás

acompañarte 

mentres Txus rompía nas gorxas.

Golpea, golpea, golpea unha vez máis coas baquetas, e fende nos meus recordos as caralladas do teu imaxinario, as reflexións certeiras cando a inxustiza nos podía.

E gritabamos, e blasfemabamos e

queimabámosvos bandeiras 

e, por suposto bebíamos cervexas, 

cervexas, cervexas, cervexas.

Óllame Fredy,

axúdame a contar as batallas entre tacos e bolas de billar, entre cervexas, cervexas, cervexas. Axúdame a preparar o revolver, a marcar a bala da mala conciencia mergullada no Fabilos.

Óllame Fredy, 

deféndeme daquel que cortou a soga, 

do primeiro aforcado 

que xurde cada mañá 

entre os covardes,

que negan o seu pacto 

con 

Dorian Gray.

José Ramón Guizán Durán, Fredy (1964-2022)

Pregón da II Festa da Poesía Guitirica

Marica Campo.-

Guitiriz, 2 de xullo de 2022. Casa Habanera. 11,30

En canto o mundo progresa na súa auto destrución, mentres as nais dos soldados dun e doutro bando soñan con regresar aos  tempos en que aínda non amaran nin tiveran fillos, en Guitiriz, convocada polo grupo que se formou arredor da Lareira de Soños e co apoio do Concello, celébrase a Festa da Poesía. Nada máis revolucionario e positivo. Manuel María propugnaba que os homes e mulleres da política estivesen obrigados a ler poesía e, sen dúbida non lle faltaba razón.

Parabéns, xa que logo, por esta iniciativa que, traballando pola palabra, e ben seguro que promove a paz.

 Din que calquera cousa pode ser poesía, mais que a poesía non pode ser calquera cousa.

Asegúrase que é posíbel facer poesía de todo, mais que non todo é poesía.

A poesía é inútil, expresa Luís García Montero: só serve, segundo el, para lle cortar a cabeza a un rei ou para seducir unha rapaza. Aínda así, segue a ocupar o centro da súa escrita porque, en realidade, celebra e reivindica ironicamente que non sexa algo mercantil nin instrumento de apoio para causas espurias. El ve na poeta, no poeta, alguén que quere ser dono das súas opinións. Iso non impide que o oficio requira artesanía, relato humano, saber dunha herdanza que nos vén dos devanceiros, dos antepasados.

O desprezo a esa tradición, sobre todo por descoñecela, nada ten de positivo.

A innovación é importante, mais non o é menos ser elos dunha cadea que non rompe porque cada un deles engancha no anterior e dá paso ao seguinte.

A cadea fúndese (de fundición, non de afondamento) con palabras. As palabras deben ser escollidas polo seu peso, pola súa densidade. O que lles dá densidade son os significados que se lles apegan polo uso e as experiencias de todo tipo, é dicir, da vida e a arte. Isto é o que se chama connotación. Fóra dela, na pura denotación, a poesía non sucede, non é.

 

Hai centos, miles, de definicións deste xénero tan vello coma o mundo. Porén, calquera definición limita, pon fronteiras ao feito poético e, sobre todo, non revela o seu verdadeiro ser.

É por acumulación de experiencias, de encontros nese espazo tan máxico como humano, onde nos podemos facer unha idea do seu ser pesado e leve, gozoso e ferinte, diáfano e escuro, carnal e espiritual.

Mais, que é poesía? Cadran moi ben para unha declaración de amor as palabras de Bécquer: “Poesía eres tú”. Porén, a resposta non abonda para entender o misterio.

Aínda así, hai que entendela? J.R. Jiménez aseguraba que non, que o mesmo que non comprendemos o que cantan a auga ou os paxaros, tampouco temos que saber o que di o poeta para que gustemos da poesía.

 

Como xa se dixo, definicións non faltan, malia termos estudado no vello bacharelato que a poesía non se pode definir, que, simplemente, chamamos poético a algo que nos impresiona e nos causa emoción pola súa beleza.

 Antonio Machado deixou escrito:

            “Ni mármol duro y eterno,

            ni música y pintura,

            sino palabra en el tiempo.

 

            II

            Canto y cuento es la poesía.

            Se canta una viva historia,

            contando su melodía”.

 

Benedetti considerouna  “A verdadeira alma do mundo”.

Para Octavio Paz: “A poesía é a memoria dos pobos, e a parte secreta da alma de cadaquén”.

Lorca viu nela “O misterio que teñen todas as cousas”.

Fernando Pessoa considerábaa un finximento, unha impostura coa que o poeta expresa a súa verdade:

 

 O poeta é um fingidor.
Finge tão completamente
que chega a fingir que é dor
a dor que deveras sente.

 

 

O poema, segundo Manuel María,

 

 é un ser vivo que anda,

respira, soña, chora, salouca,

ama, berra, cintila e escurece,

cala, aborrece a mentira,

sente odio e ternura, desángase,

fala de intimidade a intimidade

coas cousas e coa xente, suxere

mundos posibeis e imposibeis,

suda, cansa, sente sede e fame,

adoece, agoniza.

                        E nunca morre.

              De A Luz Ressuscitada, 1984

 

Díaz Castro, o noso grande escritor dos Vilares de Guitiriz, de Galiza e da pléiade mundial dos letraferidos, explica que  o poema é só un nimbo de luz que os ollos cegos lles  poñen ás cousas soñadas ou amadas nas tebras. Ben se sabe que non se refire ás nubes dese nome, senón ao circo luminoso que rodea a cabeza dos santos ou certos corpos celestes en determinadas circunstancias.

Coincide co poeta norteamericano Robert Penn Warren, que o expresa así:

“No fondo, un poema non é algo que se ve,  

senón a luz que nos permite ver.

E, o que vemos, é a vida”

 

Esta que lles fala, engade: A vida viva, a vida que se sente a si mesma. E que podería completalo con palabras de Dylan Thomas:

 

 “A poesía é o que nun poema che fai rir, chorar, falar, calar, conseguir que as túas uñas dos pés brillen, que che fai querer  isto ou  aquilo ou nada, que che fai saber que estás só nun mundo descoñecido, que a túa benaventuranza e sufrimento se comparten para sempre e sempre serán teus.”

 

 

 

Se cadra a poesía non é, senón que sucede. E, se sucede, é un fenómeno. A poesía flúe, acontece. Ningún destes verbos é estático. Son dinámicos, verbos que falan de procesos. Porén, un é o proceso de creación que dá como resultado o poema e outro é o proceso de lectura.

Quen le, recrea o poema porque precisamente esa é unha das súas características, a polisemia, a multiplicidade de significados. E iso é así porque, á marxe dunha serie de connotacións comúns a moita xente, hai outras que pertencen a cada persoa e non teñen que ser as mesmas para quen escribe que para cada unha ou un das diversas e diversos lectores.

Quen escribe non sempre busca un sentido para o poema. Derrida, o filósofo da deconstrución, ese xeito de estudar os textos para ver as contradicións que hai na nosa cultura, afirmou que todo verdadeiro poema corre o risco de carecer de sentido e non sería nada sen ese risco. Mais non compete a un pregón entrar nestes labirintos do posmodernismo, senón convidar á poesía.

              

En todas as persoas hai Outra que non coñecemos. A través da linguaxe podemos procurala, desvendala, dar con ela. Rosalía de Castro, sobre todo en Follas Novas, é paradigma desta procura.

 

Daquelas que cantan as pombas i as frores
todos din que teñen alma de muller,
pois eu que n’as canto, Virxe da Paloma,

¡Ai!, ¿de qué a teréi?

III

Tal coma as nubes
que impele o vento,
i agora asombran, i agora alegran
os espazos inmensos do ceo,

Así as ideas
loucas que eu teño,
as imaxes de múltiples formas,
de estranas feituras, de cores incertos,
agora asombran,
agora acraran,
o fondo sin fondo do meu pensamento.

Quen, que escriba ou se lea a si mesma non percibe por veces esa sensación de estrañeza ao se descubrir outra?

Rimbaud tíñao claro: “Je suis autre” (eu son outro)

É no proceso creador onde coñecemos o material da experiencia, por iso non operamos sobre un coñecemento previo, explicaba o ourensán José Ángel Valente. Nese proceso ordenamos o noso mundo e rescatámolo para a consciencia, para vivirmos e non sermos vividos pola ignorancia de nós, polo engano sobre a nosa identidade.

Porque, como nos comunica o gran romántico inglés John Keats, no máis célebre, quizais, dos seus poemas, “Oda a una urna griega”,  só a verdade é beleza e só a beleza é verdade. Todo iso e nada máis habedes saber na terra.

Xosé María Díaz Castro sabíao ben cando escribiu: “a beleza feriume para sempre”. A beleza era a súa poesía da que a verdade era a  beleza.

 

De calquera maneira, beleza e verdade, verdade e beleza poden pousar en formas e xeitos de facer ben diversos. Digamos que o rostro do poema cambiou como os sucesivos rostros daquela muller a quen cantaba Yeats nos versos de “Cando sexas vella”

CANDO xa sexas vella e canosa, e con sono
toquenees  xunto ao lume, colle este libro
 e le soñando coa mirada doce
que tiveron os teus ollos, e coas súa fondas sombras;

e cantos os teus momentos de alegre gracia amaron,
e a túa beleza, con falso o con sincero amor,
mais só un amou en ti a alma peregrina,
e amou las aflicións do teu cambiante rostro;

e inclinándote logo xunto a acesas brasas,
murmura, algo doída, como marchou o Amor
ao paso por riba das altas montañas
e o seu rostro ocultou un sen fin de estrelas.

 

Secasí, a poesía, se ten verdade e beleza, non envellece para quen de verdade a ame.

 

Bécquer asegurou nun seu poema:

 

Mientras las ondas de la luz al beso
palpiten encendidas,
mientras el sol las desgarradas nubes
de fuego y oro vista,
mientras el aire en su regazo lleve
perfumes y armonías,
mientras haya en el mundo primavera,
¡habrá poesía!

Mientras la ciencia a descubrir no alcance
las fuentes de la vida,
y en el mar o en el cielo haya un abismo
que al cálculo resista,
mientras la humanidad siempre avanzando
no sepa a dó camina,
mientras haya un misterio para el hombre,
¡habrá poesía!

 

Coido que se equivocou e que lle hai que dar a volta ao poema. Porque, mentres haxa poesía, haberá primavera e misterio.

Silvio Rodríguez, o cantautor cubano, enténdeo ben cando canta que son culpábeis os versos de que haxa noite e estrelas.

Mentres Rosalía de Castro e  tantos e tantas autores nosos, entre eles os da Poesía Guitirica sigan alimentándoa coa súa palabra, non só na poesía, senón en todos os ámbitos da vida, existirá Galiza e existiremos nós.

Moitas grazas por estardes na casa común da nosa lingua. Viva a poesía!

Uxía no Convivio da Cultura Galega

Redacción. -

O Convívio da Cultura Galega, xornada lúdica e festiva organizada pola Casa-Museo Manuel María en colaboración coa Federación Galiza Cultura chega á súa IX edición. Será este próximo sábado, 9 de xullo, e o seu marco excepcional será de novo a carballeira de Santa Isabel de Outeiro de Rei, tras verse alterado nestes dous anos pola Covid-19. Faino da man dunhas das nosas cantoras máis salientábeis, Uxía.

Uxía e o instrumentista e compositor brasileiro Sérgio Tannus, que leva residindo na Galiza nestes últimos anos, actuarán ás 12.30 h na carballeira coa Banda de Música SONS E SOÑOS de Rábade, Begonte, Outeiro e Friol nun concerto especial preparado para a ocasión e dirixido por Armando Morales.

A Casa-Museo Manuel María anima e convida a todas as persoas a achegarse a Outeiro de Rei para presenciar este concerto tan especial á beira do Miño e partillar unha celebración festiva ao redor da figura de Manuel María. Esta xornada terá a súa continuidade nun xantar popular no que cada quen terá que levar a súa comida, mais que a organización dispón de mesas sempre que se reserve no whatsapp 698177621 ou por e-mail en contacto@casamuseomanuelmaria.gal.

Xa pola tarde será o momento dunha animada foliada conducida por Xurxo Souto e protanonizada por seis grupos de música diversa. Os primeiros en actuar serán Foliadeir@s do Castro de Begonte que estarán acompañados por Branca Villares, mestra de canto tradicional e pandeira, pandeiro e pandeireta e divulgadora do patrimonio musical galego. Airinhos do Fiouco, Parabéns, Birloque Gaiteiros e Tradivivas Agra serán os seguintes grupos en subir ao cenario, cerrando a foliada Xurxo Souto e o saxofonista, e director do Pardiñazo, Richi Casás.

Ás 11.30, no cemiterio parroquial de Outeiro de Rei, e antes do concerto de Uxía, Sérgio Tannus e a Banda de Música Sons e Soños, levarase a cabo unha ofrenda na campa de Manuel María, na que intervirá o presidente da Federación Galiza Cultura, Xosé Manuel Carril Vázquez. As entidades que conforman esta Federación manterán durante toda a mañá do sábado, no auditorio da Casa-Museo Manuel María, un encontro para programar novas iniciativas e levar a cabo accións en común para o ano próximo.

Máis información:

Alberte Ansede, secretario da Fundación Manuel María (616190349)

Xosé Manuel Carril, presidente da Federación Galiza Cultura (635457362)

IX Convivio da Cultura Galega

Redacción. -

A Casa-Museo Manuel María, en colaboración coa Federación Galiza Cultura, vén de presentar a IX edición do Convivio da Cultura Galega que se celebrará na carballeira de Santa Isabel en Outeiro de Rei o próximo 9 de xullo, retomando esta xornada lúdica e festiva que se veu alterada nestes dous últimos anos, tanto na data como no seu deseño, pola Covid-19.

A Casa-Museo Manuel María e a Federación Galiza Cultura convidan todas as galegas e galegos e entidades culturais a participaren nesta romaría-foliada ao redor da figura de Manuel María, para celebrar a cultura de Galiza e o traballo de base que levan a cabo as distintas asociacións culturais.

O encontro dará comezo ás 11.30 coa acollida diante da Casa-Museo Manuel María de todas as persoas asistentes, para saíren cara ao cemiterio parroquial de Outeiro, onde se fará unha ofrenda ao poeta chairego. De alí baixarase cara a paraxe natural de Santa Isabel onde se desenvolverá o resto do día que comezará cun concerto único, ás 12.30 hrs, preparado para a ocasión, da Banda de Música SONS E SOÑOS de Rábade, Begonte, Outeiro e Friol e UXÍA, a grande cantora galega. Pola tarde, e tras o xantar, levarase a cabo, desde as 16.45 hrs, unha foliada animada por Xurxo Souto e na que participarán grupos de música tradicional como PARABÉNS, TRADIVIVAS AGRA, BIRLOQUE GAITEIROS, AIRINHOS DO FIOUCO E FOLIADEIR@S DO CASTRO, alén do propio Xurxo, que xunto con Richi Casás, interpretará algunhas das súas pezas.

Durante a mañá do propio sábado, na Casa-Museo Manuel María, as xuntas directivas das entidades culturais que conforman a Federación Galiza Cultura, entidade que promove o Convivio xunto á Casa-Museo Manuel María, manterán un encontro para articular a súa actuación en común nos próximos meses.

O programa para este día será o seguinte:

11.30 Acollida de participantes diante da Casa-Museo Manuel María ao son da música de Birloque Gaiteiros.

11.45 Saída a pé para a carballeira de Santa Isabel con parada no cemiterio de Outeiro para realizarmos unha ofrenda a Manuel María.

12.30 Actuación, en Santa Isabel, da Banda de Música SONS E SOÑOS de Rábade, Begonte, Outeiro e Friol, dirixida por Armando Morales, e acompañada pola voz de UXÍA.

13.45 Xantar de convivio (cada quen ten que traer a súa comida e bebida)

16.45 Foliada na carballeira coa actuación de PARABÉNS, XURXO SOUTO e RICHI CASÁS, TRADIVIVAS AGRA, BIRLOQUE GAITEIROS, AIRINHOS DO FIOUCO E FOLIADEIR@S DO CASTRO. Guía a festa: Xurxo Souto

Welcome to ma maison

Redacción. -

O Instituto de Estudos Chairegos (IESCHA), en colaboración coa Academia Galega do Audiovisual, coa Área de Cultura-Vicepresidencia da Deputación de Lugo e co Concello de Vilalba, organiza a proxección da película documental WELCOME TO MA MAISON, de Andrés Goteira e Igor Fernández, continuando co CICLO MESTRE MATEO que durante o ano 2022 bríndanos a oportunidade de disfrutar das películas finalistas (documentais e longametraxes) dos XX PREMIOS MESTRE MATEO.  Esta proxección terá lugar no Auditorio Municipal de Vilalba o sábado 25 de xuño de 2022, ás 20:00 horas. SINOPSE: Igor NON quere atracar unha xoiería. Igor NON está obsesionado cas mans. Igor NON é fan do director Nicolas Winding Refn. Igor NON viste xerseis de nadal. Igor NON é Igor (e isto NON é un falso documental). Welcome to ma maison é unha longametraxe que inicia unha viaxe a Los Ángeles para coñecer ao director Nicolas Winding Refn e, ó non atopar o seu rumbo, camiña cara o interior do seu protagonista percorrendo a difusa liña entre o actor, a persoa e o personaxe. Un documental experimental construído con imaxes reais, sentimentos sinceros e problemas verdadeiros. Un falso documental, rodado a modo de making of, onde todo o que se mostra é 100% real.  FICHA TÉCNICA:  Produtora: Gaitafilmes en colaboración con Mordisco Films Guión: Andrés Goteira, Igor Fernández  Montaxe: Andrés Goteira, Igor Fernández Cor e formato: Alberto Díaz Director de produción: Suso López Música final: Bioskope Música de fondo: Andrés Goteira  Operadores de cámara: Nacho Ozores, Lucía C.Pan, Andrés Goteira, Igor Fernández, Félix Brixel. Axudante de produción: Laura Doval Auxiliar de produción: Andrés García  Axudante de montaxe: Nacho Ozores Auxiliares de montaxe: Paula Quiroga, Felix Brixel Montaxe de son: Óscar Nieto Misturas de son: Javier Pato Estudo de son: La Panificadora Estudios  Márketing e comunicación: Laura Doval, René Ogando  Deseño: Tania Villaga Subtitulado: Pequerrecho Entertainment    A ENTRADA SERÁ DE BALDE, PERO HABERÁ QUE REALIZAR A CORRESPONDENTE RESERVA BEN NA PÁXINA WEB DO CONCELLO  BEN DIRECTAMENTE NA CASA DA CULTURA DE VILALBA.  PROXECCIÓN DE “WELCOME TO MA MAISON”, DE ANDRÉS GOTEIRA E IGOR FERNÁNDEZ – DOCUMENTAL FINALISTA DOS XX PREMIOS MESTRE MATEO-SÁBADO 25-06-2022 - 20:00 H. – AUDITORIO DE VILALBA 

II Festival de Poesía Guitirica

Redacción. -

Na primeira fin de semana de Xullo terá lugar en Guitiriz na Casa Habaneira a segunda edición do Festival de Poesía que organiza a Nova Poesía Guitirica NPG coa colaboración do concello e a Asociación de Hosteleria local.

Actos para os mais novos, pasarrúas poéticos, presentacións das mais recentes novidades poéticas, concertos poéticos musicais, exposición de colaxes de Clara Martín e entregas dos premios Vilarinhas e Diaz Castro de poesia.

Este ano, a encargada de dar o pregón será a poeta Marica Campo, que sucede a Alfonso Blanco, pregoeiro do 1° Festival.

Guitiriz é con este festival unha das escasas localidades galegas que programan festivais de poesia entre as que están localidades como Ferrol, Allariz, Salvaterra, O Couto (Ponteceso), algunhas delas con moitos anos de experiencia.

Ter como grande referencia ao poeta local Xosé María Diaz Castro serviu de motor para a própria existencia e consolidación da NPG e a organización deste Festival poético.

Este é o programa:

II FESTIVAL DE POESIA GUITIRICA

Venres 1 de xullo.

17:00 Espectáculo infantil: Brinca Vai! De aquí a acolá, de Paco Nogueiras

POESÍA VIS A VIS

Presentación de novidades (a duo):

18:30 

Inauguración da exposición de collages de Clara Martín (do 1 ao 29)

Luz Darriba: Xoguetes para menos cegos (Belagua)

Xulio Pardo de Neira: Uterus siue uolua (Fervenza)

19:15

Ainhoa Conde: Devotos do destino (Medulia)

Maria Xosé Lamas: Un corvo en Caldaloba (Medulia)

20:30 Concerto VERSO:

Corredores de sombra

Sábado 2 de xullo.

11:15

Conversa con Clara Blanco

11:30 

Pregón e presentación do Festival

con Marica Campo e Marisol Morandeira

13:00

Pasarrúas poético.

POESIA VIS A VIS

Presentación de novidades (a duo):

17:00

Moncho Bouzas: Argonauta (Medulia)

Luz Airado: Instintos (Medulia)

17:45

Curra Figueroa: Poesia para a mãe Terra (Medulia)

Eladio Rodriguez: Versos para a mulher poeta (Ir indo)

18:30

Lino G. Salgado: Kamikazes (Medulia)

Pura Tejelo: Novembro (Urutau)

19:15

Maria Álvarez Landesa

con Eva Teixeiro e Alba María: 

Como duas crebas (Medulia)

20:30

Concerto VERSO.

Folerpa de Son.

Domingo 3 de Xullo

11:30

Entrega dos premios Diaz Castro de poesia e Vilarinhas de micro poesia coa música de Roger de Flor e Pedro Montilla 

13:30

Pasarrúas poético.

*No mes de xullo as Vilarinhas 2022 estarán expostas nas farolas de Guitiriz.

*Do 1 ao 29 de xullo exposición de collages de Clara Martín

Cristina Pato debuta como novelista

Redacción. -

Cristina Pato debuta como novelista con “No día do seu enterro”, publicada pola Editorial Galaxia na súa Colección Literaria (2022). Unha obra sobre o poder da palabra, sobre a nobreza dos invisibles e sobre as verdades non contadas. Unha conmovedora historia sobre o que significa reconstruír a vida para poder sacar adiante unha familia. “No día do seu enterro” é unha historia persoalísima que pon en valor a grandeza do pequeno, dos actos desinteresados, das accións que ninguén ve pero que son capaces de transformar a sociedade. Escrita e publicada en galego, a novela está dispoñible en todas as librarías de Galicia. Axenda de presentacións e sinaturas de libros OURENSE Sinatura na Libraría Nobel Venres 17 de xuño, ás 19.00 h (Nova localización: Santo Domingo, 66) VIGO. Presentación na Libraría Librouro Luns 27 de xuño, ás 20.00 h Acompañando á autora, estará Francisco Castro, director xeral de Editorial Galaxia. SANTIAGO. Presentación na Libraría Couceiro Martes 28 de xuño, ás 19:30  h Acompañando á autora estará Francisco Castro, director xeral de Editorial Galaxia.

A CORUÑA. Presentación na Libraría Berbiriana Mércores 29 de xuño, ás 19:30 h Libraría Berbiriana (espazo reservado) Acompañando á autora estará Inma López Silva, escritora e crítica teatral. LUGO. Presentación Xoves 30 de xuño, ás 19:30 h O vello Cárcere Colaboración Trama Sobre Cristina Pato (Ourense, 1980) Música, escritora, educadora e produtora, Cristina Pato foi aclamada como “unha virtuosa explosión de enerxía” por The New York Times. Na actualidade, a súa vida profesional está centrada na exploración do rol das artes na sociedade a través da docencia e da produción. Traballou como artista en residencia na Universidade de Nova York (NYU), na Universidade de Harvard e na Universidade de California, Santa Bárbara. Ademais de colaborar durante quince anos co Silkroad Project, a organización fundada polo violonchelista Yo-Yo Ma. Como escritora e columnista, no ano 2015 comezou a súa andaina cunha columna quincenal no xornal El Correo Gallego, e desde o 2017 escribe unha popular columna semanal para a contraportada do periódico La Voz de Galicia titulada "A arte da inquedanza" pola que gañou o XVII Premio Afundación de Periodismo Fernández del Riego. No ano 2022 publica a súa primeira novela “No día do seu enterro”, coa Editorial Galaxia (Colección Literaria, 2022). Cristina divide o seu tempo entre Nova York e Galicia e comparte a súa vida co fotógrafo Xan Padrón. Máis información e materiais www.cristinapato.com 

Presentación dun libro de Francisco Rodríguez

Redacción. -

O Instituto de Estudos Chairegos (IESCHA) organiza o acto de presentación do libro, coeditado pola Fundación Galiza Sempre e pola Asociación SocioPedagóxica Galega (AS-PG), “Unha estapa estelar e conflitiva de Galiza. (a segunda metade do século XIV) – TOMO I A relevancia do Reino Galego Medieval”, do RODRÍGUEZ.  que é autor FRANCISCO O acto terá lugar o xoves, 16 de xuño de 2022, ás 19:30 horas, na Casa da Cultura de Vilalba, e será presentado por Marisa Barreiro, presidenta do IESCHA. UNHA ETAPA ESTELAR E CONFLITIVA DE GALIZA – FRANCISCO RODRÍGUEZ Este libro sobre a etapa medieval de normalidade e esplendor do reino de Galiza e a crise da segunda metade do século XIV responde a un afán por combater a ignorancia colectiva sobre o noso pasado medieval e as deformacións e ocultacións sobre el. É, en certa maneira, un traballo a favor da saúde mental colectiva da sociedade galega. Xurdiu da necesidade de colaborar a un coñecemento sobre a nosa historia, entre os séculos VIII e XIV, radicalmente confrontado coa ocultación e terxiversación do oficial dominante. É, pois, unha visión crítica do estado da cuestión e unha proclama a favor de descubrir o oculto ou manipulado. O autor faino, analizando, debatendo e tirando conclusións, desde a historiografía oficial e académica e desde as fontes documentais existentes. Tamén desde a importante, malia ser considerada con frecuencia, historiografía que se ten esforzado xa desde o século XIX, por combater a manipulación que levou a ignorar a existencia relevante do reino de Galiza e a eliminarnos como realidade política específica na Península, para así mellor construír unha visión histórica ao servizo do castelanismo, primeiro, e do españolismo, despois. Este Tomo I céntrase en evidenciar esa relevancia incuestionábel, para logo (Tomo II) entrar na análise dun momento estelar e conflitivo, segunda metade do século XIV, cuxo desenlace tivo transcendencia para o noso futuro. 

Documental 'A vivenda un ben social?'

Redacción. -

O Instituto de Estudos Chairegos (IESCHA), en colaboración co Concello de Vilalba, organiza para o venres 17 de xuño, ás 20:00 h., na Casa da Cultura, a proxección do documental A VIVENDA, UN BEN SOCIAL?, dirixido por MARISÉ FERNÁNDEZ e XOSÉ BOCIXA. Posteriormente, levarase a cabo unha CHARLA-COLOQUIO na que participarán MARISÉ FERNÁNDEZ, traballadora social, e XOSÉ ANXO CARREIRA MONTES, arquitecto e profesor da UDC, actuando de moderadora MARISA BARREIRO, presidenta do IESCHA. A VIVENDA: UN BEN SOCIAL? é o primeiro documental galego que reflexiona sobre a situación da vivenda en Galicia, a comunidade que está á cabeza nas estatísticas de vivenda baleira no estado cunha porcentaxe que rolda o 19%. Ditas cifras evidencian o fracaso das políticas tomadas ata o momento para rehabilitar vivenda en cidades e vilas pero tamén as de fixación de poboación no rural. Malia isto, a presión do mercado inmobiliario e os pisos turísticos fan subir os alugueiros, especialmente en cidades como Coruña, Santiago ou Lugo. As e os protagonistas e casuísticas reflectidas nesta peza son varias, desde persoas sen fogar a persoas en risco de exclusión social, familias, okupas ou persoas que poden quedar sen fogar pola especulación do mercado. Por suposto, non falta a ollada de técnicos en diversas disciplinas que aportan unha ollada analítica, social e científica. Durante o documental vaise debullando a problemática da vivenda en Galicia no contexto do Estado Español e Europa, tanto nas urbes, nas vilas e nas aldeas. Ao mesmo tempo, as características endóxenas ao mercado inmobiliario vanse relacionando coa problemática persoal das testemuñas que contan a súa vivencia. Tamén se interrelaciona coa cuestión das axudas sociais, pois moitas veces a vivenda é un requisito preciso para optar a elas difícil de conseguir. Os fondos voitre, a especulación, o abandono, a compra fronte o alugueiro ou a falta dun parque de vivenda social do Estado son outros dos temas que se abordan. Do mesmo xeito apórtanse solucións diversas para mellorar o acceso a este dereito. Un dereito que está na parte baixa da pirámide de Maslow, que reflexa a orde das necesidades que temos as persoas. No base estarían as fisiolóxicas pero xusto despois a seguridade física, a moral, a saúde e a familia, cuestións impensables sen un fogar. (Textorecollido de https://www.coaglugo.es/gl/noticias/) 

Hectómetro Literario a Sonia Villapol

Redacción. -

O Paseo dos Soños de Vilalba contará cun novo Hectómetro Literario, o décimo sexto, por iniciativa da Asociación Xermolos e a Irmandade Manuel María.

Nesta ocasión estará dedicado a Sonia Villapol, neurocientífica e mestra no Instituto de investigación do Hospital Methodist de Houston.

Para este acto farase unha camiñara polo Paseo dos Soños ata o hectómetro labrado por Fernando Villapol, acompañados polo gaiteiro Raúl Galego.

Este encontro de erección dun novo monolito será ás 12.00 horas no Muíño do Rañego e intervirán Alberto Avendaño, xornalista e poeta, Modesta Campo Valiña, mestra en ciencias, Sabela Corbelle, xornalista, Paco Martín, Premio Nacional de Literatura, María Xosé Porteiro, xornalista e escritora, Guillerme Rodríguez Ososrio, mestre e psicopedagogo, e Xulio Xiz, xornalista e escritor.

Ademais haberá unha intervención musical de Marina Oural Villapol, bailarina, poeta e artista, e de Ugía Pedreira, artista e escritora.

Por outra banda, farase un xantar ás 14.30 horas no hostal Terra Chá ao que para asistir hai que anotarse chamando ao teléfono 646 413 890.
No Paseo dos Soños de Vilalba teñen xa cadanseu Hectómetro Literario Miguel Anxo Fernán Vello, Paco Martín, Manuel María, Agustín Fernández Paz, Darío Xohán Cabana, Xabier P. Docampo, Xosé Manuel Carballo, Margarita Ledo, Helena Villar-Xesús Ràbade, Xosé Chao Rego, Ramón Luis Chao, Xulio Xiz, Mini e Mero, e Alfonso Blanco Torrado

Roteiro Arqueolóxico por Vilalba

Redacción. -

O Instituto de Estudos Chairegos (IESCHA), en colaboración co Museo de Prehistoria e Arqueoloxía de Vilalba (MUPAV), organiza para o sábado 11 de xuño de 2022, un ROTEIRO denominado ANÁLISE E INTERPRETACIÓN. QUE PASABA EN VILALBA? QUE DESTRUÍMOS? QUE CONSERVAMOS?  A saída do roteiro está prevista para as 18:00 horas dende o Museo de Prehistoria e Arqueoloxía, co seguinte RECORRIDO: •  CATRO CAMIÑOS •  PORTA DE CIMA •  PRAZA DA IGREXA •  A FERRERÍA •  PRAZA DA FAROLA •  PRAZA DO CASTELO OU DA FEIRA •  A CARRETERA Inscrición: Todas as persoas que desexen participar deberán mandar un correo electrónico ao enderezo do IESCHA: estudoschairegos@gmail.com   indicando o seu nome e o seu número de teléfono. De haber máis solicitudes que prazas -25- levarase a cabo un sorteo, tendo preferencia os/as asociados/as ao IESCHA. 

Exposición "O Castro tamén na orixe da LIXG"

Redacción. -

O Instituto de Estudos Chairegos, en colaboración co Concello de Vilalba, ven de levar a cabo a montaxe na Casa da Cultura da exposición “O CASTRO, TAMÉN NA ORIXE DA LIXG”, comisariada por Héitor Picallo e organizada por GALIX (Asociación Galega do Libro Infantil e Xuvenil)  Permanecerá aberta ao público dende o 1 ata o 30 de xuño de 2022. Tal e como se recolle na web de GALIX, o obxectivo da exposición é lembrar o papel de Isaac Díaz Pardo, a través da editora, no desenvolvemento do libro infantil e xuvenil galego. Lembramos que Ediciós do Castro formaba parte do entramado empresarial de Sargadelos xunto coas Cerámicas do Castro e Sargadelos, o Museo Galego de Arte Contemporánea Carlos Maside, o Laboratorio de Formas, o IGI,... En 1963 comeza Ediciós do Castro a súa andaina ao sacar do prelo as carpetas de gravados de Seoane (El toro júbilo e El Meco en 1963) seguidas de dúas publicacións de Isaac Díaz Pardo(o ensaio, El Ceramista Arranz y su escuela, e a obra artística, 20 desnudos de Cecilia la Acróbata, en 1964 e 1965 respectivamente), editando os Cadernos do Laboratorio de Formas, estudos científicos, revistas de contido académico, traballos ensaísticos de todas as ramas do saber pero sobre todo obras nas que se recolle a chamada memoria histórica e o exilio. En 1968, por unha carambola do destino, xurde a oportunidade de publicar Memorias dun neno labrego de Neira Vilas; esta será a 2ª edición do libro (a 1ª fíxose na Arxentina) que pasa a constituírse como a primeira obra de ficción publicada polo Castro, e a primeira xuvenil ao ser asumida por este lectorado, a pesar de non estar escrita pensando nese público. A partir de aí, Ediciós do Castro seguirá publicando para a infancia e a xuventude ata o punto de crear catro coleccións: Narrativa pra nenos, O mundo do neno, Poesía pra nenos e Teatro pra nenos. Ediciós do Castro, merece ser recoñecida como unha das editoras que lle prestou atención ao libro infantil a partir dos anos sesenta e ate o seu peche dando a coñecer as obras infantís de Neira Vilas e Anisia Miranda, a primeira obra de Mª Victoria Moreno e moitas outras que forman parte da exposición. 

Pregón da Feira do Libro

Luz Airado Bello.-

Boa tarde. Benvidos todos e cada unha. Boa feira, autoridades. Boa feira, autoras, autores, librarías, editoriais. 

Boa feira tamén ao público lector que nos acompaña e nos acompañará ao longo destes días. Boa feira, veciñas e veciños.

Quixera expresarvos a miña fonda gratitude xa que me fai especial ilusión e moi feliz poder pregoar esta Feira na miña vila natal, na capital da Chá, nesta chaira de libros e casetas que se estende afectuosa e próxima dende hoxe e 

durante toda a fin de semana. Porque esta Feira do Libro que hoxe comeza quere acollernos, a grandes e cativos, á xente de aquí e ás xentes de paso que temos na vila e a todos os homes e todas as mulleres que poñen o seu talento en todos os oficios do libro. Gozade, pois! Aquí atoparedes páxinasque contan historias das que poder apropiarvos, coas que poder vivir segundas, terceiras e ulteriores vidas, historias 

que están entre nós, aí ao lado, coas que recoñecernos. 

Toparedes con versos que vos devolverán o tempo que no día a día se nos consome fugaz, haberá versos do amor e do desamor, da melancolía e tamén versos revolucionarios, 

versos sociais, abanos de versos segundo a predilección, o interese ou a necesidade do lector ou lectora. Haberá páxinas que albergan coñecemento e tamén, ben seguro, haberá

humor. Moitas veces será compañeira a fotografía ou o debuxo, nun perfecto baile das artes.

Hai uns anos profetizouse a desaparición dos libros de papel por mor do avance das novas tecnoloxías. Por sorte, unha profecía non cumprida. Non só segue vivo o libro de 

papel senón que tralos difíciles días da pandemia a súa fortaleza quedou demostrada. Celebrémolo entón! É marabilloso atopar os libros na rúa. Eses libros que durante moitos séculos permaneceron pechados nos palacios, nos grandes conventos, nas bibliotecas das casas nobres. Hoxe 

eses libros están aquí, nesta praza, ao voso completo alcance. E isto é colleita de anos de educación e transformacións sociais, é froito dun gran traballo colectivo, do traballo das xeracións que nos precederon. 

Anímovos a mergullarvos na fame lectora que se 

instalará dende hoxe nesta praza, a que pescudedes en cada caseta os exemplares cociñados coa palabra para vós, a que 

os catedes na sobremesa ou os devoredes a deshora, a que vos autoagasalledes e tamén a que procuredes agasallo para a vosa xente, pois cantas viaxes teñen cabida entre as 

páxinas dun libro... E antes da escolla, se me permitides, unha recomendación: detédevos cos libros das autoras, ulídeos, palpádeos, teñen moito que contarnos; por sorte hoxe témolas aquí, con nomes e apelidos, sen pseudónimos,

intentando deixar atrás tantos séculos de escritoras silenciadas.

De novo, benvidas, benvidos á Feira do Libro de Vilalba.

'Ragazzo' no Galicia Escena Pro

Redacción. -

Ragazzo, da compañía Barrosanta, é unha das pezas seleccionadas para participar no Galicia Escena Pro. A representación desta peza reivindicativa que fala do asasinato dun activista italiano poderá verse o 8 de xuño, ás 20:00h, no Teatro Principal de Compostela. Tralo éxito da súa estrea o pasado febreiro, Ragazzo é agora un dos 18 espectáculos que foron seleccionados entre máis de 80 propostas en Galicia Escena Pro, a feira profesional galega das artes escénicas organizada por Escena Galega e a Xunta de Galicia serve de escaparate para que profesionais da programación descubran as novas obras de teatro que están a destacar. Esta selección non é o primeiro recoñecemento a esta nova montaxe: o texto de Ragazzo xa foi galardoado con dous Premios da Crítica (revelación e espectáculo para a xuventude), co Premio da Crítica SERRA D'OR e o Premio do Público no F.I. Huesca. A reivindicativa obra Ragazzo é seleccionada no Galicia Escena Pro Ragazzo é unha historia real con nome e apelidos: Carlo Giuliani. Un xoven activista italiano asasinado nunha manifestación contra o cumio do G8 en Xénova no 2001. Un relato conmovedor que ten como protagonista a Anxo Outumuro (El desorden que dejas) e está dirixida por Xavier Castiñeira (Butacazero) e con texto de Lali Álvarez. “Ragazzo é unha oda á xuventude e á liberdade, un grito á vida, á dignificación das historias personais e unha reivindicación da memoria colectiva”, indican dende a compañía Barrosanta. Os programadores e programadoras que asistan á peza acompañarán a Carlo Giuliani durante tres días a concertos, rexistros da policía, manifestacións e incluso a unha cita. Tres días que fantasían coa vitalidade e á vez documentan o tráxico final deste ragazzo nunha obra que é unha chamada á esperanza e unha reivindicación daquelas persoas que loitaron e loitan por perseguir as utopías. 

Obradoiro de regueifa na Casa do Manuel

Redacción. -

A mesma tarde do sábado, antes do concerto de Zoelas, concretamente ás 18 horas, e tamén na Casa-Museo Manuel María, a regueifeira, cantora e poeta Alba María desenvolverá un obradoiro de iniciación á regueifa. A actividade de dúas horas de duración, é gratuíta e está dirixida para todos os públicos, adultos e crianzas a partir dos dez anos. Para asistir é necesario anotarse previamente a través do correo electrónico contacto@casamuseomanuelmaria.gal ou no whatsapp 698177621.

Concerto de Zoelas na Casa do Manuel

Redacción. -

Este sábado, día 4 de xuño, ás 20 horas, a formación orixinaria da comarca da Ulloa, Zoelas, subirá ao cenario do auditorio da Casa-Museo Manuel María para interpretar ao público asistente pezas do seu traballo Evelaités, así como algunha recente composición do que será o seu próximo traballo discográfico.

Zoelas é un proxecto musical en que se mestura as raíces do canto tradicional con melodías de variados estilos musicais como o reggae, blues ou bossa nova, e letras propias que conviven con coplas recollidas. Canto coral feminino con Bea García, Érica García, María Bouzas, Pilar Naveira e Patricia Coucheiro acompañadas de Michel Rivadulla (guitarra), Miguel Varela (percusión) e Bruno Villamor (requinta, zanfona e gaita).

Para asistir ao concerto é necesario reservar previamente o billete (5 euros) en contacto@casamuseomanuelmaria.gal ou a través do whatsapp 698177621.