Sara Veres, Trapeira de Honra


Redacción.-

A Asociación Socio-Cultural Lareira de soños e o grupo poético NPG Nova Poesia Guitirica organizan o acto de entrega dos prémios da VI edición Trapeira de Honra e da III edició do Certame Vilariñas de micro poesía terá lugar o 19 de Outubro ás 19:00 na Casa Habaneira de Guitiriz.

O prémio TrapeirX de Honra corresponde este ano á emprendedora Sara Veres Vazquez 'Sara das Reixas'. Nas edicións anteriores foron recoñecidXs José María Díaz Castro (póstumo), Romaría Labrega da Chaira, o músico José Díaz 'Pepe de Cristos', á Labrega Asunción Lobeiras 'Asunción dos Ares' e ao emigrante en Euskadi e activista cultural Raúl Río.
Na III edición do Certame Vilariñas corresponde o primeiro prémio á viguesa con orixes en Begonte Beatriz Coira Ríos, o 2° prémio ao berciano Manuel González Prieto e o 3° prémio á arousana Ana García Rivas que se farán coa fermosa figura deseñada pola artista Viki Rivadulla, pezas únicas feitas a man que conforman a imaxe deste concurso cada día máis popular.
Así como no 2018 homenaxeamos a Alfonso Blanco Torrado, na edición 2019 honraremos á escritora, mestra e poeta Marica Campo, orixinaria do Incio e con fondas vinculacións a Guitiriz e á Terra Chá.
Neste acto, no que xuntaremos por primeira vez estes dous recoñecementos, contaremos con importantes participacións poéticas e musicais e será aberto ao público.

Nas edicións anteriores, gañaron as Vilariñas Andrea Araújo Alonso de A Guarda, Pedro Rielo Lamela de Pontevedra, Toño Núñez, de Navia, Beatriz Dourado de Lugo, Mila Villanueva de Valencia e Cris Amoedo de Vigo.
Nesta edición, as tres Vilariñas irán a Vigo, O Bierzo e Vilagarcía.

O premio Trapeir@ de Honra pretende poñer en valor e homenaxear a persoas que desde o anonimato contribuiron co seu traballo a dignificar a labor do seu pobo e que simbolizan o esforzo, o traballo silencioso e necesário poucas veces valorado social e mediaticamente.
O Certame Vilariñas é un humilde concurso poetico-artistico no que as imaxes e os micro poemas da man, compoñen verdadeiras pezas artísticas. Reciben o seu nome en homenaxe aos Vilares e O Vilariño de Díaz Castro e ao valor das "herbas pequerrechiñas" e o valor das cousas pequenas tan recurrentes na súa obra NIMBOS.
Despois dos actos, teremos a tradicional cea "Vilariña".

10 de out. de 2019

Finalistas do Premio Mondoñedo 2019

Redacción.-

Rematada a fase de deliberación e propostas, os membros do xurado do Premio Mondoñedo10 2019, Modalidade ENSAIO, acordan propoñer como obras finalistas as seguintes:

OBRAS FINALISTAS Premio Mondoñedo10 _2019
Modalidade Ensaio

01.-Ramón Nicolás: Onde o mundo se chama Celso Emilio Ferreiro, Edicións Xerais de Galicia, 2012. ISBN: 978-84-9914-402-3.
02.-Xosé M. González Reboredo:Os santos titulares de parroquia en Galiza,  Sotelo Blanco Edicións, 2012. ISBN: 978-84-7824-626-7.
03.-Xaime Subiela: Para que nos serve Galiza? Galaxia, 2012. ISBN: 978-84-9865-502-5.
04.-Xurxo Ayán / Manuel Gago: Herdeiros pola forza. Patrimonio cultural, poder e sociedade na Galicia do século XXI, editada por 2.0 Editora, 2012. ISBN: 978-84-938683-9-0.
05.-Francisco Rodríguez Sánchez: Rosalía de Castro, estranxeira na súa patria (a persoa e a obra de onte a hoxe), edita Asociación Socio-Pedagóxica Galega, 2013. ISBN: 978-84-938747-0-4.
06.-Antón Cortizas: Tastarabás. Enciclopedia de brinquedos tradicionais e uso lúdico da natureza, Edicións Xerais de Galicia, 2013. ISBN: 978-84-9914-486-3.
07.-Helena Miguélez-Carballeira: Galiza, um povo sentimental? Através Editora, 2015. ISBN: 978-84-87305-86-3.
08.-Ramón Villares: Historia de Galicia, Galaxia, 2016. ISBN: 978-84-9865-672-5.
09.-Roberto Fernández Álvarez: Enfermos pobres, médicos tristes: Historia crítica da medicina rural en terras esquecidas, Ed. Dr. Alveiros, un selo de Urco editora, 2017. ISBN: 978-84-942726-6-0.
10.-Ramón Villares: Identidade e afectos patrios, Galaxia, 2017. ISBN: 978-84-9151-082-6.
11.-María Xesús Lama: Rosalía de Castro. Cantos de independencia e liberdade (1837-1863), Galaxia, 2017. ISBN: 978-84-9151-040-6.
12.-Anahí Almasía, Mariela Sánchez e Antón Santamarina: Memorias dun loitador antifranquista O testemuño do comunista David Álvarez Carballido. Ed. Alvarellos, 2018. ISBN: 
978-84-16460-44-1.
13.-Carlos Iglesias Castelao: As orixes da fotografía en Galicia. Estudios composteláns do s. XIX, Alvarellos Editora-Consorcio de Santiago, 2018. ISBN: 978-84-16460-51-9
COMPOSICIÓN DO XURADO
Presidente: Antonio Reigosa, Cronista oficial de Mondoñedo.
Vogal designado polo Consello da Cultura Galega.
Vogal designado pola Real Academia Galega
Vogal designado pola Asociación de Escritores/as en Lingua Galega (AELG).
Vogal designado pola Asociación Galega de Editoras.
Vogal designado polo Instituto Galego de Historia.
Vogal designado por Facultade de Humanidades de Lugo (USC)
Vogal designado polo Concello de Mondoñedo.
Secretario: Fran Bouso, designado pola asociación convocadora deste premio.
Os nomes dos membros do xurado con capacidade decisoria faranse públicos unha vez fallado o premio. Nin o presidente do xurado nin o secretario poden propoñer nin votar obras.

REUNIÓN DO XURADO E FALLO DO PREMIO
O xurado designado para elixir a obra gañadora reunirase en Mondoñedo o domingo, 13 de outubro de 2019, ás 12:00h.
A entrega do premio ao autor/es ou autora/s da obra gañadora terá lugar en acto público a celebrar no Auditorio 'Pascual Veiga' de Mondoñedo o domingo, 20 de outubro.

PREMIO
O premio que se entregará ao/á autor/a da obra seleccionada, ou, en caso de falecemento ou outra causa, a un representante designado polos herdeiros ou titulares dos dereitos da obra premiada, consistirá nun diploma acreditativo e unha obra artística orixinal e única, creada para esta ocasión polo artista mindoniense, José Pedro Gómez.

ACTO DE ENTREGA DO PREMIO
O acto de entrega do galardón á obra distinguida co Premio Mondoñedo10 na modalidade de ENSAIO celebrarase en Mondoñedo o domingo, 20 de outubro de 2019.

28 de set. de 2019

Proxecto Ríos de Adega


Redacción.-

O Proxecto Ríos é un programa de Educación e Voluntariado Ambiental que ten a finalidade de dar a coñecer o importante papel dos cursos fluviais, amosar as súas problemáticas así como fomentar iniciativas que permitan á cidadanía o mantemento e a mellora dos ríos proporcionando as ferramentas que garantan a súa participación.
XII Limpeza Simultánea Móllate polos ríos” se celebrará este ano en 48 concellos de toda Galiza, e participarán máis de 70 entidades (asociacións, comunidades de montes, colectivos ecoloxistas, delegacións de ADEGA, centros de ensino...). Algúns destes grupos xa participaron nas limpezas de anos pasados e outros son grupos participantes no Proxecto Ríos. Tamén hai novas entidades que se sumaron por primeira vez a esta duodécima edición. A limpeza que será o 29 de setembro e mobilizará a numerosos voluntarios e voluntarias que se desprazarán aos ríos destes 48 concellos para deixalos libres de lixo, nunha xornada de voluntariado ambiental e concienciación social.
En Lugo realizará a coordinación da limpeza a Asociación para a Defensa Ecolóxica de Galiza (ADEGA), xunto a Plataforma Lugo de Cara ao Miño.
Os/as voluntarios/as serán agasallados cunhas camisolas co lema da limpeza. Actualizouse a páxina web para a limpeza http://proxectorios.org/limpeza/ onde se especifica que é a limpeza, onde se celebrará, os contactos dos/das coordenadores/as, e as entidades participantes e colaboradoras.

Cine Clube Lar de Unta

Redacción.-

A Asociación gastronómica, cultural, xuvenil e deportiva LAR DE UNTA de Betanzos crea o clube de cinema co seu mesmo nome. O sábado 28 de setembro ás 21:00 comenzará a actividade con unha estrea. Co obxectivo de complementar na cidade a oferta municipal máis comercial, Lar de Unta promove un clube de cinema ao estilo clásico con filmes de autor e de traballos audiovisuais que normalmente non se poden visionar en salas comerciais. O clube estreará as proxeccións co ciclo "Cinema daquí" con filmes de novos realizadores galegos. A primeira será a estrea de ESTRUCTURAS, PEL CONTRA PEL dos realizadores X.Antón Bocixa e Paco Gallego. A esta sucederán películas de Xurxo Souto, Marcos Nine, Eduardo Maragoto, ou os premiados internacionalmente Lois Patiño ou Eloi Enciso entre outros. A este ciclo seguirán outros de cinema de outros países e diversas temáticas e mesmo algún de cine galego infantil e de animación, de diversos xéneros ou de realizadores/as da comarca. Proxectaranse tamén filmes relacionados con tradicións populares como o antroido ou outras festas populares e temáticas sociais actuais. Neste primeiro ciclo contaremos cos proprios directores e productores para coloquios posteriores co público e ocasionalmente organizaranse conferencias e mesas redondas con profesionais do audiovisual. Pretendemos con esta iniciativa devolver a Betanzos a súa tradición cinematográfica ( Betanzos conta coa sala de cinema máis antiga do estado en funcionamento) aínda que se proxectarán filmes do cine clube no Alfonseti en ocasións moi especiais. O Cine Clube Lar de Unta é de facto un proxecto complementario e non un competidor dos programas municipais cos que se propón convivir e mesmo cooperar. A propia sede da asociación na rúa Pescadería 1 no casco histórico, frente ao mercado municipal será a sala de proxeccións, co encanto do local, as vellas caballerizas do pazo do Marqués de Figueroa e con unha grande parede branca acondicionada para pantalla do Cine Clube. As proxeccións serán gratuitas para o púbico. O Cine Clube ten realizado xa contactos con FECIGA (Federación de Cineclubes de Galicia) outros cineclubes e creadores para o asesoramento e colaboracións no futuro. O clube, conformado no seu inicio cos socios da asociación, estará aberto á participación de veciñ@s que o desexen no futuro pois está concebido como un proxecto aberto e participativo.


https://www.facebook.com/events/2284478618324349/?ti=cl

XI Lúas de Outono


Redacción.-

Cando se cumpren 15 anos do falecemento de Manuel María na cidade da Coruña, a Fundación que leva o seu nome organiza un ano máis o espectáculo “Lúas de Outono” que se desenvolverá no Teatro Rosalía o próximo mércores día 25, ás 20:30h, con entrada libre até completar o aforo, podendo retirarse o convite no propio teatro o mesmo día entre as 16 e as 20 horas.
As “Lúas de Outono”, en palabras de Alberte Ansede, secretario da Fundación, “son un xeito de difusión da súa obra literaria e, tamén, dos valores que el defendía e practicaba. Non é pois unha mirada nostálxica cara ao pasado, senón unha celebración da palabra viva e comprometida que nos legou o escritor.”. 
A presente edición céntrase nun feito histórico no que Manuel María tivo unha participación importante: o nacemento da NOVA CANCIÓN GALEGA que se produciu hai 50 anos. Foi concretamente o día 1 de decembro de 1968 cando se realizou o concerto de presentación deste novo movemento musical que aglutinaba un grupo de mozos universitarios que pasaron a cantar en galego e, ademais, moi alonxados do folclorismo franquista. Correspondeulle a Manuel María facer a presentación deste histórico concerto que supuxo o punto de partida da canción galega, é dicir da canción feita en galego e que fala dos problemas de Galiza tratando de recobrar a tradición da lírica medieval na que, ademais de “doces e tenras cantigas de amor”, os nosos trobeiros e xograres daban testemuña da crúa realidade que tiñan diante de si.
Alén de ser o presentador de aquel concerto, Manuel María alimentou este movemento coas súas propias letras e, sobre todo, ao contribuír á publicación dos seus discos no selo EDIGSA-XISTRAL. EDIGSA era un selo catalán que xa publicara en concerto con GALAXIA algúns discos en galego traducidos do francés e do inglés e cantados por voces catalás. Mais posteriormente, o selo catalán vaino facer con EDIGSA, selo patrocinado polo propio Manuel María.
En definitiva, en 1968 a canción galega comeza un camiño novo, autónomo, construído desde aquí, buscando unha estética propia... un camiño que xa ten dado moitos frutos. Precisamente nas “Lúas de Outono” deste ano ofreceranse tres exemplos diferentes deste xa longo e intenso camiño da música galega:
Miro Casabella como o único dos seis músicos que hai 50 anos estaba alí e que na actualidade segue realizando actuacións.
Uxía, pertencente á xeración seguinte que recolleu aquela testemuña e que na actualidade está na plenitude da súa carreira artística.
Molime, un grupo de moi recente creación que segue a senda trazada xenericamente hai 50 anos pola Nova Canción Galega: música en galego e comprometida con Galiza.
En definitiva, tres exemplos que mostran que hai un fío de continuidade nestes anos de historia musical, un fío que Manuel María axudou a construír.
Na rolda de prensa tamén participaron Xurxo Couto, responsábel de Cultura da Deputación, Xesús Celemín, concelleiro de Cultura do concello da Coruña, Xurxo Souto, encargado de conducir o acto e Saleta Goi, viúva de Manuel María e Presidenta da Fundación Manuel María.
O deputado de Cultura, Xurxo Couto lembrou que a homenaxe responde á propia traxectoria do poeta, o segundo máis musicado da literatura galega, despois da fundadora Rosalía de Castro. Xesús Celemín mostrouse moi satisfeito de que este acto se realizase na cidade da Coruña onde residiu o poeta nos últimos anos da súa vida. Pola súa parte Xurxo Souto resaltou a importancia da aparición da Nova Canción Galega e o papel que Manuel María desempeñou nese feito histórico. Finalmente Saleta Goi agradeceu a colaboración de artistas e institucións na homenaxe e animou a participar no acto.



Teléfono de contacto: 616190349 (Alberte Ansede)

23 de set. de 2019

III Festival Son Labreg@

Redacción.-

Sonia Vidal Lamas (Sindicato Labrego Galego) e Pilar Ferreiro Villar (Concello de Castroverde) presentaron en Lugo, onte 18 de setembro, a terceira edición do Festival Son Labreg@, que nesta ocasión se celebrará na parroquia castroverdense de Montecubeiro, coa colaboración do Centro Social d'A Chave das Noces. Este festival é un evento itinerante e que xa se ten celebrado noutros escenarios rurais como Lousada (Sarria) ou Garabelos (Chantada).

Na comparecencia diante dos medios de comunicación, Sonia Vidal Lamas, da Executiva e da área de Mocidade do SLG, debullou un programa que, en canto aos contidos, este ano estará centrado no ecofeminismo e na xestión dos montes comunais. Dende este punto de vista, co Son Labreg@ deste ano preténdese non só destacar o uso multifuncional do monte como factor decisivo para a prevención de lumes, a xestión do territorio, o emprego no rural ou a conservación do medio ambiente; senón, ademais, facer visible o papel fundamental que as mulleres desempeñaron e desempeñan neste senso.

Precisamente, a palestra coa que abre o festival ás 12:00 leva por título “Alternativas produtivas do noso monte”, e contará coa participación de experiencias contadas en primeira persoa polas súas protagonistas como as cooperativas Amarelante (Manzaneda) ou Ribeiregas (Negueira de Muñiz), as comunidades de montes de Froxán (Lousame) ou Carballo (Friol), e experiencias produtivas como a de Gemma Sampedro co gando caprino e as súa empresa Cabuxa Natur (Guntín).

Xa pola tarde, ás 18:00 horas, presentarase o libro Montes que non arden: as mulleres na prevención dos montes comunais. Trátase dunha iniciativa impulsada dende o Proxecto Batefogo que se vai plasmar na publicación dun libro multidisciplinar, pola Editorial Catro Ventos, no que profesionais de diversos ámbitos analizan o papel imprescindible das mulleres na xestión do monte (www.goteo.org/project/arbores-que-non-arden). Contaremos coa presenza dalgunhas das mulleres que participaron na redacción deste libro, entre elas a historiadora Lara Barros, que nos falará tamén do papel das mulleres na xestión dos montes comunais dende unha perspectiva histórica (www.facebook.com/pg/mulimeinvestigacion/about/).

Una aposta lúdica que terá como prato forte actuacións musicais todo o día con Trasdalomba, Amigos do Caldeiro, Sacha na Horta, Tecor Sociétario e Sapoconcho sem Poncho
Como non podía ser doutro xeito, o Festival Son Labrego terá unha ampla oferta lúdica, na que destaca un amplo cartel musical, coa actuación na sesión vermú do grupo de música tradicional castroverdense Trasdalomba. No serán, haberá foliada co grupo Amigos do Caldeiro e, xa pola noite, o prato forte a cargo de Sacha na Horta e Tecor Sociétario, finalizando coa selección musical que fará para @s asistentes o DJ Sapoconcho sem poncho.

Ademais de música, haberá actividades propias para a rapazada, un obradoiro de elaboración de pan a partir de landras, un campionato aberto de billarda e a tradicional feira que sempre acompaña este festival cunhas previsións que apuntan a unha vintena de postos nos que haberá alimentos de calidade, artesanía, organizacións sociais, etc.

Para as persoas que queiran xantar en Montecubeiro, a organización terá servizo de bar e venderanse racións de empanada, lacón asado ou chourizos ao viño para xantar. Tamén se instalará unha carpa en previsión das posibles choivas.

Apoio institucional do Concello de Castroverde
Pola súa banda, Pilar Ferreiro, concelleira de Cultura e Deportes de Castroverde, comentou que “recibir este tipo de propostas é realmente unha satisfacción, xa que precisamos darlle pulo ao rural e que cada vez se sinta máis vivo. Para este evento elixiuse a parroquia de Montecubeiro como lugar de celebración. As súas fermosas paisaxes e a historia que leva ás súas cotas fan desta parroquia un lugar único e idóneo para a celebración deste festival”. E coa vista máis posta no futuro, engadiu que, “pola nosa banda, seguiremos abertos a seguir colaborando con iniciativas coma esta, para darlle ao rural a importancia e o lugar que realmente se merece”.

19 de set. de 2019

Recortes sanitarios en A Pastoriza


Redacción.-

Veciños da Pastoriza denuncian a perda de servizos sanitarios no seu concello e alertan da situación na que se atopa a atención médica no Centro de Saúde da localidade desde que se xubilou este verán un dos tres médicos de atención primaria que había, unha redución na prestación sanitaria que se engade aos problemas existentes na atención pediátrica e no servizo de urxencias no PAC de Meira.

Nun escrito dirixido ao Conselleiro de Sanidade, os presidentes de 5 asociacións de veciños do concello, pertencentes ás parroquias de Úbeda, Lagoa, Álvare, Reigosa e Rigueira, explican que "no Centro de Saúde da Pastoriza veuse producindo nos últimos anos un descenso acusado no número de profesionais sanitarios, pasando de 4 médicos a tan só 2 na actualidade, o que está a provocar unha perda importante na calidade asistencial que recibe a poboación".

Explican que "hai dous anos vimos reducido o número de médicos de familia de catro a tres e agora, trala xubilación este verán dun dos facultativos, vemos que non foi cuberta de maneira permanente e non temos certeza nin garantía de que se vaia cubrir esa praza, tendo que asumir os dous médicos titulares que quedan toda a carga de doentes Por agora o Sergas está cubrindo a praza do médico que se xubilou puntualmente con interinos ou contratados temporais, pero non hai un facultativo fixo, o cal causa trastornos nos doentes pois cada vez que acoden a consulta aténdeos un médico de cabeceira diferente, poñendo en risco a súa saúde, pois os continuos cambios dificultan que o médico poida coñecer ben o historial do paciente, máis ainda debido á carga de traballo que soportan os médicos de atención primaria, e resulta evidente que o facultativo non pode ler e estudar o historial médico de cada paciente nunha consulta de 10 minutos", argumentan.

Ante esta situación, os representantes veciñais solicitan unha reunión "á maior brevidade posible" co Conselleiro de Sanidade, Jesús Vázquez Almuiña, á fin de que este concrete "se a praza deste terceiro médico vai ser cuberta". "Vemos que está no aire e queremos que se nos garanta que non está en risco", din.

Sen pediatra

Os presidentes das asociacións de veciños pretenden tratar tamén co conselleiro outros asuntos que afectan á poboación do concello, dado que a perda de servizos de atención primaria engádese aos problemas existentes coa atención pediátrica e co servizo de urxencias no PAC de Meira.

"No concello da Pastoriza contamos co servizo de pediatra compartido co concello de Meira, estando dous días á senama no centro médico da Pastoriza e tres no de Meira. Pero cando o pediatra titular colle vacacións ou está de baixa queda a praza descuberta obrigándonos a acudir ao pediatra de Vilalba, cos inconvintes que isto acarrea tanto para os nenos e nenas como para as familias. Estas circunstancias merman o sevizo sanitario pois o pediatra de Vilalba non coñece os nenos e xa está desbordado polos pacientes que ten asignados, como para ter que asumir os dos concellos limítrofes", denuncian as nais afectadas, que se sumaron tamén á petición de reunión co conselleiro.

Desatención no PAC de Meira

Unha terceira problemática existente na Pastoriza ten que ver co funcionamento do Punto de Atención Continuada de Meira. Os veciños de Meira, A Pastoriza, Ribeira de Piquín, Pol e A Pontenova comparten o PAC do Centro de Saúde de Meira, onde hai un médico e un ATS de garda. "O problema xorde cando se dá unha urxencia domiciliaria e o equipo de garda se ten que desprazar a aldeas afastadas do PAC, pois este queda descuberto. Se nese momento unha persoa acode a urxencias non hai quen o atenda, ocasionando largas esperas ata que o médico está de volta", denuncian. Para os veciños da Pastoriza trátase dunha situación "inaceptable" nun servizo de urxencias que "pon en risco a vida das persoas" e lembran que o PAC de Meira atende a unha poboación de máis de 10.000 habitantes e cubre un territorio de máis de 600 quilómetros cadrados.

Os repesentantes veciñais consideran a sanidade "un servizo básico esencial", máis, din, "nun concello rural como é A Pastoriza, de 3.000 habitantes e cunha importante dispersión poboacional e unha alta tasa de envellecemento, o que se traduce nunha necesidade maior de servizos de atención primaria".

Premio Mondoñedo 2019. Modalidade Ensaio

Redacción.-

A Asociación As San Lucas en colaboración co Colectivo Mondoñedo É … e o Concello de Mondoñedo veñen de convocar a 4ª edición do galardón denominado Premio Mondoñedo que nesta ocasión, ano 2019, se concederá na modalidade de ENSAIO á obra que o xurado estime merecente, escrita orixinalmente en galego e cuxa primeira edición fose publicada en calquera soporte nos 10 anos anteriores ao desta convocatoria; ou sexa, entre 2009 e 2018, ambos inclusive.
En aplicación das BASES (ver anexo) neste momento, unha que todas as institucións que forman pàrte do xurado, nomearon aos seus respectivos representantes estes, a título individual, farán chegar nas próximas datas á secretaría as obras propostas que terán a consideración de finalistas, cuxa listaxe que se fará pública antes da data, 13 de outubro, prevista para o fallo.

COMPOSICIÓN DO XURADO
Composición do xurado para a edición correspondente ao ano 2019, modalidade ENSAIO.
Presidente: Antonio Reigosa, Cronista oficial de Mondoñedo.
Vogal designado polo Consello da Cultura Galega.
Vogal designado pola Real Academia Galega
Vogal designado pola Asociación de Escritores/as en Lingua Galega (AELG).
Vogal designado pola Asociación Galega de Editoras.
Vogal designado polo Instituto Galego de Historia.
Vogal designado por Facultade de Humanidades de Lugo (USC)
Vogal designado polo Concello de Mondoñedo.
Secretario: Fran Bouso, designado pola asociación convocadora deste premio.
Os nomes dos membros do xurado faranse públicos unha vez fallado o premio. Nin o presidente do xurado nin o secretario poden propoñer nin votar obras.

REUNIÓN DO XURADO E FALLO DO PREMIO
O xurado designado para elixir a obra gañadora reunirase en Mondoñedo o domingo, 13 de outubro de 2019, ás 12:00h.
A entrega do premio ao autor/es ou autora/s da obra gañadora terá lugar en acto público a celebrar no Auditorio Pascual Veiga de Mondoñedo o domingo, 20 de outubro¡.

PREMIO
O premio que se entregará ao/á autor/a da obra seleccionada, ou, en caso de falecemento ou outra causa, a un representante designado polos herdeiros ou titulares dos dereitos da obra premiada,
consistirá nun diploma acreditativo e unha obra artística orixinal e única, para esta ocasión creación do artista mindoniense, José Pedro Gómez.
ACTO DE ENTREGA DO PREMIO
O acto de entrega do galardón á obra distinguida co Premio Mondoñedo10 na modalidade de ENSAIO celebrarase en Mondoñedo o domingo, 20 de outubro de 2019.
PREMIOS 2016, 2017 e 2018 (Recordatorio)
Na primeira edición correspondente ao ano 2016 o xurado elixiu como mellor obra na modalidade de NARRATIVA publicada entre os anos 2006 e 2015 “Os libros arden mal” da autoría de Manuel Rivas,
publicada por Edicións Xerais de Galicia, 2006.
Premio: Diploma e obra de arte orixinal de Caxigueiro.
Na segunda edición correspondente ao ano 2017 o xurado elixiu como mellor obra na modalidade de POESÍA publicada entre os anos 2007 e 2016 “Hordas de escritura” da autoría de Chus
Pato, publicada por Edicións Xerais de Galicia, 2008.
Premio: Diploma e obra de arte orixinal de Juan Puchades.
Na terceira edición correspondente ao ano 2018 o xurado elixiu como mellor obra na modalidade de TEATRO publicada entre os anos 2008 e 2017 “Nome: Bonita” da autoría de Vanesa
Sotelo, publicada por Instituto Nacional de las Artes Escénicas y de la Música, 2015.
Premio: Diploma e obra de arte orixinal de Xosé Vizoso.

Movemento Galego polo Clima


Redacción.-

O Movemento Galego polo Clima xorde en Galiza como resposta á convocatoria de mobilización mundial feita polo movemento xuvenil Fridays For Future (Venres por Un Futuro) para o vindeiro 27 de setembro, co obxectivo de sair á rúa a reclamar accións urxentes que fagan fronte á mudanza climática e que garantan un futuro para as xeracións máis novas.

O Movemento Galego polo Clima está conformado por unhas 50 entidades e colectivos galegos que apoian o chamado de acción da xente nova ante a situación de Emerxencia Climática que vive o planeta enteiro, e particularmente Galiza. É por iso que temos intención de afrontar este reto tendo presente cales son as causas que máis están alentando o quecemento global no noso país e cales son as medidas que poderían evitar as consecuencias drásticas para o noso territorio e para o pobo galego no seu conxunto.

O Movemento Galego polo Clima apoia e participa da organización de todas as accións e actividades polo Clima que se van desenvolver nas distintas localidades galegas do 20 ao 27 de setembro, e das que queremos dar conta neste blogue.

Máis información aquí.

VII Festa da Afirmación e da Dignidade

Redacción.-

Este sábado, 21 de setembro, terá lugar a VII Festa da Afirmación e a Dignidade no Pedregal de Irimia organizada pola Irmandade Manuel María e a Asociación Xermolos, coa colaboración do Concello de Meira.

O programa dará comezo ás 12.00 horas coa lectura do Manifesto da Afirmación e Dignidade, feito por Baldomero Iglesias Mero, así como dos comunicados elaborados por varios colectivos: representantes da Irmandade Manuel María, representante de Asociación Ecoloxista Adega, representante dos compañeiros e compañeiras privadas de liberdade por mor da lealdade á Terra e á Patria Madia Leva, representante da Asociación Poeta Avelino Díaz e outros.

Realizarase a entrega das Mans de Irimia, obra do creador Manuel Pardo Lopez de Meira, “ao distinguido amigo e profesor do entendemento desde a palabra e para os feitos” Isaac Alonso Estraviz, cun recoñecemento a Bernardo Penabade.

A título póstumo a recibirán a distinción Santi Caneiro, “construtor de tantas melodías e soños, amigo que recentemente foi navegar outras nostalxias”, do que fará unha memoria do seu labor e merecementos Mero. O premio será entregado á súa compañeira e a filla María.

A parte musical da sesión correrá a cargo do Grupo de Gaiteiros do Padroado de Cultura Concello de Narón. Farase ao pé da ara de Prisciliano, obra de Xose Val Diaz.

Non faltará o xantar popular, ás 14.00 horas. Os interesados en asistir deben inscribirse coa organización (teléfonos: 646 413 890 / 630 217 035), e aboar 22 euros.

Finalmente, ás 16.30 horas rematará a programación cos recitais de música e poesía, na Praza do Convento de Meira, a cargo das Pandereteiras Nove Ferreñas de Meira, Cantareiras Sócratas e outras agrupacións musicais.

III Recital Poesía en Feminino

Redacción.-

O sábado 21 de setembro, a partir das 17.00 h., temos unha cita coa poesía amadora de vangarda no III Recital de Poesía en Feminino organizado pola Concellaría de Igualdade, ao que asistirán 27 creadoras e creadores de San Sadurniño pero, sobre todo, doutras partes de Galicia. Na súa maioría adscríbense a movementos consolidados, como In nave civitas/ urbano Lugrís Nomades do verso/Antón Borrazás, a Irmandade poetica luso-Galaica ou a NPG Nova Poesía Guitirica, aínda que tamén acudirán representantes doutros de recente creación, como o colectivo Moraima xurdido en Fene. Será un encontro co que reivindicar tanto a literatura e a oralidade do sentimento como o rol feminino na arte das letras e en calquera outra faceta da vida que, ademais, contará coa ambientación musical das violonchelistas locais Inés e Irene Arroyo.

O departamento municipal de Igualdade leva tres anos promovendo o seu encontro poético co que darlle voz a poetas que avogan polo verso reivindicativo, polo berro sentido contra os desequilibrios da sociedade e, nomeadamente, contra o patriarcado que o segue tinguindo todo, tamén a creación literaria. E como cada ano desde o seu inicio encarga a organización ao grupo poético NPG Nova Poesia Guitirica, grupo activo e consolidado criado a partires da desicatória das letras galegas ao poeta vilarego Xosé María Díaz Castro.

Este ano a cita fixouse para o sábado 21 de setembro e a ela acudirán representantes de varios colectivos que teiman na poesía amadora como xeito de expresión, malia ser este o xénero literario con menor visibilidade ou, dito doutro xeito, cunha maior dificultade para chegar ao grande público.

Males menores que, porén, se ven compensados por unha liberdade case absoluta de estilos e formatos que non se pode atopar na prosa, no teatro nin en ningunha outra arte. A poesía sae de dentro de cadaquén sen imposturas. É o que se sente feito verbo, unha porta que se abre de par en par no peito de quen escribe para deixarnos entrar no seu ser, no seu pensamento, acadando unha significación aínda maior cando é a propia autora ou autor quen recita os seus poemas.

E, en San Sadurniño, teremos todo iso xunto nun encontro que terá lugar na Casa do Concello, concretamente no seu patio interior no Pazo da Marquesa se vai bo tempo e, se non, na Casa da Cultura. A relación de participantes chega a 27, procedentes de Fene, Ferrol, A Coruña, Pontevedra, As Pontes, e toda a zona da Terra Chá. Na súa maioría trátase de poetas que comparten intereses temáticos e creativos en colectivos como a Nova Poesía Guitirica, Moraima -nacido en Fene a raíz dun curso de escritura da AELG- ou In nave civitas/Urbano Lugrís entre outros.

Son Mariola Hermida, Loreto de Castro, Teresa Ramiro, Alberte Momán, Luís Mazás, Antom Laia, Miguel Queipo, Moncho Bouzas, Clara Blanco, Emilia Martínez Fuentes, Pilar Maseda, Branka Villar, María Xosé Lamas, Luz Airado, Raquel Díaz Seijas, José Carlos Ulloa, Sonia Mauriz, Ramiro Vidal Alvarinho, Ánxela Gracián, Maribel Serantes, Esther Val e Asun Blanco, quen compartirán declamacións coas poetas locais Alba Rivera, Ángela Arnosa, Consuelo Picos e Nerea Calvo, xunto co poeta de Moeche Alfonso Venancio.

A sesión terá tamén parte musical, da que se encargarán as irmás Inés e Irene Arroyo Orro, veciñas de Igrexafeita e excepcionais violonchelistas que lle sacarán o máximo partido ás partituras e á acústica do patio interior do Concello. O III Recital de Poesía en Feminino presentarao Ana B. Gundín, titular da área de Igualdade, e Antón Tenreiro, coñecido no mundo poético como Antón de Guizán membro da NPG Nova Poesia Guitirica.

Falar galego en Galicia


Mario Paz González.-

Levo vinte anos vivindo fóra de Galicia e sempre falo aos meus fillos en galego (de xeito parecido comezan moitas terapias de grupo no cine americano e este texto, se cadra, tamén o é). Sei que hai máis coma min e non me parece estraño. Pero tamén moitos menos. Meu pai faláballes a miúdo na nosa lingua e chamáballe a atención que os nenos o entenderán e o traduciran ou, mesmo, que quixeran ver na tele o Xabarín Club. Para eles era “o avó”, mentres que o de Castelá é “el abuelo”, sen conflitos. Malia todo isto, chamoume a atención que, hai uns días, nas redes, a raíz dunha entrevista a Luis Tosar en La Voz de Galicia, se destacase como algo excepcional o feito de que este grandísimo actor tamén lle fale aos seus pequenos en galego vivindo en Madrid. Na miña inxenuidade, sorprendeume que os internautas louvasen algo que debería ser o normal. Quero dicir que, nunha época na que o plurilingüismo é un valor en alza (mesmo, por suposto, a aprendizaxe de linguas foráneas) o natural tería que ser que, posuíndo máis dun idioma na casa, este se ensinase tamén aos nenos prioritariamente. Nesta liña de pensamento tan lóxica, a entrevista a Luis Tosar revela, xa que logo, que, ademais de ser un gran actor, é tamén unha persoa sensata, que se rixe por isto que a un parécelle de sentido común.

Por desgraza, a mira experiencia dime que a cousa non é tan doada. Hai anos pregunteille a un pequeno en Compostela por que non falaba galego e contestoume dicindo que xa o falaba na escola. A resposta producíume arrepío tendo en conta a situación do galego no ensino. Moitos dos comentarios dos internautas á entrevista de Tosar confirmáronme agora estes medos. Tamén outra nova lida neses mesmos días na prensa dixital. A historia dun neno coruñés que se laia no seu vídeo blog de que á xente lle resulte estraño que, vivindo en Galicia, se comunique sempre en galego. Como o mesmo neno di, non deixa de ser rechamante que, aínda hoxe exista ese desprezo e esa vergoña pola lingua propia. Como comenta algún internauta, non é difícil comprobar, en calquera parque das vilas ou cidades galegas, como os pais falan só en castelán aos pequenos, se cadra, sen decatarse de que o castelán está, mesmo na Galicia, por todas partes e que a lingua que precisa dun reforzo cada vez maior e máis urxente é o galego. Artai, este neno da Coruña, denuncia a hipocresía que ve ao seu redor: “Coñezo a moitos nenos e nenas que teñen pais profesores e políticos e din que defenden o galego e logo aos seus fillos fálanlles en castellano”.

Todo isto lembroume un poema de Bertolt Brecht (sempre Brecht) titulado “1940” e que fai referencia ao momento da súa vida no que vivía en Copenhague, despois de percorrer media Europa fuxindo, desde o ano 33 que deixara a Alemaña. Agora os nazis estaban a piques de invadir Dinamarca e tocaba partir de novo coa familia. Nel di que o seu fillo pequeno lle pregunta se, nese mundo en descomposición, ten sentido estudar matemáticas, francés ou historia. A el gustaríalle dicir que non, que para que, pero remata o poema cunha mensaxe esperanzadora pregándolle que si, que estude matemáticas, francés ou historia, se cadra, intúe un, como modesto lector, porque iso fará o mundo máis habitable. Cando a xente me di que ensinar galego aos meus fillos non serve para nada e que é unha perda de tempo, eu respondo como Brecht, que si, que aprendan inglés, alemán ou o que lles pete, pero que tamén aprendan galego porque tamén é, xunto co castelán, o seu idioma materno. Como dixo estes días na rede o poeta Xesús Rábade Paredes e que se podería aplicar á lingua como un dos nosos “afectos” máis prezados: “Hai quen pensa que naceu xa aprendido. Será na vida, seguro, un descastado, un egoísta que non medrou por dentro e que se encosca sobre as súas células. Vexetal necrosado. Un seixo contra o mundo. Túzaro e fosco, fuxirá sempre das mans que acariñan, alfares que modelan os afectos, ese colchón da sociabilidade”.

11 de set. de 2019

Día da Cultura Chairega


Redacción.-

Como cada mes de setembro, e dende vai xa para quice anos, o Instituto de Estudos Chairegos-IESCHA, organiza un acto -incluído dentro do convenio suscrito coa Deputación de Lugo- que, coa denominación xenérica de Día da Cultura Chairega, pretende lembrar ao noso gran poeta MANUEL MARÍA, do que se cumpliron, o pasado día 8 de setembro, 15 anos do seu falecemento.
Dende a primeira edición, teñen pasado grupos e cantantes tan senlleiros como Milladoiro, A Quenlla, Vichelocrego, Xarín, Buxos Verdes, Uxía, Os D’Abaixo, A Banda de Musica de Vilalba, A Coral Polifónica Vilalbesa, A Banda da Loba, Os D’Abaixo; proxectado películas coma a do chairego Jorge Coira, “18 Comidas”; realizado recitais poéticos ou dramatizacións de obras de Manuel María; conferencias, mesas redondas, presentacións de libros, etc. Este ano 2019, o Iescha invita a todas as persoas interesadas a asistir ao acto de homenaxe que terá lugar o venres, día 20 de setembro de 2019, ás 20:30 horas, no Auditorio Municipal de Vilalba, con entrada totalmente libre e gratuíta.
O PROGRAMA deste ano está conformado da seguinte maneira: -GRAN CONCERTO MUSICAL A CARGO DO GRUPO
HABELAS HAINAS
-ENTREGA DA PLACA DE SOCIO DE HONRA DO IESCHA A
ALFONSO BLANCO TORRADO

Habelas Hainas nace en Compostela en 2010, tempo no que se cruzan os camiños destas catro músicas de raíz galegas, crebacabezas musical e persoal que se sinte parte dunha tradición longa, viva e en permanente transformación, da que xorde a natural necesidade de se expresar, dende unha ollada feminista e social, explorando outras músicas, experimentando coa tradición e creando un son propio, fresco, enérxico e orixinal nunha intensa traxectoria como músicas ao vivo.
- Nominadas polo seu primeiro álbum Livres e Loucas aos Premios da Música Independente na categoría “Mellor Álbum en Galego”.
- Participan no proxecto “Músicas galegas ilustradas” (Laura Romero).
- Estrea do Videoclip “Marmuradoras” realizado por Antía Ameixeiras.
- Participan no proxecto “A música ibérica a gostar dela propia” dirixido por Tiago Pereira.
DÍADACULTURACHAIREGA-NOXVCABODANODOPASAMENTODEMANUELMARÍA.Venres,20desetembrode2019–20:30h.- AuditorioMunicipaldeVilalba
Vilalba,10desetembrode2019. ArturoGómezMato,secretariodoIESCHA
ALFONSO BLANCO TORRADO
NOTA INFORMATIVA
http://estudoschairegos.wix.com/iescha estudoschairegos@gmail.com

DISCOGRAFÍA
-Livres e Loucas (2017)
-Irmandiñas. Músicas en pé de festa. Habelas Hainas/Sacha na Horta/Oíma/The Teta’s Van (2017).
MÚSICAS
Sandra Tamayo: acordeón, gaita, pandeiro cadrado... Patricia Gamallo: gaita, pandeiro cadrado, guitarra... Arantza Alfaia: tamboril, caixón peruano,ferriños,derbuka... Jara Ortiz: voz, bombo, pandeireta, crótalos árabes...
Teñen participado en máis de trescentos concertos ao vivo ao longo de todo o país e noutras latitudes.
xuventude.
Na Asemblea Xeral do Iescha do presente ano 2019, aprobouse por unanimidade outorgar o nomeamento de Socio de Honra do Iescha a Alfonso Blanco Torrado, polo seu inquebrantable compromiso na defensa da cultura galega en xeral e chairega en particular; polo seu desinteresado traballo a prol da convivencia veciñal e da xustiza social; pola súa participación na organización de innumerables eventos de carácter literario, musical, artístico, así como pola súa entrega e axuda aos demais, especialmente á
ALFONSO BLANCO TORRADO.- Crego, mestre, dinamizador cultural, escritor, conferenciante.
Naceu o 15 de marzo de 1950 en Montevideo.
Realizou estudios eclesiásticos en Santiago e na Universidade Pontificia de Salamanca, realizando nas dúas cidades un importante labor no movemento estudiantil. Desde 1976 trabarlla en varias parroquias de Guitiriz, tanto no campo social como cultural. É profesor do IES de Guitiriz. No traballo social temos que salientar a recuperación do Santuario de Nosa Señora de Bascuas, hoxe convertido en Museo de Arte e Cultura Relixiosa Popular. Dirixe as publicacións de Xermolos "Guieiros", Cadernos e Revista Xermolos.
Escribiu en varias publicacións como "Irimia", "Encrucillada", etc. En 1976 funda a Asociación Cultural de Guitiriz, chamada despois "Xermolos", con moitas actividades culturais: Escola de Música Tradicional, Escola de Canteiros, Revista Xermolos, Cadernos de temas etnográficos, Biblioteca Pública Xermolos, etc. Foi o fundador do Festival de Pardiñas (1980), da Feira e Festa da Música e da Arte e dos premios de Guitiriz de Pintura, Escultura e Fotografía. Coordina a Asociación Sociocultural X. M. Díaz Castro e a Fundación Manuel María da Terra Cha.
Recibiu o premio Anxel Fole de Ensaio pola obra Xosé María Castro. A Ascensión dun poeta, o premio IAR de Folclore, o Moncho Valcárcel "pola promoción da Terra" e o Premio Solidariedade 2002, entre outros.
Foi nomeado Fillo Adoptivo de Guitiriz no ano 2018 en recoñecemento ao seu inconmensurable labor de servizo á comunidade.

Propostas do IESCHA ao Concello


Redacción.-

Recentemente o Instituto de Estudos Chairegos remitiu á Sra. Alcaldesa do Concello de Vilalba o seguinte escrito:

"En reunión de Xunta Directiva do Instituto de Estudos Chairegos-IESCHA celebrada o pasado día 7 de agosto do ano en curso, acordouse, entre outros asuntos, remitir escrito a ese Concello cos seguintes puntos:

1.- Manifestarlle os nosos parabéns a Vde., como nova Alcaldesa de Vilalba, así como ao seu Equipo de Goberno, desexando que nesta nova etapa que comeza podamos manter unha recíproca e cordial colaboración entre as dúas entidades.

2.- Pregarlle que propoña á Corporación Municipal que Vde. preside a adopción dos seguintes acordos ralacionados con dúas emblemáticas personalidades chairegas imprescindibles no ámbito literario galego:

-Dar o nome de MANUEL MARÍA á Casa da Cultura de Vilalba (proposta xa realizada noutras ocasións).

- Dar o nome de AGUSTÍN FERNÁNDEZ PAZ á Biblioteca Pública Municipal de Vilalba."

Xabaríns en Lugo


Redacción.-

A Plataforma pola Convivencia Ética coa Fauna Silvestre(CON-ÉTICA) parabenízase polas declaracións do concelleiro responsábel da Área de Desenvolvemento Sustentábel do Concello de Lugo, Álvaro Santos, en relación coa presenza de exemplares de xabarín en zonas da contorna urbana da cidade luguesa.
Segundo veñen de recoller distintos medios de comunicación, Álvaro Santos sinalou a presión cinexética exercida sobre as poboacións de xabarín como o principal motivo polo que os animais se poden achegar ás zonas urbanas.
A opinión do responsábel municipal de Desenvolvemento Sustentábel do consistorio lugués coincide substancialmente coa que vén expresando, desde a súa creación, a Plataforma pola Convivencia Ética, conformada por persoas a título individual e por asociacións animalistas e ecoloxistas entre as que se contan ADEGA, EQUO-Lugo, Lugo Animal Save, Anonymous For The Voiceless ou Ridimoas.
CON-ÉTICA considera as palabras de Santos “dun sentido común ben pouco habitual” nun responsábel público e fai, unha vez máis, un chamado público á sensatez, a cordura, o rigor e a responsabilidade a todos os axentes institucionais, políticos e sociais en todo o relacionado coa convivencia humana coa fauna silvestre, fuxindo de mensaxes e análises superficiais, sensacionalistas e, mesmo ás veces, “case-apocalípticas”. Urxe mudar o discurso público de estigmatización dos xabaríns, presentados as máis das veces case como unha praga bíblica, por outro que estea centrado nunha análise rigorosa, e científica, sobre a situación das poboacións de súidos no territorio, continuada no tempo, informativamente transparente, participada por expertos e non sometida a determinados intereses ou presións de parte.
Desde a súa constitución, en 2018, a Plataforma pola Convivencia Ética vén dedicando gran parte dos seus esforzos a solicitar de todas as administracións implicadas toda a información científica dispoñíbel sobre a situación das poboacións de xabaríns en Galiza e o seguimento que se faga das mesmas, sinaladamente sobre a existencia de estudos que avalen, con datos, a existencia real dunha “sobre-poboación” á que tantas veces se alude. A ausencia de resposta a estas constantes solicitudes de información leva a concluír que non existen tales estudos, ao menos dunha forma sistemática.
Dos poucos datos obtidos pola Plataforma, como os facilitados pola Xefatura Provincial de Tráfico, si se ten constatado xa, tal e como denunciamos publicamente hai uns meses, que durante 2018 os accidentes de tráfico con intervención de xabaríns na contorna de Lugo se duplicaron coincidindo coa temporada de caza, sendo incluso máis do dobre nos días hábiles para cazar.
CON-ÉTICA demanda unha vez máis das administracións, nomeadamente da Xunta de Galiza en Lugo, unha estratexia global, participada, rigorosa e concibida en base á realización de estudos previos sobre a presenza do xabarín e que aposte por medidas disuasorias e non letais para cos animais frente a ocorrencias, improvisacións e medidas irresponsábeis mesmo para a seguridade cidadá.

El Brujo en Ribadeo


Redacción.-

O domingo 29 de setembro, ás 20:00 horas, Rafael Álvarez "El Brujo" presentará no Auditorio de Ribadeo a súa obra "Autobiografía de un yogui". Dela ten dito:

"Creo que foi Gandhi o que dixo algo así: «Observei que a vida persiste no medio da destrución. Por tanto debe de haber unha lei superior á lei da destrución. Unicamente baixo esa lei a sociedade pode ser intelixible e a vida digna de ser vivida».

A grandeza da ciencia sería indagar acerca desa lei, e a da arte celebrala e reflectila.

Pero eu somentos son un cómico e un comediante! En todos os meus espectáculos a risa é un factor dominante..., que rima con comediante... Vostedes xa me coñecen e aínda así busco sempre un intre onde o alento suba cara o dominio sacro da poesía. Shakespeare era tamén comediante pero ademais un poeta. Por iso é que eu invoco sempre o seu espírito para que lle dé ás ás miñas risas e fágaas máis transparentes.

Nesta ocasión necesitareino dunha maneira moi especial. Témo que vostedes terán que facer tamén un esforzo especial para acompañarme. Podería eu voar sen vostedes?

Quen era Yogananda? Un home grande!

Trouxo o ioga a occidente (non só o ioga físico) se non tamén a «racha ioga», que así é como na India chaman: a meditación, a ciencia da realización do ser. E que significa isto? El explícao de maneira clara e sinxela coa súa poderosa palabra pero aínda máis coa súa vida. De aí a fascinación que exerceu na miña esta autobiografía. Para que vostedes o coñezan, fago eu este espectáculo.

Espero que a sabedoría, o encanto, a maxia, a luz e o amor deste relato inspire e acompañe. Permítanme rematar coas palabras dun gran poeta a quen Yogananda admiraba: Rabindranath Tagore. A modo de dedicatoria: «Onde a mente áchase sen temor e a cabeza érguese alta...» «onde o coñecemento é libre onde o mundo non se rompeu en pedazos por estreitas paredes domésticas onde as palabras veñen do fondo da verdade [...] nese ceo de liberdade oh Pai meu! permíteme que a miña patria se erga. Nada máis. Nada máis.»

Preséntolles a Paramahansa Yogananda, un gran mestre. o meu mestre!"

Entradas numeradas aquí:
https://entradas.ataquilla.com/ventaentradas/es/240__auditorio-municipal-de-ribadeo

Punto e seguido

Redacción.-

A exposición ‘Punto e seguido. A vida despois do dano cerebral adquirido’, coa que a Federación Galega de Dano Cerebral (FEGADACE) e as súas asociacións achegan, a través da fotografía, unha aproximación ao día a día desta discapacidade, inaugúrase o vindeiro mércores en Lugo.

FEGADACE e ADACE Lugo (Asociación de Dano Cerebral de Lugo) convidan a asistir ao acto, no que van intervir a presidenta da entidade, Ángeles Rozas, e algunhas das persoas retratadas nas imaxes e no vídeo que as compaña. As persoas asistentes tamén terán a oportunidade de asistir á estrea deste vídeo, que foi tomado en ADACE Lugo e que complementa o principal da campaña Punto e seguido.

A mostra vai estar exposta en La Ferretería ata o 1 de outubro. Poderá verse en horario de 17:00 a 20:00 de luns a venres, e os sábados de 10:00 a 14:00.

Proxecto 'Punto e seguido'

A colección de imaxes, do fotógrafo compostelán Aigi Boga, realizouse nas cinco asociacións membro da Federación. Están protagonizadas polas persoas usuarias de ADACECO, ADACE Lugo, Alento, Renacer e Sarela, que amosan a súa vida cotiá, as actividades que desenvolven, os ratos de descanso, a convivencia... en definitiva, a vida despois do “punto e seguido” que constitúen un ictus, un accidente, ou calquera outra das causas do dano cerebral adquirido.

Tanto as imaxes como o vídeo foron elaborados co apoio da Deputación da Coruña. Para a organización da exposición contouse, ademais, coa colaboración da Fundación La Caixa.

Acto aberto

O acto é completamente aberto. Do mesmo modo, está permitida a toma de imaxes e gravación en audio e vídeo dos contidos do mesmo.

FEGADACE constituíuse en 2007 polas cinco asociacións de dano cerebral que traballan en Galicia: ADACECO na Coruña, ADACE en Lugo, Alento en Vigo, Renacer en Ourense e Sarela en Santiago. O seu obxectivo é contar cunha plataforma común de interlocución, coordinación e divulgación das necesidades do colectivo de persoas con dano cerebral adquirido.


Hora: 19:00
Lugar: La Ferretería (Rúa San Froilán, 11, baixo - Lugo)
Asunto: Inauguración de exposición ‘Punto e seguido’

Memoria da Chaira enteira

Redacción.-

Como é tradicional o pasado 8 de setembro, cabodano de Manuel María celebráronse os actos na súa memoria:

Ás 15 horas, xantar de irmandade no Restaurante Río Ladra

Ás 17, recital de poesía e música en Penas de Rodas

As 18 horas: levouse unha rosa ao cemiterio de Outeiro de Rei, acompañada de versos e comunicados. Benvida co CANTO DA IRMANDADE: O CARRO de Manuel María e Mero.

Ás 18,30 Entrega da Navalla de Manuel María a XOSÉ ESTÉVEZ por Branca Rodríguez, presenta Paco Martín e lámina de Eneko.

Entrega da Navalla de Manuel María, a xeito póstumo, a XAVIER P. DOCAMPO, na man da súa familia, fai a presentación Mero Iglesias e lámina de Suso Cobeiro.

Bocado comunal e grolo de Irmandade proveito de ben e futuro

Recital de poesía e música…

Organizou a Irmandade Manuel María e a Asociación Xermolos.