Conferencia de Antón Baamonde en Vilalba

Redacción

O Instituto de Estudios Chairegos de Vilalba, culmina con outra conferencia os actos organizados no mes das Letras Galegas: primeiro foi Pilar García Negro, quen nos falou do idioma galego; logo, unha a viaxe a Santiago de Compostela para asistir á manifestación convocada pola Mesa pola Normalización Lingüística en defensa do noso idioma; tamén deseñamos unhas camisetas co lema “Fala galego, non sexas pailán”.

A referida conferencia, terá lugar o vindeiro venres, día 29 de maio, ás 20.30 horas no Salón de Actos do Centro Cultural e Recreativo de Vilalba. Será impartida polo escritor e filósofo vilalbés, ANTÓN BAAMONDE e levará por título "RAMÓN PIÑEIRO NA GALICIA DO SÉCULO XX". A presentación correrá a cargo de Bernardo García Cendán.

Antón Baamonde (Vilalba, 1959) é profesor de filosofía e ensaísta. Publicou o seu primeiro libro, A favor da esperanza, en 1987, ao que seguiron O marxismo e as linguaxes, Sobre o tempo e outros desatinos, A rosa sen porqué e o libro de entrevistas, La reinvención de España; ademais de participar no libro colectivo Catro ensaios sobre a esquerda nacionalista. Animou a revista e o foro "Luces de Galicia" e colaborou na sección de opinión de La Voz de Galicia. Actualmente colabora co diario El Pais, na edición de Galicia, e con avozdevilalba.com. Está considerado como unha das voces máis orixinais e independentes da Galicia contemporánea.


26/05/2009

0 comentários :

Danos a túa opinión