Milleiros de persoas enchen as rúas santiaguesas en defensa do galego


Redacción

Unhas cincuenta mil persoas, para a convocante Mesa pola Normalización lingüística, vinte mil para a axencia Europa Press, encheron as rúas de Compostela na maior manifestación en defensa do galego rexistrada na historia do noso país.

"Sempre en Galiza, sempre en galego", "Aínda que se molle, o galego non encolle" e " Temos lingua, temos dereito" foron algunhas das consignas coreadas polos manifestantes baixo unha intensa chuvia. Persoeiros da nosa cultura como Avelino Pousa Antelo, Manuel Rivas ou Antón Reixa estiveron presentes nun acto no que Carlos Caión, presidente da MNL, leu un manifesto no que reclamou do PP que "tome nota"da reacción social en favor da língua, convidando ao presidente da Xunta a apropiarse do idioma e converterse no seu primeiro defensor.

A protesta, que se desenvolveu sen incidente ningún, congregou moitos máis manifestantes que a convocada o pasado 8 de febreiro por diversas organizacións contrarias ao galego, entre elas algunhas de ultradereita, e á que asistiron diversos dirixentes populares, ausentes neste 17 de maio.

Imaxe: xornal.com

17 de maio de 2009

0 comentários :

Danos a túa opinión