O Consello da Cultura e o PEN Clube de Galicia editarán a obra de González Carbalho

Redacción

O Consello da Cultura Galega e o Centro P.E.N. de Galicia coeditarán unha antoloxía bilingüe dos poemas e as prosas de Jose González Carbalho (1899-1958), importante e esquencido escritor arxentino fillo de emigrantes galegos, que falaba de Galicia como “mi patria anterior”. A antoloxía incluirá unha biobibliografía, escrita por Antonio Requeni, unha escolla dos seus poemas, artigos que publicou logo da súa única viaxe a Galicia en 1955, un discurso sobre o idioma galego e testemuñas de diferentes escritores. Irá ilustrada con fotografías.

José González Carbalho naceu en Bos Aires, quedou orfo de nai aos dous anos e tivo unha saúde precaria. Na súa obra os temas de referencia son a soedade, o amor, a perplexidade ante o fluir do tempo e os recordos da infancia. Foi admirador de Garcilaso de la Vega, Rubén Darío e Juan Ramón Jiménez e tivo gran amizade con Pablo Neruda, Federico García Lorca e Rafael Alberti e unha intensa relación coa colectividade galega (Rodolfo Prada, Luís Seoane, Arturo Cuadrado ou Lorenzo Varela). Publicou en Chile o primeiro libro sobre Lorca, logo do fusilamento do poeta. Entre as súas obras cómpre citar: “Tiempo de amor perdido”, “Solo en el tiempo”, “Libro de canciones para Rosalía de Castro” ou “El río que no vuelve”.

Da súa obra falou o pasado luns 18 de maio no CCG Antonio Requeni, xornalista, escritor e membro da Academia Argentina de Letras, que foi presentado polo poeta e presidente do PEN de Galicia, Luís González Tosar. Antonio Requeni titulou a súa conferencia “González Carbalho, destacado poeta arxentino de estirpe galega” e confesouse discípulo deste escritor autodidacta, fillo de emigrantes galegos de A Ramallosa (Pontevedra), devoto admirador de Rosalía de Castro e que foi tamén xornalista, crítico literario, autor teatral e profesor de literatura.

Antonio Requeni (Bos Aires, 1930) levou a cabo unha importante actividade como xornalista no diario “La Prensa” desde 1958 ata 1994, en que se xubilou como secretario de redacción. Colaborou tamén noutros medios e dirixiu a revista “Italpress”. É crítico bibliográfico do diario “La Nación”. Como escritor publicou dez libros de poemas, un libro de cotnos para nenos, un volume de crónicas de viaxe e o “Cronicón de las peñas de Buenos Aires”, que mereceu o I Premio Municipal de Ensaio. Foi distinguuido asemade co I Premio Municipal de Poesía polo seu libro “Línea de sombra”. É membro de número da Academia Argentina de Letras e coordina a comisión de publicacións na Academia Nacional de Periodismo.

20/05/2009

0 comentários :

Danos a túa opinión