A RAG e as políticas lingüísticas


Fermín Bouza

A Real Academia Galega fai unha crítica preventiva ás medidas anunciadas por Feijoo para anular o decreto regulador da normalización lingüística (agora fala dun consenso, xa veremos con quen e como se debate, e se está presente algunha perspectiva cientìfica seria). É bo que a Real Academia se implíque a fondo neste tema, que non é calquera tema, senón o tema sobre o que está a virar toda a angustia da desaparición da Galicia histórica. Eses factores psicosociais de fondo impulsan o problema da lingua a un primeiro plano, e esa é a razón de que a lingua sexa algo máis que a lingua da mesma forma que o Barça é máis ca un club.

As cuestións relativas ás linguas marxinadas durante séculos só se poden resolver con políticas discriminatorias de tipo positivo. E son ese tipo de políticas cientificamente concibidas as que teñen o respaldo da comunidade científica internacional e da comunidade política orientada á salvación lingüística. O decreto regulatorio que agora se derroga ou se quere derrogar non chegaba nin a ser discriminatorio, cientificamente falando. Optaba por unha política de igualdade entre ambas as linguas que non era a política cientificamente adecuada, pero si era politicamente correcta. De aí non pasaba o decreto de regulación da lei Fraga. Ben, pois tamén se quere acabar con iso. A RAG debería falar desde posicións científicas, e facer ver ao goberno galego que se o decreto non era axeitado, moito menos axeitada é a súa derrogación, e que as politicas realmente defensivas e conservacionistas han pasar por claras e rotundas políticas de discriminación positiva cara á nosa lingua, que son as políticas democráticas de verdade, non aquelas que se basean nunha igualdade imposible e que van encamiñadas a unha morte segura da nosa lingua.

17/05/2009

0 comentários :

Danos a túa opinión