Toni López, o judoka chairego

Redacción
Logo dos éxitos do deporte chairego xa comentados neste medio, relativos a fútbol, Tae Kwon Do ou atletismo, vense a sumar agora outro tamén nas artes marciais, neste caso no judo, pois o judoka vilalbés Toni López proclamouse recentemente campión de España de invidentes e deficientes visuais, en menos de 66 quilos, no campionato de Judo celebrado en Tarragona.

Trátase, polo tanto, dun deportista de élite oriundo da nosa vila, tal como Gustavo Nieves Campello quen, coma fondista, forma parte do Real Clube Celta de Atletismo. Por iso, e pola súa victoria, as homenaxes a Toni López sucedéronse estes días. Por exemplo, foi recibido na Deputación Provincial e tamén se fixo un acto de homenaxe, hai dúas semanas, polo Rácing Vilalbés no seu partido ante o As Pontes.

O pasado xoves Toni López recibiu de mans do alcalde de Vilalba, Xerardo Criado, unha réplica do Torreón de Andrade en recoñecemento pola súa traxectoria deportiva e humana. O acto de homenaxe enmarcouse dentro da presentación da segunda xornada da liga galega de loitas olímpicas nas categorías prebenxamín, benxamín e alevín, que se celebrará hoxe sábado, e xa por segunda vez, no Polideportivo Municipal de Vilalba.

Un total de 197 nenos e nenas de entre seis e 11 anos, procedentes de 11 clubs das provincias de Lugo, A Coruña e Pontevedra, daranse cita nesta convocatoria. A competición dará comezo ás 11.00 horas e terminará ao redor das 13.00. Os participantes distribuiranse en cinco tapices, nos que haberá combates simultáneos entre todos os equipos. A representación lucense correu a cargo do Clube de Loita Vilalba, que terminou en cuarto lugar na primeira xornada desta Liga, celebrada en Baiona.

24 de maio de 2009

0 comentários :

Danos a túa opinión