O Escritor na súa Terra: Agustín Fernández Paz

Redacción

A Asociación de Escritores en Língua Galega, en colaboración do Centro Español de Dereitos Reprográficos, a Consellaría de Cultura e o Concello de Vilalba, celebrou en Vilalba a homenaxe "O Escritor na súa Terra", adicada este ano ao autor vilalbés Agustín Fernández Paz, recente Premio Nacional de Literatura Infantil e Xuvenil.

Os actos deron comezo ás doce do mediodía, coa inauguración do Parque Agustín Fernández Paz no barrio d´As Fontiñas, á que acudiron numerosas persoas, así como persoeiros do mundo da cultura como Rosa Aneiros, Xosé M. Perozo, Margarita Ledo, Marica Campo, Pilar García Negro, Paco Martín, Xosé Olveira "Pico", Marilar Aleixandre ou Iolanda Castaño.

Na descuberta do monolito conmemorativo, o presidente da AELG, Cesáreo Sánchez Iglesias, aludiu a Vilalba como "lugar íntimo e cálido" na biografía de Fernández Paz, reclamando que se pode ser universal dende as propias raíces. Destacou asimesmo o seu compromiso coa língua e coa cultura do país, así como coa escola galega e a renovación pedagóxica, alén da súa "sensibilidade exquisita", que convirteu ás mulleres e ás nenas en protagonistas da súa literatura, ou a aposta do autor pola visibilización da literatura infantil e xuvenil.

Agustín Fernández Paz agradeceu o que considerou como "tres agasallos": un penedo como símbolo de pertenza, un espazo público "que os meus pés de neno percorreron unha e outra vez" e unha abidueira, que "vai unida á paisaxe da miña infancia". Dixo, asemade, que "os fíos do que conto teñen orixe na miña infancia en Vilalba, xa que a literatura escríbese cos fíos da vida". Infancia e literatura conflúen para o autor chairego "nunha soa palabra: Vilalba".

Galería fotográfica dos actos nesta ligazón.

20/06/2009

0 comentários :

Danos a túa opinión