O mundo do libro, contra a supresión do servizo de cultura da TVG


Redacción

As asociacións de escritores, libreiros e editores emitiron un comunicado para protestar contra a decisión da Xunta de retirar o servizo de cultura da canle pública, creado no 2005. Quéixanse especialmente da supresión do único programa divulgativo sobre literatura e lémbranlle ao Partido Popular que nos estatutos da empresa está escrito que "a programación debe estar inspirada na promoción e difusión da cultura e lingua galega".

Nun comunicado emitido pola Asociación de Escritores en Lingua Galega, a Asociación Galega de Editores e a Federación de Libreiros de Galicia, explicítase o rexeitamento do mundo do libro galego pola recente decisión da Xunta de suprimir o servizo de cultura da CRTVG. Din que sinten unha "fonda preocupación" pola perda dun servizo creado en 2005, que aglutinaba todos os programas divulgativos da cadea.

"A inmediata suspensión do único programa da televisión pública galega centrado na divulgación e coñecemento da literatura do noso país énchenos de incerteza, así como a consecuente falta de visibilización dos escritores e escritoras en lingua galega e das novidades da produción editorial que poden ser atopadas nas librarías galegas", din exactamente no comunicado.

Están preocupados especialmente pola divulgación da literatura na canle pública: "Esta primeira toma de decisión con respecto ao programa sobre libros da TVG prodúcenos moita preocupación con respecto ao futuro da programación cultural da televisión e da radio públicas". Lamentan tamén a "celeridade" coa que o galego está a ser defenestrado polo equipo de Feijóo dende outras áreas do seu goberno e recódanlle que nos estatutos da empresa está fixado que "a programación debe de estar inspirada na promoción e difusión da cultura e lingua galega".

22/06/2009

0 comentários :

Danos a túa opinión