Talleres de lecer no CGAC

Redacción

Chega o verán e o CGAC invítanos a participar nos talleres de lecer que organiza nos meses de xullo e agosto. Os máis pequenos poderán achegarse á danza creativa mirando o cosmos da man de Marta Pereira, mirar o parque de Bonaval con ollos novos para facer un caderno de artista con María Meijide e Xaquín Penas, escudriñar o que hai tras un videoxogo con Silvia López ou o que agachan os obxectos con Marián Presno, e se ademais te gusta a arquitectura poderás somerxerte na lenda da illa dos lugares imaxinarios con Ruth Varela.

Os talleres son unha proposta para a experimentación artística e a aprendizaxe coa que poder xogar, coñecer, comunicarse e crear ao longo de catro días en torno a diferentes linguaxes, soportes, técnicas e conceptos da arte máis actual.

Talleres para os máis pequenos
Movementos estelares
Dirixido por Marta Pereira
Para nenos e nenas entre 4 e 6 anos
7-8 de xullo / 11:00-13:00 h / 20 prazas
9-10 de xullo / 11:00-13:00 h / 20 prazas
O cosmos? Que é iso? Mirar ao ceo e falar do que se ve e do que está só na imaxinación, das cores, das estrelas... Marta Pereira convida os pequenos a mirar as cousas sinxelas que están ao redor e a xogar con elas utilizando a linguaxe corporal. Poderás descubrir cómo se poden poñer en movemento as cores e as estrelas ou debuxar os mapas dos camiños polo espazo. A exposición do artista mexicano Sebastián Romo será o punto de partida para este taller de danza creativa.

Camiños no ar
Dirixido por Marta Pereira
Para nenos e nenas entre 4 e 6 anos
4-5 de agosto / 11:00-13:00 h / 20 prazas
6-7 de agosto / 11:00-13:00 h / 20 prazas
A vida é movemento pero, ás veces, pasa desapercibido. Durante o día a xente vai dun lugar a outro, camiña, danza, senta, cruza as pernas ou levanta as mans... e así ata a noite. Ao durmir todo parece estar quedo, mais non é así, o movemento continúa no corpo e no espacio. As estrelas ou a Terra seguen o seu camiño. Neste taller a danza será o vehículo para facer camiños no ar.

Talleres para nenos e nenas
A natureza das cousas
Dirixido por Marián Presno
Para nenos e nenas entre 7 e 9 anos
14-17 xullo / 11:00-13:00 h / 20 prazas
Os obxectos comparten o noso espazo e forman parte da vida cotiá. Existen cando os ollos reparan neles, cando os dedos os tocan... pero cando nos acostumamos a eles comezan a desaparecer. Xogando co título da exposición A vontade das cousas, Marián Presno propón diferentes actividades para descubrir cómo algúns obxectos se orixinan e por que, cómo se transforman e cómo nos relacionamos con eles.

XogArt! Creamos xogos con arte
Dirixido por Silvia López Gómez
Para nenos e nenas entre 10 e 12 anos
21-24 xullo / 11:00-13:00 h / 20 prazas
Que traballo hai detrás dun videoxogo? Que cousas hai que ter en conta para deseñar un videoxogo? Ideas, diferentes tipos de personaxes, interactividade, creación de escenarios, xogos, regras, arte drámatica e moita imaxinación.
Este taller quere ser unha achega aos segredos que se esconden detrás da creación dun videoxogo. As obras do artista mexicano Sebastián Romo serán os elementos a partir dos que traballar.

A illa dos lugares imaxinarios
Dirixido por Ruth Varela
Para nenos e nenas entre 8 e 11 anos
11-14 agosto / 11:00-13:00 h /20 prazas
No século pasado, o fabuloso dirixible Graf Zeppelin realizaba unha expedición científica a Compostela na procura das ruínas dunha torre circular de pedra.
Alí supúñase que estaban agochados os mapas e planos da Illa dos lugares imaxinarios. Neste taller, da man da arquitecta Ruth Varela, poderás reconstruír esa illa despregable e transformable, chea de microarquitecturas e de paso, descubrir a natureza da arquitectura e a arquitectura da natureza.

Talleres para mozos e mozas
Bitácora Bonaval
Dirixido por María Meijide e Xaquín Penas Patiño
A partir de 13 anos
28-31 de xullo / 11:30-13:30 h / 20 prazas
Este taller invita a facer un caderno de artista no que reflexar a experiencia de cada un co parque de San Domingos de Bonaval, un lugar que une a memoria da cidade e o lecer. Para facer o caderno de artista contaremos coa artista María Meijide, quen entre as súas obras conta con numerosos cadernos de viaxe e o profesor de ciencias Xaquín Penas, quen axudará a coñecer moitos dos segredos do parque. Así, o caderno recollerá a experiencia do que se ve na natureza pero tamén do que se agocha.
Este taller é froito da colaboración entre o CGAC e o Museo do Pobo Galego.

Coordinación: Gema Baños, Cristina Trigo, Virgina Villar.

24 de xuño de 2009

0 comentários :

Danos a túa opinión