Apertura dos Xardíns da Deputación

Redacción

Coa entrada do novo goberno na Deputación de Lugo, desde a súa Área de Cultura púxose en marcha hai tres veráns o programa Cultura Aberta nos Xardíns da Deputación, unha iniciativa que pretendía ser unha alternativa cultural e de ocio para as e os lucenses logo de observar a escasa oferta cultural do verán en Lugo. Dalgún modo, foi o símbolo de apertura á sociedade da Deputación, abrindo para elo o acceso á cidadanía a un lugar privilexiado, que sempre estivo pechado a cal e canto para este tipo de actividades, coma son os xardíns interiores da Deputación. Con Cultura Aberta nos Xardíns da Deputación conseguiu ademais racharse outros tópicos, como a inexistencia de actividades culturais en Lugo na temporada estival e que en Lugo, polo verán, a xente que queda sen vacacións non acude a este tipo de eventos.

Neste terceiro ano consecutivo que desde a Área de Cultura da Deputación de Lugo se pon en marcha o programa Cultura Aberta nos Xardíns da Deputación puidemos constatar como as diferentes actividades e concertos remataron cun éxito rotundo pola afluencia do público, polo que os concertos e actividades nos xardíns consolidáronse nestes 3 anos como a alternativa cultural do verán lucense.

Ademais do éxito da programación de concertos dos xoves á noitiña, os que se confirmaron como a alternativa de ocio para as familias lucenses no verán foron os Mércores Miúdos. Desde que se puxeron en marcha o ano pasado debido á carencia deste tipo de actividades no verán en Lugo, cada actividade pensada para nenos e nenas que se organiza os mércores de xullo e o primeiro de agosto é un auténtico éxito.

Este ano, ademais, a programación dos xoves de Cultura Aberta foi un rotundo éxito de público (superando as 3000 persoas entre todos os seus espectáculos), xa que, ademais de enchérense até os topes os Xardíns coa estrea do novo espectáculo de Carlos Blanco xunto ao Sérgio Tannus Trío a semana pasada, permitiu que chegasen a Lugo músicas representativas das diferentes culturas do Estado, desde uns Txalapartaris a un autor de canción protesta catalán, pasando pola fusión dos ritmos galegos e balcánicos dos Festicultores e a lingua irmá, a portuguesa, cos angolanos de Katembe Project.

Desde a Área de Cultura da Deputación valórase esta exitosa iniciativa como un exemplo de como cun orzamento axustado aos tempos que corren, pensando e programando as mellores alternativas, se lle pode dar á cidadanía, nenos e nenas e adultos, unha programación cultural de calidade que encha o baleiro de alternativas de ocio cultural no verán lucense.

Por todo isto, agárdase que o vindeiro ano esta programación teña unha continuidade e a poboación lucense non deixe de gozar cos diferentes espectáculos e actividades infantís que a Área de Cultura da Deputación de Lugo ideou realizar no verán hai xa tres anos.

18/08/2010

0 comentários :

Danos a túa opinión