Art Notes e a avangarda da arte galega

Redacción

O sábado 14 de agosto distribúese conxuntamente con El Correo Gallego, o primeiro número de ART NOTES, un suplemento de periodicidade trimestral que naceu coa intención de continuar co proxecto de difusión da cultura e a arte contemporánea que a editorial Anotarte SL mantén coa súa revista ART-NOTES desde fai seis anos.

Nestes anos o seu principal obxectivo foi ofrecer unha lectura crítica e informativa sobre a actualidade artística contemporánea; prestando unha especial atención a aqueles proxectos desenvolvidos desde Galicia, seguindo a traxectoria de artistas galegos (dentro e fóra das nosas fronteiras) e acompañando ás galerías ou os centros de arte do noso contexto.

Durante este tempo, publicouse a revista cada dous meses, e a editorial ten participado nas máis importantes feiras de arte, tanto nacionais como internacionais. Na actualidade, e sempre co ánimo de seguir crecendo neste medio, tense consolidado unha plataforma e recursos web (www.artnotes.info) baixo a estrutura medial de ART NOTES.

Co acordo de colaboración co diario El Correo Gallego, ART NOTES. Edición Prensa, aumenta a súa participación no eido informativo estreando un novo soporte co que agardan responder ás expectativas de todos os seus seguidores. ART NOTES. Edición Prensa nace baixo a intención de continuar coa difusión da cultura e a arte, mantendo o mesmo empeño e ambición dos últimos seis anos, coa certeza de que é necesaria unha información crítica e plural, e co convencemento de que a produción artística realizada desde Galicia sitúase no mesmo nivel competitivo que a arte internacional, razón pola que están dispostos a seguir traballando.

23 de ago. de 2010

0 comentários :

Danos a túa opinión