III Mostra do Traxe Galego e Música Tradicional

Redacción

A Asociación de Gaiteiros Galegos (AGG), organiza xunto co concello de Melide a que será a "III Mostra do Traxe Galego e Música Tradicional". Un evento que durante toda a fin de semana contará con actos na Praza do Convento e no Cantón de San Roque de Melide. Sete artesáns expoñerán os seus instrumentos tradicionais, haberá obradoiros de xoguetes sonoros e enredos musicais, exposicións e actuacións musicais.

Durante as xornadas do 28 e 29 de Agosto, no marco incomparable da Praza do Convento de Melide, sete artesáns de instrumentos musicais cos que contará a mostra, abrirannos unha fiestra aos seus obradoiros amosando instrumentos tradicionais de grande valor artístico e histórico: gaitas e requintas, arpas, percusión e zanfonas ou frautas tradicionais estarán á vista de todas as persoas que se acheguen o sábado e o domingo entre as 11 e as 14h da mañá e as 16.30 e as 21h da tarde. Pero haberá moito máis, xa que se trata dunha festa na que non poden faltar as actuacións en directo, obradoiros, o baile tradicional e a foliada.

No apartado das exposicións, haberá dúas citas importantes: por unha banda, unha exposición de traxes tradicionais de grande valor propiedade de Alberto Golpe, que poderá visitarse na Capela de San Antón, e por outra, unha mostra de instrumentos antigos, vestiario, fotografías e outros obxectos relacionados coa música tradicional nas zonas polas que discorre o Camiño de Santiago. Esta mostra, de Pablo Carpintero, estará visible na Praza do Convento, e leva o título de “A música tradicional galega nos camiños xacobeos”, un lema baixo o cal se quixo dedicar todo este evento que empeza a ser unha cita fixa no calendario cultural galego.

Na Mostra tamén terán cabida obradoiros participativos, coma o de enredos musicais, que se celebrará o sábado ás 12h, ou o de xoguetes sonoros, que se realizará o domingo á mesma hora, así como actuacións con grupos de música e baile tradicional que sairán ás rúas ás 18h tanto o sábado como o domingo.

O domingo ás 19.30 terá lugar o desfile de traxes tradicionais da man da Asociación do Traxe Galego, que se realizará no Cantón de San Roque, e así mesmo, para finalizar o día, o sábado ás 23h, no Cantón de San Roque, ofrecerán un concerto as pandereteiras de Limagoia, e o domingo ás 22h na Praza do Convento, terá lugar un concerto a cargo do cuarteto de música tradicional Ludovaina.

Todas as actuacións serán con acceso gratuíto.

27/08/2010

0 comentários :

Danos a túa opinión