Mine Kawakami ofrece catro concertos en Galicia

Redacción

A pianista xaponesa Mine Kawakami ofrece este verán en Galicia, en agosto e setembro, catro concertos que forman parte do Camiño da Música da programación deseñada para este Ano Santo. O espectáculo audiovisual Un piano no Camiño, inspirado no Camiño de Santiago, nas súas paisaxes e nas súas xentes, pasará por Pontevedra, Ourense, Santiago de Compostela e Lugo. A xira da pianista, que xa actuou en Pontevedra e Ourense, recalará en Santiago de Compostela o martes 24 de agosto, onde actuará a partir das 22.00 horas nun concerto enmarcado no Festival dos Abrazos e que terá lugar en Bonaval. Por último, o 5 de setembro desprazarase a Lugo para actuar ás 21.00 horas na Praza de Santa María.

Os protagonistas do espectáculo de Mine Kawakami son un piano de cola e o Camiño de Santiago, xa que a pianista aposta por unha posta en escena moi sinxela na que destaca o seu virtuosismo musical. En Un piano no Camiño, a pianista xaponesa retoma a súa formación clásica e dota ás súas composicións dun estilo no que se aprecia a influencia das súas raíces xaponesas.

O resultado é un proxecto de nove pezas musicais de gran complexidade, que reflicten o crecemento persoal, o esforzo e a vitalidade da artista. Para completar o espectáculo audiovisual, realizouse unha coidada selección de imaxes tomadas no Camiño de Santiago polo fotógrafo xaponés Jiro Hirayama. Grazas o impulso de Xacobeo 2010, nos próximos meses Mine Kawakami lanzará este proxecto audiovisual ao mercado español a través dun novo disco que levará por título O Meu Camiño.

20/08/2010

0 comentários :

Danos a túa opinión