O CD Lugo, campión da III Supercopa da Deputación

Redacción

O deputado da Área de Deportes da Deputación de Lugo, Antonio Veiga, entregou onte á tardiña ao CD Lugo o trofeo de campión da III Supercopa Deputación de Lugo de Fútbol. Este torneo disputárono os vencedores da Copa Deputación de Fútbol nas súas categorías (1ª e preferente o Chantada e 2ª e 3ª autonómica o Calasancio) mailo club máis representativo da provincia, o Lugo. Esta modalidade de competición implica que todos os conxuntos se enfronten entre si en partidos de 45 minutos de duración, co que resulta vencedor o que máis partidos venza e, en caso de igual número de vitorias, o que mellor diferenza de goles teña.

O Lugo pasou máis apuros dos previstos e non logrou impoñerse ao Calasancio no primeiro partido, no que ambos conxuntos empataron sen goles. Non obstante, coa entrada de moitos titulares no once do Lugo o partido contra o Chantada resultou cómodo e o equipo da capital colleitou xa 3 goles nos primeiros minutos de partido, renda que logo incrementaría, e que lle valeron para levarse o partido e a 3ª Supercopa Deputación, xa que o Chantada lograría impoñerse ao Calasancio no último partido por un resultado de 2-0.

Esta III Supercopa disputouse no campo do Acebreiro, na Pastoriza, que foi reformado coa cantidade de 131.000 euros aportados pola Área de Deportes da Deputación, acometéndose o levantamento do antigo terreo de xogo, instalando un sistema de drenaxe eficaz que permite evacuar a auga sobrante da superficie, colocando un sistema de regadío automático que se activa con programador e replantando de novo con céspede a superficie. Actualmente, logo dunha tempada, o céspede atópase totalmente enraizado e en perfectas condicións para a práctica do fútbol, o que converte ao campo de fútbol do Acebreiro nunha instalación deportiva punteira na comarca da Terra Chá. Antonio Veiga tamén lembrou, coma no momento da presentación deste torneo, que os partidos que se puideron ver hoxe non son máis que un reflexo da boa saúde da que o fútbol lucense goza hoxe en día, como demostra que case a totalidade dos equipos da provincia participaron na Copa Deputación deste ano.

02/08/2010

0 comentários :

Danos a túa opinión