Programa do XXXI Festival de Pardiñas


Redacción

Sábado, 7

16:00 horas:
Apertura das exposicións de Pintura, Escultura, Fotografía, Ceramica, na CASA DAS ARTES.
Comezo da Mostra do XXXI Certame de Debuxo Infantil.
Fallo dos Premios Guitiriz de Escultura e Fotografía.
Apertura da XXXI MOSTRA DE ARTESANIA: cesteiros, tecelás, alfareiros, etc., que mostran a súa obra en máis de 60 stans.

17:00 horas:
Apertura da XVII MOSTRA DE ARTESANOS DE INSTRUMENTOS DE MUSICA TRADICIONAL, organizada pola Asociación de Gaiteiros Galegos.

18:00 horas:
Pregón desta Mostra a cargo dun investigador da música tradicional

19:00 horas:
1º Concerto de Música Tradicional no palco deste espazo. Despois actuacións de grupos espontaneos. Hai sesións didácticas, seminarios e obradoiros sobre danza tradicional, xoguetes sonoros, historia de instrumentos, afinación da palleta, etc.

21.00-04.00 horas:
Festival no PALCO do certame, con BELLON MACEIRAS QUINTETO, AL JAUJALA (Alemaña), CANTECA DE MACAO (Madrid) e GALEGOZ

Domingo, día 8:

11:00 horas:
Apertura da Feira de Libros, coa presenza de escritores como Bernardino Graña, Paco Martín, David Otero, Neira Vilas, Marica Campo, etc. e presentación do nº 54 da Revista Xermolos.
Apertura das Exposicións
XXXI Mostra de Artesanía, de artes plásticas, cerámica, fotografía na Casa das Artes, XVII Mostra de Artesáns de Instrumentos.

11:30-13:30:
Escenario libre para músicos espontáneos na Mostra de Artesáns de Instrumentos.

12:00:
Seminario de Baile Tradicional, Seminario de Xoguetes Sonoros

13:30:
Concerto da Coral de Xermolos na Igrexa de Santo Domingo.Merendas.

16:00 a 21:00 horas:
Concertos no escenario libre de músicos espontáneos.

18:00 horas:
Pregón do sociólogo Bernardo García Cendán.

18:30 horas:
Entrega pola banda des escritores e creadores de lotes de libros do XXXI Certame Terra Chá de Literatura e Debuxo Infantil.

19:00 horas:
Concerto de música tradicional na Mostra de Artesáns.

20:00 a 22:00 horas:
Escenario libre de músicos espontáneos.

22:00 a 03:00:
2º Festival de música de Pardiñas con Xosé Manuel BUDIÑO e o seu grupo, PELEPAN, PABLO SEOANE E GRUPO, ALALE (Irlanda), GUINTEAVAN


A QUENLLA presenta o seu novo disco OS IRMANDIÑOS sobre textos de Manuel María, e co seu expreso desexo, a Quenlla gravou este novo traballo discográfico, que dá actualidade a un dos feitos máis sobranceiros da Historia de Galicia.

Coa participación de: Marica Campo, Miro Casabella, Xosé Estévez, Xosé Neira Vilas David Otero e membros do grupo A Quenlla. Na Mostra de Instrumentos, domingo, día 8, ás 13,30.

“...A finais do S. XIV a fame, a peste e a guerra visitan Galicia e producen unha forte regresión demográfica e unha debilidade biolóxica que ten como consecuencia un empobrecemento das vilas e cidades e a falla de brazos campesiños para traballar as terras, o que perxudica sobre todo a economía dos señores. Estes, non queren perderen a súa posición económica e aumentan os impostos e tributos, e buscan garantir o seu sustento empregando a forza con toda caste de abusos e mesmo coa práctica da bandidaxe. Estamos en pleno feudalismo e a ausencia da autoridade do rei é unha realidade. Como resposta a esta situación burgueses e labregos convocan Irmandades e rebélanse contra o poder da nobreza...”

CARREIRA POPULAR DE PARDIÑAS

7 de agosto ás 7 da tarde, en homenaxe a Julián Bernal, 0 atleta máis veterano do país, que emprendeu a derradeira carreira o pasado 16 de marzo, aos 91 anos. O mesmo percorrido das edicións anteriores: 5,3 quilómetros adultos e 4 quilómetros os a as nenas. Inscricións até media hora antes na liña de saída, no Campo da Feira de Guitiriz.

XVII MOSTRA DE INSTRUMENTOS DE MÚSICA TRADICIONAL

Un ano máis a Asociación de Gaiteiros Galegos (AGG), achégase ata o Festival de Pardiñas para organizar a que será a "XVII Mostra de Instrumentos de Música Tradicional". Un evento que constitúe unha das mostras de luthería máis antigas da península e que congrega cada ano a numerosos artesáns do país para mostrar o seu traballo ao público. Este ano a mostra conta coa presenza de 22 artesáns que amosarán o seu bo facer, e séguese apostando pola música e polo baile tradicional a través de actuacións en directo, obradoiros e a sempre estimada participación do público presente.
Para levar a cabo esta actividade, a AGG coa axuda da Consellería de Cultura e Turismo, Maderas Barber, Comercial Pazos e Seivane-Goretex. Unha colaboración que resulta imprescindible para que a AGG continúe na súa loita de divulgación e dignificación da cultura tradicional.

Durante as xornadas do 7 e 8 de Agosto, e no marco incomparable do Festival de Pardiñas, a XVII Mostra de Instrumentos de Música Tradicional contará cun programa repleto de actividades. O Sábado, Nando Casal, un dos membros fundadores do grupo Milladoiro, fará o pregón da mostra. Posteriormente terá lugar unha demostración e construcción de gaitas con torno de varas, a cargo do artesán Nebra. Para rematar as actividades do sábado, actuación de Os Minhotos, grupo chairego composto por cinco músicos, que naceu como cuarteto, alá polo ano 96 e que pouco a pouco foi incorporando outros instrumentos da nosa música como o acordeón, a requinta ou a zanfona.

Durante a xornada do Domingo haberá actividades dende a mañá co Concerto "Os instrumentos femininos", a cargo de Pablo Carpintero, Rosa Sánchez, Mª del Carmen Picallos e Xaneco. Xa pola tarde haberá unha demostración práctica de instrumentos de corda e percusión a cargo do grupo Diluvea, que está formado por Diego Langarika, Luis Martínez e Beatriz Martínez.

O Obradoiro de Baile Tradicional, correrá a cargo de Gustavo Couto, mestre desta disciplina e coautor do libro Bailaben, e máis tarde Pablo Carpintero e Rosa Sánchez serán de novo os encargados de ofrecer un concerto de repertorio antigo de Pontevedra, que rematará cun obradoiro de Treboada a cargo de Oli Xiraldez.

As actividades previstas para enriquecer a exposición, están enfocadas para que sexan totalmente participativas, así pois haberá un escenario disponible, durante todo o día para todos aqueles músicos que desexen tocar, e aqueles artesáns que queiran falar ou facer algunha demostración da sonoridade dos seus instrumentos.

A “FEIRA E A FESTA DA MUSICA E DA ARTE” é unha aposta por todas as artes. En Pardiñas todas e todos os festivaleiros son artistas, crean espirais de beleza, que se multiplican en ducias de universos prodixiosos: a Casa das Artes, a Mostra de Artesáns de Instrumentos, o seu palco de intérpretes espontaneos e os obradoiros, as feiras do libro e da artesanía, o certame de literatura e debuxo infantil.

O FESTIVAL é un corpo a corpo cos creadores e as creadoras, porque todos os que se citan nesta feira e festa, achegan a súa parte de beleza e paixón, sentíndose atraídos por este manancial de emocións. Cadaquén é un anaco da paisaxe de Pardiñas, danzando e contaxiando enerxía e ledicia. Ninguén é un espectador, todos os participantes son fontes e surtidores de amizade, beleza, arte. Cada edición renóvase a mesma teima: “facer un Pardiñas máis fermoso”. Coma dixo un dos seus asíduos, o poeta de Guitiriz, Xosé María Díaz Castro: “a beleza feríunos para sempre”.

Abertos a todas as músicas e aos fluxos máis plurais das artes, Pardiñas é unha sucesión de ritmos, recendos, formas, cores, sons, que o converten nuns días máxicos, propicios para debuxar no horizonte ronseis de harmonía e liberdade, desde este recanto da natureza.

Foto: P. Naseiro

5 de ago. de 2010

0 comentários :

Danos a túa opinión