Visitas ao Castelo de Pambre

Redacción

O conselleiro de Cultura e Turismo, Roberto Varela, e o alcalde de Palas de Rei, Fernando Pensado, asinaron a comezos de agosto un convenio de colaboración para a apertura e visitas públicas ao Castelo de Pambre. O obxecto do convenio de colaboración entre a Consellería e o Concello é establecer as condicións necesarias para a apertura e visita pública a un monumento tan importante como o Castelo de Pambre. O Concello de Palas de Rei formalizará unha póliza de seguro para cubrir os danos que poidan sufrir os visitantes ao Castelo dentro das súas instalacións e durante o tempo que duren as visitas. Asemade, comprométese a levar a cabo a limpeza exterior da fortaleza.

O custo total de todas as actuacións derivadas da execución deste convenio acada un importe total de 16.000 euros, dos que 10.000 euros serán financiados pola Consellería de Cultura e Turismo. Con esta cantidade levaranse a cabo as actuacións necesarias para establecer o réxime de visitas ao Castelo de Pambre e os custos derivados destas actuacións, como son a seguridade, a sinalización e a promoción e información sobre as visitas.

O horario para a realización destas visitas, que serán gratuítas, é o seguinte:

- Horario de verán: Todos os días de 11.00 a 13.00 horas e de 16.00 a 20.00 horas.
- Resto do ano: Todos os días de 11.00 a 13.00 horas e de 14.00 a 20.00 horas.

O Castelo de Pambre goza dunha súa situación estratéxica en Palas de Rei, en pleno Camiño de Santiago, e posúe un gran valor histórico e arquitectónico. Coa apertura ao público desta fortaleza potenciarase a promoción do Camiño de Santiago e será unha fonte de atracción turística para Galicia, posto que se trata dun valor patrimonial de enorme importancia. Este monumento, de longa traxectoria histórica e cuxa construción data do século XIV, está tamén catalogado como Ben de Interese Cultural.

17/08/2010

0 comentários :

Danos a túa opinión