Aparcar e peonalizar


Xulio Xiz

Sen telas visto aínda persoalmente, estou satisfeito polas reformas efectuadas na Praza da Constitución vilalbesa para axeitala ós tempos de hoxe, proporcionando aparcamento soterrado e á vez eliminando os vehículos automóviles da súa superficie.

Unha operación similar efectuouse xa hai tempo en Lugo, no que a praza maior estaba invadida polos coches, e o concello eliminounos no contorno da Casa do Concello, e en toda a superficie da praza, aínda que non se atreveu a facer un aparcadoiro soterrado no centro da cidade pola riqueza arqueolóxica que hai no sochán.

Pois en Vilalba, eu que son conductor forzoso, tiña ata agora boa dificultade para atopar lugar de aparcamento no caso de xestións no concello ou zonas do centro, tendo que ir aparcar ás casas baratas, ás novas rúas inmediatas ou mesmo preto do antigo Campo de fútbol. Ou arriscarme a mal aparcar, cos perigos conseguintes.

Ben está a disposición do concello para peonalizar a praza, colocar bolardos, e que o sochán sexa aparcadoiro, por agora gratuito, pero que máis adiante vai ser de pago con gratuidade para as primeiras horas.

Os conductores temos que afacernos a que para aparcar en lugar céntrico hai que pagar, porque senón o lugar de aparcamento gratuito convertiríase en depósito permanente dos vehículos que primeiro chegasen ó lugar.

Desde o punto de vista local, quizais sone forte eso de peonalizar a praza principal do pobo e rúas inmediatas, facendo discurrir os automóviles polo aparcadoiro soterrado para cruzala. Pero todo é afacerse, e só beneficios poden agardarse dunha renovación coma esta, que a fin de contas vai dignificar o que poderíamos considerar a "sala de estar" vilalbesa, lugar onde recibir ós visitantes.

Posiblemente estas cen prazas novas de aparcamento no soto da Praza da Constitución sexan unha solución temporal do problema de acomodación de automóviles, pero en tanto proba a súa idoneidade, comeza a funcionar, e o concello dispón que se empece a pagar pola súa utilización, o goberno municipal fará ben en ir pensando noutras superficies complementarias de xeito que entrar na zona centro de Vilalba non sexa unha odisea.

23/09/2010

0 comentários :

Danos a túa opinión