RedacciónA Biblioteca Anxel Casal acolleu onte a presentación da 32 edición do Congreso Internacional de Literatura Infantil e Xuvenil (IBBY), que ten lugar en Santiago de Compostela até o vindeiro domingo 12 de setembro. O Congreso, baixo a lema "A forza das minorías", abordará até o vindeiro domingo temas relacionados con grupos minoritarios excluídos e a súa relación coa literatura. Roles de xénero e sexualidade, identidade intercultural, acceso aos libros en países en vías de desenvolvemento, nacionalidade, relixión, inmigración, influencia dos medios de comunicación, linguas indíxenas ou discapacidade, son a base temática ao redor da que xirará o IBBY no próximos catro días.
O director xeral de Promoción e Difusión da Cultura, Francisco López, asegurou que a celebración desta cita bienal en Galicia "é unha proba máis de que na nosa comunidade está a realizarse un traballo sólido e de calidade como produtores e difusores da literatura infantil e xuvenil, con creadoras e creadores, editoriais e especialistas de primeiro nivel mundial".
O comité científico do Congreso está composto por grandes nomes do panorama internacional da literatura para nenos, como a belga Kimete Basha ou a escritora e contadora oral estadounidense Anne Pellowski. Tamén participan en leste as profesoras galegas Ana Lúa, Branca-Ana Roig Rechou ou Veljka Ruzicka Kenfel. Pola súa banda, o Comité Executivo desta 32 edición do IBBY en Compostela, conta con profesionais da talla de Marilar Aleixandre, Manuel Bragado, Pablo Couceiro ou o gañador do Premio Nacional de Literatura Infantil e Xuvenil en 2008, Agustín Fernández Paz.
O Congreso, que se celebrou hai dous anos en Copenhague e terá lugar en 2012 e 2014 en Londres (Reino Unido) e Oaxaca (México), respectivamente, está conducido baixo a lema "A forza das minorías". O IBBY é unha Organización Non Gobernamental, incorporada á UNESCO e a Unicef, e fiel defensora dos principios da Convención Internacional dos Dereitos do Neno desde a súa fundación en 1953. E os seus obxectivos non cambiaron moito desde as súas orixes, sendo o principal deles a promoción do entendemento internacional a través dos libros infantís e a consecución do acceso, en todo o mundo, dos nenos e mozos a publicacións de calidade. No noso país, o IBBY atópase representado pola Organización Española Para o Libro Infantil (OEPLI), que elixiu a localización do evento en Santiago de Compostela pola súa importancia artística e histórica, e por coincidir o 2010 coa celebración do Ano Xacobeo.
0 comentários :
Danos a túa opinión