'Olladas do Camiño' en Ribadeo


Redacción

O concello lucense de Ribadeo acolle desde antonte a exposición Olladas no Camiño de Santiago, enmarcada no Camiño Contemporáneo da programación de Xacobeo 2010 e que estará aberta ao público na Oficina de Turismo deste municipio ata o próximo 12 de outubro. Ao acto de inauguración desta mostra, na que se recollen fotografías de 14 artistas, asistiron o xefe do departamento de Publicacións e Exposicións da S.A. de Xestión do Plan Xacobeo, Francisco Singul, e o alcalde de Ribadeo, Fernando Suárez Barcia.

Olladas no Camiño de Santiago é unha compilación dos artistas galegos Delmi Álvarez, Fernando Bellas, Tino Martínez, Javier Teniente, Xulio Villarino e Tino Viz. Xunto as súas fotografías están as dos artistas Chris Erlbeck, Tine Harden, Hana Jakrlova, Katja Lösönen, Cristina de Middel, Rita Newman, Eva Persson y Signe Raikstina.

As cámaras destes fotógrafos recollen a paisaxe, o patrimonio arquitectónico, a riqueza humana dos peregrinos, dos visitantes e de todas as persoas que viven ao longo das diferentes rutas que teñen como meta Santiago de Compostela. En Olladas no Camiño de Santiago as imaxes reflicten desde iconas puramente xacobeas ata manifestacións puramente antropolóxicas. Nesta mostra tamén teñen cabida dende os retratos con nome e apelidos, ata a figura anónima no espazo. Desde a paisaxe aberta ata a intimidade de igrexas e claustros.

A exposición fotográfica estará aberta ao público ata o 12 de outubro na sala da Oficina de Turismo de Ribadeo. Despois, a mostra fotográfica recalará no Centro Cultural Carvalho Calero de Ferrol, onde se poderá visitar a selección de imaxes entre os días 3 e 27 de novembro. Con anterioridade, Olladas no Camiño de Santiago fixo parada no concello lucense de Mondoñedo, onde iniciou a súa itinerancia no mes de marzo. En abril, as fotos viaxaron ata Bratislava para ser expostas no edificio do Ministerio de Cultura. Asemade, unha parte da exposición estivo en Arxentina e en Brasilia.

Esta mostra forma parte do Camiño Contemporáneo da programación de Xacobeo 2010, un apartado no que se recollen os proxectos expositivos de carácter máis vangardista, que se exhiben en diversos espazos de Galicia. Este itinerario amosa unha revisión do Camiño e da figura do peregrino a través dos ollos dos artistas máis representativos da fotografía e das artes plásticas do momento.

22/09/2010

0 comentários :

Danos a túa opinión