Fernando Blanco denuncia a privatización de servizos das explotacións gandeiras

Redacción

O deputado lucense do BNG no Parlamento Galego, Fernando Blanco, compareceu esta mañá, acompañado de Manuel L. Louxedo, gandeiro e concelleiro do BNG na Fonsagrada, e Marisol Carreira Castro, do Comité de Empresa de SEAGA, para criticar “a privatización dos servizos de identificación e rexistro das explotacións gandeiras galegas que a Xunta de Galiza pretende introducir cambiando o modelo de xestión”. Fernando Blanco denunciou que se queira substituír o modelo actual “por unha oficina virtual, cando moitas explotacións do rural galego non dispoñen de internet, eliminando ademais postos de traballo dos veterinarios que antes realizaban este proceso de identificación e rexistro”. O deputado do BNG no Parlamento galego criticou os cambios que a Xunta quere introducir nestes servizos “a pesar de estar perfectamente constatada a eficacia e bo funcionamento do sistema actual de identificación, polo que resulta totalmente ilóxico que se queira substituír algo que funciona ben por un plan que é unha incógnita”.

Fernando Blanco anunciou que onte mesmo o BNG presentou no Parlamento unha serie de preguntas para que a Xunta de Galiza proporcione información oficial e precisa sobre os cambios que pretende introducir a Consellería do Medio Rural no sistema de identificación, rexistro e control das explotacións gandeiras, e tamén informe sobre o destino e cometido do actual servizo de veterinarios identificadores, se finalmente deixan de colaborar cos gandeiros na identificación, rexistro e anotación no libro de explotación, como se ven facendo até agora.

F. Blanco foi crítico ao afirmar que o Director Xeral encargado de responder sobre estes temas foi incapaz de dar as explicacións pertinentes e emprazou a resposta a unha nova regulación que sairá en outubro ao mesmo tempo que calificou de “absoluta contradición do novo plan que comezou a aplicar coa lei actual de tributos de Galiza, na que se estabelece un prezo oficial para os crotais como viña sendo até o de agora, mentres que o novo programa contempla a gratuidade dos mesmos”. Isto, segundo Fernando Blanco, “demostra un total descoñecemento sobre a materia legal xa que para instituír a gratuidade dos crotais habería que modificar a lei previamente polos trámites parlamentarios, xa que os regulamentos están para cumprirse”.

Pola súa banda, Manuel Louxedo, gandeiro e concelleiro do BNG na Fonsagrada, criticou os atrancos que este novo sistema para proceder á identificación trae consigo, sobre todo a persoas que non teñen a formación nin os medios necesarios para manexar os servizos electrónicos e que estaban acostumados á presenza dos veterinarios nas explotacións xa que, en xeral, facilitáballes moito o labor aos gandeiros, pois colaboraban para anotar correctamente no libro de explotación e favorecía un control e seguimento moito máis rigoroso e axeitado. Por este motivo, Manuel Louxedo anunciou que se van presentar mocións nos 37 concellos da comarca Lugo-Centro do BNG, e explicou que no pleno da semana pasada na Fonsagrada xa se tratou este tema e o PP pechouse en banda para non solicitar unha resposta da Consellaría do Medio Rural e que as reivindicacións dos gandeiros sexan escoitadas.

Marisol Carreira Castro, do Comité de Empresa de SEAGA, pola súa parte, engadiu que desde SEAGA “non temos coñecemento oficial algún dos cambios que se poidan introducir e que teñamos que facer no noso traballo e todo o que sabemos provén de certos rumores e informacións sen base que proceden dos propios gandeiros ou das oficinas comarcais a través dos compañeiros”. Marisol Carreira afirmou, referíndose ás consecuencias que tería cambiar o sistema de identificación e rexistro, que “o que parece moi claro é que se pode perder a garantía sanitaria e a gran vantaxe competitiva que tiña o produto galego de calidade, que era unha seguridade absoluta na súa trazabilidade (control e seguimento dun alimento desde a súa orixe até a súa comercialización)”.

23/09/2010

0 comentários :

Danos a túa opinión