Hoxe estará en Compostela Mohamed el-Baradei, Premio Nobel da Paz de 2005

Redacción

O Premio Nobel da Paz de 2005, Mohamed el-Baradei, achégase hoxe 20 de setembro a Santiago de Compostela cunha conferencia con no Centro Sociocultural da Fundación Caixa Galicia en Santiago (Carreira do Conde, 18) sobre o desarme de Iraq. O acto, enmarcado no programa de conferencias ConCiencia, organizado pola Universidade de Santiago de Compostela, terá lugar o vindeiro 20 de setembro, ás 18.30 horas.

Mohamed el-Baradei é diplomático e Director Xeral da Axencia Internacional de Enerxía Atómica (AIEA), unha organización intergobernamental baixo o auspicio das Nacións Unidas. Xunto á AIEA, foi galardoado co Premio Nobel da Paz de 2005.

El-Baradei licenciouse en Dereito na Universidade do Cairo en 1962 e ten o doutoramento en dereito internacional pola Universidade de Nova York. Como diplomático comezou a traballar nada máis licenciarse no Ministerio de Asuntos Exteriores de Exipto, destinado en dúas ocasións nas sedes de Nacións Unidas en Nova York e Xenebra.

En 1984 foi nomeado asesor xurídico da AIEA ata 1993 e director auxiliar da oficina de relacións exteriores da Axencia ata 1997. Posteriormente foi nomeado Director Xeral, cargo que ocupa na actualidade.

Xunto a Hans Blix foi o encargado pola Axencia e polas Nacións Unidas para certificar o desarmamento de Iraq tras a guerra e conduciu o equipo de inspectores da ONU buscando evidencias de armas de destrución masiva no mesmo país.

O 27 de xaneiro de 2003, ante o Consello de Seguridade da ONU, expuxo que a AIEA desmantelara, eliminara ou evacuara a maior parte das instalacións iraquís con capacidade de fabricar armas nucleares. O 7 de marzo, ante o mesmo órgano, reafirmou a súa postura e comunicou que non existía uranio en Iraq procedente de Níxer, tal e como George W. Bush denunciara con anterioridade. Por iso se opuxo de cheo a que Estados Unidos, Gran Bretaña, España e Portugal fixesen a “Declaración das Azores” que deu lugar á invasión de Iraq de 2003 ao considerar que non había probas para devandita intervención, e solicitando un prazo de tempo maior para que os inspectores realizasen o seu traballo.

Na actualidade a AIEA e el-Baradei están inmersos en dous procesos internacionais de envergadura: o control da produción de uranio por parte de Irán que é remiso a dar explicacións á Axencia, e a saída do Tratado de Non Proliferación Nuclear de Corea do Norte onde se sospeita a posibilidade de que se obtivo material para un número indeterminado de armas atómicas. En ambos os casos Estados Unidos é contrario á política de el-Baradei e pretende a súa non reelección.

O 7 de outubro de 2005 foi anunciado como o gañador do Premio Nobel da Paz xunto á AIEA en recoñecemento aos seus esforzos por impedir a proliferación de armas nucleares.

Programa ConCiencia
O programa ConCiencia, xa na súa quinta edición, recibe neste Ano Xacobeo a varios Premios Nobel: Albert Fert, Sir Harold W. Kroto, Mohamed ElBaradei, Sir Richard J. Roberts e Ada E. Yonath. O programa ConCiencia, da USC e o Consorcio de Santiago, segue a consolidar o seu prestixio e a súa condición de referente na proxección pública da ciencia, circunstancia sinalada por varios participantes de edicións anteriores.

Entre os obxectivos desta iniciativa, cabe destacar:
1. A divulgación científica a cargo de figuras do máximo nivel internacional.
2. Proxecta-la imaxe da Cidade de Santiago de Compostela como foco universal do pensamento.
3. Servir de ponte para o reforzamento de contactos científicos entre líderes da máxima relevancia científica mundial e o corpo de investigadores da USC.

Estas bases diferencian o programa ConCiencia de calquera outra iniciativa de divulgación científica, posto que buscan, á marxe da clásica conferencia ou acto puntual, a rendibilización da visita destes Premios Nobel favorecendo o seu contacto con especialistas locais.

20 de set. de 2010

0 comentários :

Danos a túa opinión