Onte actuou o Taller Atlántico Contemporáneo no CGAC

Redacción

Onte martes 28 de setembro celebrouse ás oito e media no Centro Galego de Arte Contemporánea de (CGAC) Compostela un novo concerto do Taller Atlántico Contemporáneo dentro do ciclo "Os nosos compositores. Perspectivas de ensemble". O programa incluía a tres dos máis destacados compositores da vangarda compositiva galega, entre eles a Xan Viaño do que se interpretaron as súas "Musicas nocturnas" para frauta, trompa, piano, arpa e violonchelo. De E.X. Macias interpretouse a peza "Adhuc" para clarinete en sib, trompa, vibráfono, sintetizador, violín e violonchelo. E de Fernando Buide o seu "Movemento para septeto" para frauta, oboe, clarinete en sib,vibráfono, marimba, harpa e piano.

O Taller Atlántico Contemporáneo (TAC) está formado por experimentados músicos galegos de recoñecido prestixio e extensa traxectoria profesional. O repertorio universal para Ensemble moderno e contemporáneo é a base do seu repertorio, ademais dun decidido compromiso coa recuperación, creación e interpretación da obra de compositores galegos. Éstas son as particularidades que lle confiren ao TAC, así como a cada un dos seus concertos, a súa principal característica: unha personalidade propia e diferencial. O seu director musical é Diego García Rodríguez.

29/09/2010

0 comentários :

Danos a túa opinión