Unha mostra sobre o Conde de Lemos percorrerá varias localidades galegas

Redacción

O pasado venres foi inaugurada ás oito da tarde na sala de exposicións do centro de maiores de Caixa Galicia en Monforte a mostra "Don Pedro Fernández de Castro, o gran Conde de Lemos ", coa que se conmemora o cuarto centenario do seu nomeamento como vicerrei de Nápoles. A intención do Concello, que colabora coa vicepresidencia terceira da Deputación nesta iniciativa, era que a mostra puidese verse na zona do museo de arte Sacra de Santa Clara que está a ser ampliada, pero o ritmo das obras impediuno.

A exposición poderase ver en Monforte durante un mes e logo desfilará por Sarria, Chantada, Lugo, Mondoñedo, Pontedeume, Betanzos, Ferrol á Coruña e Santiago, recreando así o mapa dunha viaxe por Galicia que realizou na súa época o sétimo Conde de de Lemos. Unha vez finalizado este percorrido, a mostra terá unha localización permanente en Monforte, que segundo indicaron os responsables municipais aínda está por determinar.

Segundo os organizadores da mostra esta pode ser unha boa oportunidade para promocionar unha figura non suficientemente coñecida dentro e fóra de Monforte. Por iso o Concello organizará visitas guiadas á mostra destinadas a particulares e centros de ensino. No caso dos colexios, as visitas á exposición complementaranse con percorridos polo museo de arte sacra. Os interesados en asistir e recibir as explicacións dun experto poden reservar praza a través do teléfono 982 10 53 03.

24/09/2010

0 comentários :

Danos a túa opinión