Xornadas de Banda Deseñada en Ourense



Redacción

Presentouse o programa da vixésimo segunda edición das Xornadas de Banda Deseñada, que se van desenvolver entre o 1 e o 17 de outubro” na Casa da Xuventude de Ourense.Este ano, a festa galega do cómic contará coa presenza das exposicións de Pablo Auladell, Clara Tanit-Arqué, Manuel Bartual, Joao Facenda ou Dani Montero, ámbolos cinco coñecidos e galardoados autores de cómic. As tres primeiras mostras ubicaranse no Museo Municipal da cidade ourensá, mentres que as dúas segundas poderán visitarse na propia Casa da Xuventude.

Do mesmo xeito, poderase gozar do “Certame de Cómic e Ilustración Injuve 2009”, que conta cos gañadores e seleccionados do certame organizado anualmente polo Instituto de la Juventud (Injuve); a exposición “Xuventude Crea”, e “Un camiño de viñetas” que consiste na visión de varios dos máis destacados autores galegos de banda deseñada sobre o camiño de Santiago.

As “Xornadas de Banda Deseñada” deste ano contarán cunha sección dedicada á proxección en pantalla grande de filmes relacionados coa banda deseñada internacional, en estrea na cidade. Os filmes proxectados serán “Gainsbourg. Vida de un héroe” e “María y yo”.

Por outra banda, o pasado venres, dábanse a coñecer os gañadores do concurso convocado pola Dirección Xeral de Xuventude e Voluntariado da Xunta, que se enmarca dentro do programa “Xuventude Crea”. Este ano, os galardoados serán José Domingo Usted, primeiro premio pola obra “Robot xigante” (3000 euros); Diego Blanco López, 2º premio pola obra “O Humor de Mr.T” (1500 euros); e Miguel Cuba Taboada, terceiro premio por “Ombre Umbre” (1000 euros).

Os premios do certame “Xuventude Crea 2010” e do Premio Ourense de Banda Deseñada entregaranse o próximo 15 de outubro. O premio Ourense, outorgado pola Casa da Xuventude e a Concellaría de Cultura do Concello de Ourense, distingue cada ano unha iniciativa ou unha traxectoria en relación coa BD en Galicia, e este ano recae na revista Retranca. O galardón é unha estatuíña deseñada e realizada expresamente para a ocasión polo artista plástico Manolo Figueiras.

30/09/2010

0 comentários :

Danos a túa opinión