Manuel París.- Máis de cincuenta persoas reuníronse o pasado xoves en O Grove para realizar un acto simbólico de apoio a Xapón, que aínda sofre as consecuencias do terremoto do 11 de marzo. Este encontro tivo lugar no restaurante Culler de Pau baixo a convocatoria de “O noso corazón está con Xapón-Tohoku” e contou cunha interpretación musical a cargo dos artistas xaponeses Mine Kawakami, ao piano, e Tadashi Yamamoto, que deleitou aos presentes tocando o sanshin, un instrumento tradicional do país do sol nacente.
Os asistentes a este acto tiveron a ocasión de probar diferentes pratos típicos de Xapón, xa que o restaurante grovense conta cun cociñeiro xaponés que se encargou de preparar uns aperitivos para todos os participantes neste evento. Deste xeito, é previsible que no futuro xurdan novos proxectos e ideas nas que poidan traballar de xeito conxunto a partir de agora.
Na xuntanza de O Grove decidiuse participar nunha iniciativa que xa circula por Internet e que consiste en que cada un faga unha fotografía e a suba a unha páxina web como xeito simbólico de apoio a todas as persoas que aínda están a sofrir as consecuencias do terremoto.
Na fotografía, Javi Olleros, dono do restaurante Culler de Pau; Mine Kawakami, pianista; Takahide Tanaka, cociñeiro do Culler de Pau (e coñecido en O Grove como Takiño); Lanzada Calatayud e Itsuko Hori, organizadoras do evento; e Tadashi Yamamoto, antropólogo xaponés estudioso da cultura galega e colaborador de A Voz de Vilalba.
0 comentários :
Danos a túa opinión