'Cómo salir de esta' o venres en Vilalba



Redacción.-

Vilalba acollerá mañá venres a presentación do libro “Cómo salir de esta” (A Coruña, Actualia Editorial, 2013) do xornalista José Luis Gómez. O acto, organizado conxuntamente polo xornal A Voz de Vilalba e o Instituto de Estudos Chairegos, terá lugar a partir das 20:30 horas no Centro Cultural e Recreativo da capital chairega. O autor estará acompañado polo filósofo Antón Baamonde e polo tamén xornalista Moncho Paz.

José Luis Gómez (Brión, 1958) comezou a súa carreira como xornalista nas páxinas de El Correo Gallego. Posteriormente, traballou en La Voz de Galicia, entre 1982 e 1999, como redactor, xefe de sección, redactor-xefe e finalmente director do diario. Tras abandonar o rotativo coruñés, fundou o dixital xornal.com e asumiu a dirección da División de Prensa Diaria do Grupo Zeta e tamén a Coordinación de Publicacións e de Comunicación. Entre 2005 e 2008 foi director da revista Capital, desde onde avanzou a crise en 2007 con aquela famosa portada do mes de setembro anunciando “La crisis que viene”. En 2008 fundou e dirixiu Xornal de Galicia, un sopro de aire fresco na prensa galega que lamentablemente pechou as súas portas en 2011 por falta de apoios. Tertuliano habitual en debates de radio e televisión, actualmente é o editor de www.mundiario.com, primeiro xornal global de análise e opinión.

“Cómo salir de esta” é froito dunha idea compartida co xornalista e economista xermano Carsten Moser, asinante do limiar, e co editor Carlos Iglesias, director de Netbiblo. A resposta á pregunta que da título á obra non figura nun só capítulo, senón que vai aflorando no seu conxunto. Aínda que hai partes do libro máis centradas que outras en aportar saídas concretas, en opinión do autor “non deben confundirse con receitas máxicas, impropias dun libro popular que pretende preservar o rigor e a calidade”.

11 de abr. de 2013

0 comentários :

Danos a túa opinión