Presentación de "Sete Caveiras" en Vilalba

Redacción.- Hoxe venres terá lugar en Vilalba a presentación do novela Sete Caveiras (Vigo, Xerais, 2014), da xornalista e escritora Elena Gallego Abad. O acto celebrarase no Centro Cultural e Recreativo da capital chairega ás 20:30 horas e a autora estará acompañada polo xornalista Moncho Paz. Esta actividade forma parte da programación conxunta que organizan cada ano o xornal A Voz de Vilalba e o Instituto de Estudos Chairegos.

Elena Gallego Abad (Teruel, 1969) é escritora e xornalista cunha ampla traxectoria profesional, ligada a diversos medios de prensa e radio galegos. Membro do Colexio Profesional de Xornalistas de Galicia e da Federación Internacional de Periodistas, recibiu o Premio Xosé Aurelio Carracedo de xornalismo 1998, no apartado de medios audiovisuais. Deuse a coñecer como narradora coa saga xuvenil Dragal, publicada por Xerais, que se iniciou con Dragal I. A herdanza do dragón (2010), finalista do IV Premio Fundación Caixagalicia de literatura xuvenil en 2009 e premio Frei Martín Sarmiento 2012; continuada por Dragal II. A metamorfose do dragón (2011) e Dragal III. A fraternidade do dragón (2012), e que terá continuidade con futuras entregas. Sete Caveiras (2014) é a súa primeira novela de xénero negro.

Cando a xornalista Marta Vilas descobre o cadáver dun motorista aboiando en augas do porto vigués do Berbés, non pode imaxinar que o pequeno xoguete que o seu asasino agochou no peto do morto está a piques de mudarlle a vida. Aquel click, das primeiras series da desaparecida Famobil, é o único fío que parece unir este asasinato co do garda civil rescatado por un pesqueiro de Cangas. E cos cadáveres que, ao longo dos días seguintes, irán aparecendo na ría de Vigo. Pero ninguén máis o sabe. Sobre a mesa de Marta Vilas comezan a amorearse os xoguetes de colección. Un click motorista roubado do peto dun motorista, un click garda civil atopado preto do corpo dun membro da benemérita, un click pirata esquecido no coche dun informático asasinado... Para a xornalista, apartada da sección de Sucesos por diferenzas co redactor xefe do seu diario, descubrir a identidade do criminal convértese nunha obsesión. Aínda que nunca poderá contar todo o que sabe. Trepidante e por momentos divertida, Sete Caveiras fía unha serie de asasinatos en escenarios reais con sinalados acontecementos dos anos oitenta. Esta novela, tamén homenaxe da autora á profesión xornalística, tece unha engaiolante trama de intriga con banda sonora da Movida.

04/07/2014

0 comentários :

Danos a túa opinión