Amosando publicacións coa etiqueta editorial. Amosar todas as publicacións
Amosando publicacións coa etiqueta editorial. Amosar todas as publicacións

Fin de traxecto

Redacción. -

Cando se cumplen corenta anos do nacemento do xornal A Voz de Vilalba e despois de quince anos na rede da web avozdevilalba.gal, este medio despídese o vindeiro venres 5 de maio coa presentación de catro libros que escolman unha pequena mostra dos artigos publicados na web ao longo destes quince anos. 

Trátase de catro volumes editados polo Instituto de Estudos Chairegos, como parte da súa colección Biblioteca Chairega, que contan con cadansúa ilustración de portada a cargo do poeta e artista plástico Baldo Ramos. O libro Outras voces, con limiar de Marisa Barreiro, presidenta do Iescha, contén corenta artigos (un por cada ano desde o nacemento do xornal en 1983) de, entre outros: Agustín Fernández Paz, Fermín Bouza, Helena Villar Janeiro, Ramón Chao, Bernardo García Cendán, Antón Baamonde, Xulio Xiz… Os outros tres volumes, escolman parte dos textos publicados na web polos tres responsables de avozdevilalba.gal, Paulo Naseiro (Baixo a Pradia, con limiar de María Xosé Lamas), Moncho Paz (Pílulas de vendimario, con limiar de Pilar Maseda e Iria F. Crespo, e epílogo de Miguel Barrera) e Mario Paz González (Como rematar cos libros dunha vez por todas, con limiar de Helena Villar Janeiro). 

O acto de presentación contará coa intervención do xornalista Baruk Domínguez e de Marisa Barreiro, presidenta do Iescha, e terá lugar na Casa da Cultura de Vilalba, o venres 5 de maio de 2023, ás 20:00 horas. A Voz de Vilalba (1983) foi un proxecto de comunicación creado por tres rapaces vilalbeses que durante tres anos sacou á rúa vinte e sete números, converténdose no último dos medios locais da capital chairega que, na primeira metade do século XX chegou a contar con máis de vinte xornais. En 2008, con motivo do 25º aniversario da publicación, aqueles primeiros números foron editados nunha edición facsimilar pola Universidad Rey Juan Carlos e o Instituto de Estudos Chairegos, con limiar de Ramón Villares e Antón Baamonde. 

En 2008 o proxecto renaceu como o dixital avozdevilalba.com (posteriormente .gal), a revista do mesmo título (da que se publicaron 67 números en pdf, e que estractaba os contidos máis importantes da web) e sete números máis en papel que viron a luz entre 2008 e 2014. Chegado o 40º aniversario da cabeceira, quizais a máis importante da historia do xornalismo vilalbés, a efeméride deu pé a estes catro libros, que achegan unha selección de textos publicados, tanto dos tres responsables do xornal, como dunha selecta escolleita de colaboradores.  


5 de maio de 2023

Unha praza para Bernardo

Redacción. -

A Asociación Veciñal de Ferrol Lanuxe, presentou no rexistro municipal do Concello de Ferrol unha petición para adicar a Bernardo García Cendán a nova praza creada ao final da rúa Espartero, nas inmediacións da antiga Fábrica de Lapis como consecuencia da reurbanización da zona.

A idea xurdiu, como explica o devandito escrito, dun grupo de veciños e veciñas do barrio e é que Bernardo non foi só o cura da parroquia senón que estivo estreitamente vinculado ao día a día do barrio. 

Agora, só esperan que a proposta poida ser tida en conta e así o Concello bautice este novo espazo que, ao crearse como novo, non suporía ter que substituír ningunha outra denominación, aínda que sexa unha continuidade de Espartero.

Non é a primeira vez que desde o barrio queren homenaxear a Bernardo García e así na propia igrexa do Socorro celebráronse no seu día actos na súa homenaxe non só pola súa faceta de clérigo, senón polo seu importante labor cultural e como escritor. 

Numerosas figuras do mundo cultural da cidade e da comarca lembraron a García Cendán tras o seu falecemento, o 12 de xuño de 2012.

A publicación de "Unha alborada nova. Bernardo García Cendán", editada pola revista Encrucillada, da que García Cendán era membro activo, recolle o recordo que amigos e compañeiros trazan da polifacética figura do "cura do peirao". Nesta obra inclúense desde poemas e partituras de García Cendán até textos de Xosé Chao Rego, Xulio Xiz, Marica Campo, Manolo Regal ou Agustín Fernández Paz entre outros.

7 de maio de 2022

Día dos Medios en Galego

Redacción. -

Cada 7 de febreiro, trala súa declaración institucional no Parlamento de Galicia, a Asociación de Medios en Galego organiza, coa colaboración da Xunta de Galicia e da Deputación da Coruña, e neste caso co Concello de Santiago, o Día dos Medios en Galego. Unha celebración que lembra a saída da primeira publicación xornalística realizada integramente en galego, O Tío Marcos d’A Portela, en 1876.

As máis de 30 cabeceiras que formamos a AMEGA (https://mediosengalego.gal/medios-en-galego/) e os máis de 140 medios que fan comunicación na nosa lingua  (https://mediosengalego.gal/100-medios-en-galego/), queremos festexar un ano máis esta data.

O lema deste ano será “Bota a lingua a pacer”.

Farémolo dun xeito adaptado á situación actual, cun Roteiro por Santiago de Compostela, vinculado coa lingua galega.

O Roteiro “Compostela e a lingua” desenvolverase o sábado 5 de febreiro, con saída ás 11:30h da Rúa Nova, 34. Durante o roteiro, que estará acompañado polo pasarrúas de Xulio Maside, iranse realizando paradas en lugares simbólicos na loita polo mantemento do idioma.

A primeira será diante da placa dedicada a Roberto Vidal Bolaño, no Salón Teatro. Alí a compañía de teatro Os Quinquilláns representará unha pequena escena dunha das obras do célebre dramaturgo, conmemorando así o vinte aniversario so seu pasamento.

Despois, o roteiro continuará na Praza da Universidade, no antigo Restaurante El Asesino, onde o filósofo Antón Baamonde nos descubrirá a importancia dos faladoiros que había nos locais de hostalería composteláns en tempos de crise.

O escritor Bieito Iglesias será o encargado de vincular a relación entre a Universidade de Santiago de Compostela co galego, noutra parada que se realizará na Facultade de Xeografía e Historia.

Haberá tamén unha visita no Colexio de Santo Agostiño, onde a profesora Anxos García Fonte debullará a relación de Rosalía de Castro coa cidade.

Xa na praza de Cervantes, na Zona C, fará un espectáculo poético-musical a carballesa Rosalía Fernández Rial, despois de que representantes das entidades organizadoras e colaboradoras dean unhas palabras.

26 de xan. de 2022