Barriga Verde na Casa Manuel María

Redacción.-

Este sábado 4 de marzo ás 18 horas o auditorio da Casa-Museo Manuel María en Outeiro de Rei acolle a representación do espectáculo "O conto de Barriga Verde"a cargo do actor Fran Rei. Unha historia escrita por Avelino González a partir de tres obras de Manuel María (Barriga Verde, Os soños na gaiola e Aventuras e desventuras dunha espiña de toxo chamada Berenguela). A dirección escénica da montaxe é de Tereixa Campo.

Este espectáculo, que xa leva arredor de cincuenta representacións, conta a historia de Fiz, un mozo labrego galego, que terá que se enfrontar ao Serrador e ao Demo polo namoramento da sempre belida Moza. Coa axuda da maxia do seu padriño Barriga Verde, vello e neno ao mesmo tempo demostrarán que nada é máis forte que o amor verdadeiro.

O conto de Barriga Verde” dura pouco menos de unha hora e está dirixido especialmente a público infantil e familiar. O prezo do billete é de 2 euros e pódense facer xa reservas a través do enderezo electrónicocontacto@casamuseomanuelmaria.galou chamando ao tel. 698177621.

Esta actividade é programada pola Casa-Museo Manuel María, a ANPA do CEIP Laverde Ruíz de Outeiro de Rei e a ANPA do CEIP Otero Pedrayo de Rábade e conta coa colaboración da Deputación de Lugo.

3 de mar. de 2017

[Ex]posicións críticas 1975-1995

Redacción.-

O Centro Galego de Arte Contemporánea (CGAC) presenta ‘[Ex]posicións críticas. Discursos críticos na arte española, 1975-1995’, un proxecto no que se pon de manifesto o xurdimento, durante esa época, de novos enfoques críticos e interpretativos no panorama artístico do país.

Para abordar as liñas de pensamento nesas dúas décadas, esta “exposición de exposicións” revisa 11 mostras con artistas e comisarios españois realizadas entre 1975 e 1995, co fin de ir trazando o camiño percorrido pola arte nesas dúas décadas, e o pensamento crítico que o sustentou. A mostra conta con dous comisarios: Mariano Navarro e Armando Montesinos.

‘[Ex]posicións críticas’, que abrangue todas as salas do CGAC, estrutúrase en tres grandes bloques, constituídos á súa vez por diferentes proxectos. Cada parte da exposición foi recreada co sentido de evocar as intencións críticas e a atmosfera dunha época de profundas transformacións sociais, culturais e xeracionais, con cambios como a nova figura do comisario de exposicións, a plena incorporación das mulleres ás artes plásticas, a creación de museos e centros de arte contemporánea, o carácter universitario dos estudos de belas artes ou as problemáticas do mercado.

Unha “exposición de exposicións”

O primeiro dos bloques, ‘Criterios interpretativos’, que abrangue os anos setenta e oitenta do século XX, reconstrúe de xeito visual e documental o proceso seguido para incorporar os artistas contemporáneos a escena e nel están representados creadores e creadoras como Carlos Alcolea, Eulàlia Grau, Eva Lootz e os galegos Menchu Lamas, Antón Patiño, Antón Lamazares, Francisco Leiro e Ignacio Basallo, entre outros. As exposicións que contempla esta primeira parte do proxecto son ‘Propac’, ‘1980’, ‘Madrid D.F.’, ‘Fóra de formato’ e ‘Atlántica’, esta última sobre o proxecto do mesmo nome xestionado e impulsado por artistas na década dos oitenta en Galicia, co obxectivo principal de chamar a atención sobre a diversidade da forza creativa galega neses anos.

A segunda parte do proxecto, ‘Interpretacións críticas’, presenta catro exposicións realizadas entre 1990 e 1994: ‘Madrid. Espazo de interferencias’, ‘O soño imperativo’, ‘100%’ e ‘Espazos públicos, soños privados. Trátase de catro proxectos curatoriais, que representan exemplos da verdadeira consolidación do concepto de comisariado no noso país. Finalmente, o terceiro bloque, ‘Desprazamentos teóricos’, comeza cunha exposición, paradoxalmente celebrada no estranxeiro, que aspiraba a marcar o camiño da arte no país nos anos noventa a partir dunha dobre mirada, cara ao pasado e cara ao futuro: ‘Antes e despois do entusiasmo’, comisariada por José Luis Brea. Súas son tamén as outras dúas propostas que conforman esta terceira parte: ‘Iluminacións profanas’ e ‘O punto cego’.

Actividades relacionadas

O proxecto expositivo complétase con ‘Tentativas críticas’, un ciclo de debates que fará un repaso polas principais problemáticas do pensamento crítico actual. Constará de 10 mesas redondas que reunirán máis de 40 artistas, críticos e comisario españois. Esta tarde, ás ás 18:00 horas, previamente á inauguración do proxecto expositivo, celebrarase a primeira sesión, coa participación de Dora García, Martí Manen e Isidoro Valcárcel Medina, e moderado por Juan Bosco Díaz Urmeneta. Nela abordaranse os referentes intelectuais sobre os que os críticos e artistas configuran o seu propio territorio persoal e social.

O escenario destes debebates serán as salas de exposición, nunha das pezas que a conforman: uns bancos realizados por Laboratorio de Luz que configuran un hexagrama do I-Ching e que foran deseñados para acoller uns debates en ARCO 93. As intervencións dos participantes no ciclo publicaranse, xunto con outros contidos, nunha revista dirixida polos comisarios do proxecto e coordinada por Natalia Poncela.

Os comisarios: Armando Montesinos e Mariano Navarro

Armando Montesinos é profesor desde 1989 na Facultade de Belas Artes de Cuenca. Especialista en arte contemporánea, organizou máis de 100 exposicións de artistas nacionais e internacionais, como comisario independente e como director da galería Fernando Vijande nos oitenta, e das galerías Juana Mordó e Helga de Alvear nos noventa. Entre 1983 e 1985 foi subdirector do programa de TVE ‘La edad de oro’, dedicado ás artes e á música. Publicou numerosos textos en catálogos, prensa e revistas especializadas. É membro do Consello de Críticos e Comisarios de Artes Visuais, que actualmente presidente.

Crítico de arte e comisario de exposicións, Mariano Navarro presidiu entre 2005 e 2009 o Consello de Críticos e Comisarios de Artes Visuais, do que é vogal. Desempeñou o seu labor crítico en medios xornalísticos como ‘El País’, ‘ABC’, ‘La Razón’ e, na actualidade, no suplemento ‘El Cultural’ do xornal ‘El Mundo’. Colabora tamén en ‘Artecontexto’, ‘Solar’, ‘Campo de relámpagos’ etc. Comisario de máis de 50 exposicións, é autor do libro ‘La luz y las sombras en la pintura española’ (Espasa-Calpe, 1999). Desde o ano 2000, é membro do xurado do Premio Altadis, España / Francia, do que foi comisario nas edicións 2001 e 2006-2007. Guionista de programas culturais en televisión como ‘Trazos’, ‘Imágenes’, ‘Tiempo de papel’ e ‘La gran galería’, colabora coas editoriais Espasa-Calpe e Anaya, Acento e Ediciónes B, entre outras.

1 de mar. de 2017

Inaugúrase DIDAC con Specchio Paulo Reis

Redacción.-

O vindeiro venres 3 de marzo ás 20.00 horas terá lugar a inauguración de DIDAC (DARDO Instituto do Deseño e das Artes Contemporáneas) coa exposición Specchio Paulo Reis.

DIDAC (DARDO Instituto do Deseño e das Artes Contemporáneas) é unha nova Fundación sen ánimo de lucro, con sede física en Santiago de Compostela, que nace coa intención de divulgar e proxectar o deseño e a arte contemporánea.

DIDAC producirá exposicións e proxectos, programas de conferencias, talleres e cursos. Ademais traballará na construción dun arquivo dixital en constante actualización que será conformado a partir dunha selección de artistas novos, deseñadores, arquitectos, cineastas axentes culturais e por outro físico, capaz de reunir catálogos, revistas, carteis, fotografías e libros de artista que contribúen ao estudo do deseño e a arte contemporánea de España e Portugal no últimos cincuenta anos.

DIDAC inaugura a súa actividade coa exposición Specchio Paulo Reis, unha mostra colectiva comisariada por David Barro, Director de DIDAC, que reúne unha serie de obras de artistas craves dos panoramas portugués e español. Specchio Paulo Reis foi concibida ao redor da figura de Paulo Reis, cofundador xunto a David Barro de DARDOmagazine no ano 2006 e falecido no ano 2011. Con esta exposición, David Barro quere renderlle homenaxe recuperando para DIDAC o espírito e actitude de Paulo Reis en relación das artes, buscando a aproximación entre persoas, tender pontes, construír proxectos comúns e facelo todo desde a máis profunda afectividade.

Paulo Reis sempre reivindicou a posibilidade de soñar porque entendía que o espazo do soño era o espazo da arte, un lugar onde o artista se soña a si mesmo, un lugar para imaxinar, para dar renda solta ás utopías coa intención de transformar a realidade. O conxunto de artistas de Specchio Paulo Reis están próximos a esas premisas: Albano Alfonso e os seus xogos de sombras, a fraxilidade da liña desdobrada dos debuxos de Lygia Pape, o humilde minimalismo do vendedor ambulante de Cildo Meireles, a escura e enigmática escultura de Rui Chafes. Todas estas obras, como as paisaxes debuxadas de Sandra Cinto ou a escultura íntima de Ernesto Neto, convidan a perderse na beleza do inconmensurable. Tamén os traballos de Iran do Espírito Santo, Rui Calçada Bastos, Fernanda Gomes e José Pedro Croft están marcados por unha intensidade enigmática. Ou irónica, como é o caso de Nelson Leirner. Como na pintura de José Bechara todo foxe do noso control e a xeometría se alía co elemento orgánico e incorpora evidencias do accidental, do mesmo xeito en que se expande a pintura na intervención site-specific sobre cristal de Carlos Maciá.

Ademais, para completar a homenaxe inaugural o día 23 de abril, Día do Libro e aniversario do falecemento de Paulo Reis presentarase un libro dedicado á súa memoria, que recolle os traballos desta exposición e algunhas imaxes e fragmentos de textos da súa autoría.
Ás 21.15 horas sesión musical a cargo de Primitivo Eirís con orquestras latinas despeiteadas, rock&roll marciano, yeyeísmo e moito máis

DIDAC.
Pérez Costanti 12 baixo
15702. Santiago de Compostela.
Inauguración Specchio Paulo Reis.
3 de marzo. 20:00 horas.
Entrada libre.

21 de feb. de 2017

DARDOmagazine Anuaria de Ouro

Redacción.-

A revista galega DARDOmagazine foi recoñecida co Anuaria de Ouro ao mellor deseño dunha publicación periódica.

Os recoñecidos Premios Nacionais de Deseño Anuaria contan cun gran soporte do sector do deseño, o que lles outorga unha importantísima difusión e convérteos nun referente de calidade dentro desta profesión.

Ademais deste recoñecemento, a editorial e estudo de deseño DARDO obtivo unha Selección Anuaria en dúas categorías, unha á mellor cuberta de libro -co catálogo deseñado para a exposición Impulsores do movemento abstracto celebrada na Casa da Parra e organizada pola Xunta de Galicia- e outra ao mellor catálogo -Raúl Artiles. Black Hole, deseñado para o CAAM-Centro Atlántico de Arte Moderna de Las Palmas de Gran Canaria.

O xurado destes premios está formado exclusivamente por representantes das asociacións profesionais e centros de deseño nacionais, que valoran a creatividade, a coherencia entre función, mensaxe, público e estratexia, a innovación, o valor comercial e a interrelación entre as diferentes disciplinas profesionais.

DARDOmagazine, que hai uns meses foi tamén recoñecida cun diploma ao Mellor Deseño de Diario ou Revista nos latinoamericanos Premios CLAP, Premios Internacionais de Deseño Industrial e Deseño Gráfico, presentará o seu próximo número –nº 30- a próxima semana en Madrid, cun stand individual na Feira Internacional de Arte Contemporánea - ARCO.

16 de feb. de 2017

Aldaolado na Casa Museo Manuel María

Redacción.-

O auditorio da Casa-Museo Manuel María en Outeiro de Rei acolle este venres 17 de febreiro ás 20.30 horas o espectáculo de ALDAOLADO tituladoPendanca e oso. Poesía, música e humor son os eixos sobre os que xira esta proposta, cuxa temática é o amor.

ALDAOLADO é un proxecto formado polas poetas Lucía Aldao e María Lado onde se entremesturan a poesía, o humor e a música a partes iguais nunha posta en escena cargada de orixinalidade e espontaneidade.

En palabras das creadoras e protagonistas desta proposta, o espectáculo que o vindeiro venres se poderá ver en Outeiro de Rei é “unha narración das aventuras ou desventuras amorosas de cada un e de cada unha, da que xorden paixóns desenfreadas, anos de martirio, cotas altas de felicidade, ansiedades varias, gozos e sombras.” Os poemas que ALDAOLADO recitarán neste espectáculo “xorden precisamente dese caldo de cultivo, póndolle moita música e moito humor ao amor máis romántico e ao amor máis miserábel”. Se houbese que definir brevemente o que é Pendanca e oso sería así: “dúas poetas no escenario co corazón aberto en canal e escarallándose. Unha fábula que conta e canta o peor e o mellor do currículo amoroso da humanidade”.

O prezo da entrada para este espectáculo é de 5 €. Os billetes pódense reservar desde xa mesmo a través do correo electrónicocontacto@casamuseomanuelmaria.galou do teléfono 698 177 621, sendo esta a opción que a Casa-Museo recomenda tendo en conta o aforo limitado do auditorio. As entradas retiraranse desde 1 hora e até 10 minutos antes do inicio da función na mesma Casa-Museo. Poranse á venda nese momento as entradas sobrantes, se as houber, até completar o aforo dispoñíbel.

15 de feb. de 2017

Residencias artísticas MAC

Redacción.-

Xa están dispoñibles as bases do Programa de Residencias Artísticas Locais e Internacionais para esta primavera. Catro artistas ou profesionais da cultura menores de 45 anos poderán desenvolver o seu proxecto nas instalacións do MAC entre o 2 de maio e o 30 de xuño de 2017.

Para iso, cada un dos residentes seleccionados recibirá, ademais dun espazo de traballo nas instalacións do museo, un apoio total de 3000 € en concepto de honorarios e até 400 € destinados a produción de obra. Para non interromper a dinámica de traballo e fomentar a interacción cos demais residentes, estarán incluídos tamén todos os xantares de luns a venres.

Se tes un proxecto en mente e queres compartir o teu proceso con outros artistas e creadores, envíanos a túa solicitude até o 27 de febreiro a través do formulario que atoparás na web.

Consulta as bases completas de cada convocatoria:
www.mac.gasnaturalfenosa.com

11 de feb. de 2017

Volver a Otero


Mario Paz González.-

De entre todas as novidades editoriais saídas do prelo en Galicia o ano pasado, hai unha que penso que non foi comentada tan abondo como debía. Refírome á reedición por parte da editorial Galaxia e da Fundación Otero Pedrayo de Parladoiro. Trátase da recompilación de artigos literarios publicados na prensa polo señor de Trasalba, o gran don Ramón Otero Pedrayo, e que hai máis de corenta anos, en 1973, realizara o profesor Carlos Baliñas Fernández. Este volume é, sen dúbida, imprescindible para todos aqueles lectores ávidos da obra do ourensán, pero, tamén, para os que non a coñezan abondo, pois trátase unha escolma máis que representativa que, por riba, o propio autor revisou e aprobou en vida.

O título da mesma está tomado da sección homónima que Otero iniciara, en galego, no diario vespertino de Santiago La Noche en 1946, sendo así, segundo lembra Carlos Baliñas, “a primeira e, daquela, única presenza da nosa lingua na prensa diaria”, o que demostra a valentía e o compromiso do autor de O fidalgo naquelas décadas escuras. Con todo, aínda sendo os artigos desa etapa maioría, a súa procedencia é moi diversa. Inclúe, por exemplo, textos dos anos vinte e trinta publicados en A Nosa Terra, Céltiga, Nós, El Pueblo Gallego e tamén algúns outros posteriores á etapa do xornal compostelán. No libro non están agrupados en orde cronolóxica, senón temática, en diferentes seccións cuxos títulos están tomados de textos do propio autor. A diversidade de temas que abrangue, e que estes títulos revelan é, como o conxunto da súa propia obra, inesgotable, ofrecendo todos, ou case todos, os asuntos máis habituais da mesma: “Xentiña na cidade”, “Nova Galicia”,”Cavilacións”, “Faíscas da Historia”, “O engado dos libros” son algúns deles. Pero tamén os dedicados á literatura, á amizade ou ás viaxes: “Escritores”, “Pelerinaxes”, “Buenos Aires”, “Letras de fóra”…

Mesmo para o lector de hoxe os artigos de Otero escollidos (e, probablemente, os miles que quedaron fóra da antoloxía) presentan unha enorme forza literaria, mostra da grandeza dun escritor que foi (que dúbida cabe) o creador da prosa culta en galego. Neles don Ramón observa, unhas veces con ironía e distancia, outras con tenrura e comprensión, o mundo que o rodea e ao que non é alleo, malia vivir agochado no seu refuxio de ideas, libros e amizades. Achéganos, así, a súa visión da vida a través dun labirinto de palabras e imaxes prodixiosas que lle serven para ires reconstruíndoa diante dos nosos ollos, mais non cun desexo de inventariar a realidade, senón de ofrecérnola a través da arte tan sutil como difícil da concisión e a suxestión, retratando o instante cunha beleza impresionista. Móstranos, como suxire Carlos Baliñas, “unha fotografía en palabras” que, engade, vén ser “un complemento da outra Guía de Galicia, da que publicou desde enfoque xeográfico, administrativo e artístico”.

A angueira compiladora levada a cabo en 1973 por Baliñas é máis que meritoria. Segundo el mesmo recoñece, os artigos anteriores á guerra nin sequera podían atoparse nas hemerotecas, “soamente sabían deles os vellos galeguistas, que tiñan bo coidado de non dicilo en público”. Grazas a eles e ás pescudas realizadas en bibliotecas específicas, como a da Real Academia Galega, puido facerse un amplo inventario e a recompilación final.

Haberá quen poida pensar, se cadra, que os máis de cento trinta artigos escolmados son poucos tendo en conta a amplitude da obra xornalística de Otero Pedrayo. Cómpre lembrar que hai xa tempo que o Centro Ramón Piñeiro recompilou e transcribiu algo máis de setecentos artigos publicados en La Noche entre 1946 e1949. Precisamente hai un par de anos outro grande, Xesús Alonso Montero, declaraba patrimonio da Humanidade o “Parladoiro” de Otero e pedía a publicación íntegra do mesmo. Aínda que iso non teña sido posible até a data, alomenos este libro é un adianto máis que significativo.

Cando se publicou por vez primeira, en 1973, este Parladoiro constituía o primeiro tomo dun intento de editar as “Obras selectas” en galego de Otero Pedrayo que ía ficar finalmente malogrado, malia chegar a saír do prelo en 1983 outra recompilación, neste caso baixo o título de Ensaios e algunha que outra novela, como Os camiños da vida nunha magnífica edición de Carlos Casares. Por sorte, desde hai uns anos a editorial Galaxia retomou o proxecto e, en colaboración coa Fundación Otero Pedrayo, anda a recuperar en edicións modernas algúns dos títulos máis importantes que conforman a inmensa obra deste prolífico poeta, novelista, ensaísta, autor de teatro, historiador, xeógrafo, memorialista, articulista e orador, entre outras moitas cousas. E, sempre, autor imprescindible das nosas letras.


Ramón Otero Pedrayo
Parladoiro
Edición e prólogo Carlos Amable Baliñas Fernández
Vigo: Galaxia. 2016
488 pp.

8 de feb. de 2017

Antonio Castro, cableado da memoria

Antón de Guizán.-

As treboadas destes días, esas que agora levan o rinbombante nome de cicloxénese explosiva -manda carallo-, ademáis de facernos lembrar con bastante mala ostia do compadreo do goberno de Rajoy coas eléctricas (a última proba, a porta xiratoria para "Cuco" Fernández de Mesa no Consello de Red Eléctrica Española), traeme tamén á memória un nome relacionado coa luz eléctrica por razóns moito máis positivas: Antonio Castro.

No 2019, cumpriranse 60 anos da chegada da luz eléctrica aos Vilares e por eses tempos, tamén, a outras moitas parroquias da comarca pola iniciativa dun home autodidacta, formado na Habana na instalación de cableado telefónico na capital da illa, amante da música e das artes e preocupado por levar calidade de vida a un rural naqueles tempos sumido na escuridade. Lembrao a sua filla carretando postes por montes e corredoiras co seu Ford, sabedor de que máis aló duns troncos e uns fíos de cable estaba clavando os peares da calidade de vida futura. A luz eléctrica, supuxo un adianto repentino que levou ao rural ao cambio, a abrirse ao mundo tecnolóxico despois de séculos. Non exento de problemas pola precariedade de materiais e recursos hidráulicos para xerar corriente, debeu tamén enfrentarse, xa daquela aos intereses de compañías máis interesadas no negocio que no servizo. Antonio Castro ten realizado instalacións sen contador en numerosas vivendas sen recursos e sofrido boicots mesmo en datas tan emblemáticas como A Pascua daquel 1959 na que tiña previsto sacar das tebras dos candís e das velas á súa parroquia. António, como tantos xenios, foi un mal negociante do que compañías como FENOSA e Barras Eléctricas teñen sacado rendimento do seu emprendemento e ao que debemos rescatar para a memória colectiva. Pensemos só cos apagóns destes días, na heroicidade cotián dos nosos avós até os anos 60 (hai nada) sen ter siquera unha bombilla.

Aqueles que coñeceron e traballaron con Antonio Castro, constatan a súa intelixencia e bondade, o seu mérito e tamén o rápido que o paso do tempo fai esquecer que o que hoxe é un servizo básico (un grande negocio para quén o explota), tivo orixe en numerosas parroquias de Guitiriz, Aranga ou Vilalba nun home adiantado ao seu tempo, na tecnoloxía e na humanidade, Antonio Castro, que nestas treboadas debemos rescatar para a memória. Si naqueles tempos o precario servizo supuxo un antes e un despois na vida das persoas, hoxe non se xustifica a pesima calidade do mesmo nin os prezos nun país no que somos excedentarios de enerxía eléctrica. O mundo precisa de moitos Antonio Castro.

7 de feb. de 2017

Rede Galega de Música ao Vivo

Redacción.-

A Rede Galega de Música ao Vivo, circuíto promovido pola Axencia Galega das Industrias Culturais (Agadic) da Consellería de Cultura e Educación en colaboración cunha trintena de salas das catro provincias, programará durante este primeiro semestre do ano 87 concertos e monólogos dun total de 32 formacións artísticas, galegas na súa meirande parte.
Esta rede, para a que se conta tamén coa implicación da Asociación Galega de Salas de Música ao Vivo Clubtura, dispón de espazos asociados en 19 localidades e dun orzamento para esta carteleira semestral de 44.600 euros, dos que 37.910,85 son achegados pola Agadic e os 6.690,15 restantes polos espazos que programan durante este período.
O obxectivo prioritario do circuíto é atender as necesidades de distribución dos grupos e intérpretes musicais galegos de moi diferentes estilos, ademais de contribuír á estabilidade na programación das salas galegas de música en directo.
Oitenta e catro concertos e tres monólogos

Neste sentido, os concertos constitúen a oferta predominante da RGMV, que ata xuño programará un total de 84 concertos e tres monólogos. Cunha media de tres actuacións por grupo, destacan nesta relación artística nomes como The Lákazans, con seis concertos, Villanueva con cinco e Igloo e Ivy Moon con catro cada un. A rede programará tamén a Adrián Costa, Aló Djangó, Andhrea & The Black Cats, Banda Crebinsky, Brigada Bravo & Díaz, Clave de Fado, Dakidarría, Eladio y los Seres Queridos, Faltriqueira, Far Away Place, Ith, Maryland, MJ Pérez, Piña, Por Placer, Secho y los Invisibles, Sinestesia, Sonia Lebedynski, Sumrrá, The Llolipops, Tincho Fernán, Tonichi y Pacheco, Tractor Troy, Helena Goch, The Lines e Frankie Chávez. A oferta complétase cos monólogos de Alberte Montes e Padre Merino.
Xunto coa Rede Galega de Salas, a Rede Galega de Teatros e Auditorios e Cultura no Camiño (os outros tres circuítos de distribución de espectáculos xestionados pola Agadic), a RGMV ofrécelles aos grupos musicais galegos unha canle estable de exhibición, ao tempo que lles achega aos espectadores unha moi variada oferta, tanto no que se refire aos estilos musicais como á descentralización xeográfica.
Este calendario cultural, que pode consultarse en www.cultura.gal/axenda e www.agadic.gal/Axenda, esténdese polas seguintes salas: BâBâ Bar da Coruña, Fórum Celticum de Culleredo, Sala Super 8 de Ferrol, A Ventana de Laxe, A Fundación e Pub Gatos de Melide, Borriquita de Belém, Casa das Crechas, Moon Music Club, Sala Capitol e Sala Sónar de Santiago de Compostela, Sala O Muíño de Cervo, Club Clavicémbalo de Lugo, Café Bar Cultural Roi Xordo de Allariz, Sala Baranda do Barco de Valdeorras, Café Cultural Auriense de Ourense, O Con do Moucho da Illa de Arousa, Aturuxo de Bueu, SalaSon de Cangas, Var con Uve de Moaña, Náutico do Grove, Sala Karma de Pontevedra, El Contrabajo, La Casa de Arriba, La Fábrica de Chocolate Club e La Iguana Club de Vigo e Sala Bianco Sama de Vilagarcía de Arousa.

Obradoiros da Rede Museística


Redacción.-

Desde o luns, 6 de febreiro e ata o venres, 10 de febreiro, queda aberto o prazo de inscrición no MPLugo para participar en dous obradoiros dirixidos aos membros do Club Sénior da Rede Museística
Obradoiros
1.-Pintamos e creamos
Como funciona a cor! Como se representa a forma! Que debemos ter en conta á hora de pintar un cadro.
2.-Memoria
A memoria visual e a auditiva; a cor e a forma. Onde almacenamos as lembranzas!
Dirixido a: Club Sénior da Rede Museística
Calendario: Todos os xoves, desde o 23 de febreiro ao 27 de abril.
Horario: de 17:00 a 18:30 h.
Inscricións: Departamento de Didáctica do MPLugo (desde o 6 ao 10 de febrero).
***
Museo Provincial de Lugo. Tfno..: 982 24 23 00 / 982 24 21 12 / didactica@museolugo.org
Xerencia da Rede Museística: Tfno.: 699 836 883 / xerencia-redemuseos@deputacionlugo.org
+ info

5 de feb. de 2017

Presentación de 'O álbum de Garrincha'

Redacción.-
A Casa da Cultura de Vilalba ía acoller o venres 3 de febreiro, a partir das oito e media do serán, a presentación do libro: O álbum de Garrincha, escrito por Beatriz Maceda Abeleira e ilustrado por Laura Veleiro, mais finalmente a presentación quedou suspendida por problemas de asistencia das autoras debidos á climatoloxía. Malia todo, agárdase que, en breve, poda levarse a cabo.

O libro foi publicado pola Editorial Galaxia na súa colección Árbore e está a ter unha gran acollida polo público; xa que acadou dúas impresións no seu primeiro ano de edición.

A súa autora, Beatriz Maceda Abeleira, viviu en Vilalba a súa infancia, dende os catro anos, e a súa adolescencia e estudou no Instituto Basanta Silva. Na actualidade é profesora de inglés no colexio Raquel Camacho, de A Coruña. Publicou hai uns anos o seu primeiro libro: Man. O alemán de Camelle, tamén con ilustracións de Laura Veleiro e cuxa presentación en Vilalba organizou tamén o IESCHA.
A ilustradora do libro, Laura Veleiro, asturiana de nacemento e residente na Coruña, ten unha gran relación coa nosa vila xa que a súa parella dirixe desde hai varios anos a Banda de Música de Vilalba.
Os pais do protagonista do libro O álbum de Garrincha emigraron a Galicia cando o seu fillo João era aínda un neno; a través do fútbol, vai conseguir entender o mundo, ás veces hostil, que o rodea na Galicia que o acolleu. João sempre ten en mente a historia de Garrincha, futbolista brasileiro medio coxo, coa columna vertebral como unha interrogación, que chegou a formar parte da selección de Brasil que gañou un Mundial e pasou a ser considerado un dos mellores futbolistas de todos os tempos.

31 de xan. de 2017

Homenaxe a Agustín Fernández Paz en Ferrol

Redacción.-

O 17 de febreiro de 2017, ás 20:30h, renderáselle unha sentida homenaxe ao mestre, escritor e amigo Agustín Fernández Paz no Auditorio de Ferrol.

Na gala proxectaranse diferentes partes dun documental sobre as súas vivencias na zona de Ferrolterra e haberá actuacións musicais da man de Guadi Galego, María Manuela, Xabier Díaz, BellónMaceiras, Mini e Mero, Miro Casabella e A banda da Loba.

Recollida de billetes (desde o xoves 9 ao venres 17 de febreiro):
De martes a sábado: Despacho de billetes do Teatro Jofre, de 11 a 13h e de 18 a 20h.
Domingo: Despacho de billetes do Auditorio de Ferrol, de 11 a 13h.
* O día da gala estarán dispoñibles no Teatro Jofre (de 11 a 13h) e no Auditorio de Ferrol desde 2h antes do evento.
A entrada será de balde ata completar aforo.

Agustín e a súa dona Inma chegaron a Mugardos a finais dos anos setenta. Alí traballaron no colexio Unión Mugardesa, centro do que posteriormente Agustín foi director. Alí tamén participaron activamente nas diferentes edicións das Xornadas Pedagóxicas de Mugardos e dende alí promoveron, canda outras persoas mestras da zona, a creación do Grupo Avantar, movemento de renovación pedagóxica que, xunto con outros do país, daría orixe posteriormente –no 1983- á actual Nova Escola Galega.
Tamén desde aquí colaborou na edición de múltiples materiais didácticos, maiormente editados por Edicións Xerais, colaboración que durou ata practicamente a fin dos seus días, e foi un loitador incansable pola defensa da normalización da nosa lingua e por unha educación renovada e galega.
Foi neste ámbito de Ferrolterra onde empezaron a xurdir as súas primeiras obras, que logo acadarían cumes literarios no ámbito da LIX nunca antes vistos na nosa lingua.
De Mugardos marchou vivir a Vigo e son multitude as persoas amigas que deixou nesta zona, ás que sempre tivo no corazón. A súa pegada queda tamén nos nosos e nos de tantos colexios, institutos e entidades culturais que puideron contar sempre coa súa desinteresada e afectiva colaboración.

Premio Modesto R. Figueiredo

Redacción.-

O acto de entrega do premio Modesto R. Figueiredo terá lugar o venres 3 de febreiro ás 20:30 h. no salón de actos da Biblioteca Municipal “Varela Jácome” (Praza do Concello, 1) de Lalín.

O Premio Modesto R. Figueiredo é o nome que recibe o Certame Nacional de Narracións Breves convocado polaFundación do Padroado Pedrón de Ourodesde 1975 para textos en lingua galega dun máximo de trinta páxinas, na actualidade o premio está dotado con 1.000 euros, podendo concederse dous accésits de 240 euros.

Outorgouse pola vez primeira en 1975 co nome de Concurso de Narracións Curtas Pedrón de Ouro pero a morte do seu patrocinador, Modesto Rodríguez Figueiredo vicepresidente do Pedrón de Ouro motivou que o premio adoptase o seu nome desde a terceira edición en 1977.

O Premio é un dos máis importantes do panorama literario galego que nas dúas primeiras edicións da convocatoria (1975 - 1976) premiou a destacados escritores como Xoán Ignacio Taibo,Xavier Alcalá, Xosé Luís Méndez Ferrín,Xavier Rodríguez Barrio, Xosé Manuel Martínez Oca e Carlos Durán.

Posteriormente serviu para dar a coñecer a autores que contribuíron á renovación da literatura galega comoSuso de Toro, Tucho Calvo, Carlos G. Reigosa, Antón Cortizas ou Ramiro Fonte.


26 de xan. de 2017

Homenaxe a Sara Jato

Redacción.-

O IESCHA (Instituto de Estudos Chairegos) organiza o vindeiro sábado 21 de xaneiro de 2017 a partir das oito do serán na Casa da Cultura de Vilalba, un acto de homenaxe a Sara Jato Álvarez que constará dos seguintes apartados:

- PRESENTACIÓN DO CADERNO DE ESTUDOS CHAIREGOS, Nº 8 no que intervirán o presidente do Iescha, Manuel Castro Santamariña, e Martin Pawley, autor dun artigo sobre Agustín Fernández Paz, a quen vai dedicado este Caderno. 

- ACTO DE ENTREGA A SARA JATO DA PLACA E DO DIPLOMA DE SOCIA DE HONRA DO INSTITUTO DE ESTUDOS CHAIREGOS segundo o acordo tomado por unanimidade na última Asemblea Xeral do Iescha. Neste acto intervirán Marisa Barreiro, vicepresidenta do Iescha, Rafa Yáñez, poeta e sobriño da homenaxeada, así como outras persoas.

- APARTADO MUSICAL correrá a cargo do Grupo de Cámara da Banda de Música de Vilalba que interpretarán dúas pezas que seguro serán do agrado do público asistente.

17 de xan. de 2017

Joe Nuñez-Miño na Casa das Insuas

Redacción.-

Este venres 20 de xaneiro ás 19:30 no C.E.N Casa das Insuas (Rábade, Lugo), Joe Núñez-Miño, Doutor en ecoloxía tropical, falaranos do traballo que o Bat Conservation Trust (a maior entidade das que traballan no estudo e conservación dos morcegos en Europa) realiza con estes mamíferos voadores no Reino Unido.

Esta charla encádrase nas actividades previstas polos compañeiros de Drosera neste 2017 para celebrar os 10 anos do seu programa de conservación e estudo dos morcegos "Morcegos de Galicia" .

Poesías penduradas das farolas (2ª ed.)

Redacción.-

Segunda edición de POESÍAS COLGADAS DE FAROLAS, con poemas manuscritos da NPG Nova Poesía Guitirica, Martiño Maseda e Raúl Gómez Pato coa temática contra a viomencia machista.

A partires do vindeiro sabado 7 de xaneiro, Guitiriz será un libro comectivo de poemas contra a violencia de xénero e as farolas as suas páxinas a pé de rúa.

@s poetas da NPG Judiña de Lea, Jaki Quintela, Mar Beres, Fátima Fernández, Antón de Guizán, Pas Veres, Luz Campello, Xelo Teijido, André da Ponte, Xosé Antón Cascudo, Adriana Quijada, o vilalbés Martiño Maseda e o gañador do I Premio de poesía Díaz Castro Raúl Gómez Pato, encherán de versos a vila da pedra e da auga nesta II edición de POESÍAS COLGADAS DE FAROLAS 2017 de poemas achegados á xente e de compromiso contra o terrorismo contra as mulleres.

O mencer do domingo 8 de xaneiro en Guitiriz será un xigantesco poemario de versos libres clamando contra a viencia e as farolas darán luz ademáis de alumear as noites.

5 de xan. de 2017

Aparece o brinde perdido de Conxo

Redacción.-

Un documento "histórico" que se cría perdido, o "Brindis" que pronunciou o estudante de Menciña Luís Rodríguez Seoane no histórico Banquete de Conxo, foi localizado na Biblioteca Nacional de España. Trátase do terceiro brinde pronunciado no banquete do 2 de marzo de 1856.

A localización do documento, o pasado decembro, foi posible grazas á xestión dos filólogos Damián Suárez e Xurxo Martínez González, conta a editorial. Este último é un dos coautores da obra "Os últimos carballos do Banquete de Conxo", que acaba de publicar Alvarellos Editora e onde este recentemente achado documento incluirase como separata, aínda que para unha segunda edición da obra está previsto que apareza como apéndice especial.

Até hoxe coñecíanse outros dous brindes pronunciados baixo a carballeira de Conxo, os dos poetas Aurelio Aguirre e Eduardo Pondal, pero críase perdido, mesmo inexistente, o do terceiro dos organizadores daquel encontro, Luís Rodríguez Seoane. Alvarellos resalta que o achado na Biblioteca Nacional do terceiro documento permite completar os tres pronunciamientos feitos naquel insólito acto democrático que convocou nunha mesma mesa a estudantes e artesáns.

O brinde de Rodríguez Seoane está escrito en castelán e estruturado en once cuartetos. Está impreso nunha folla volandera para facilitar a súa difusión de man en man pola cidade e saíu da mesma imprenta que o de Aurelio Aguirre, informan desde Alvarellos.

4 de xan. de 2017

Entrar aos Vilares o 3 en Vilalba

Redacción.-

O próximo dia 3 de Xaneiro, preséntase en Vilalba o documental ENTRAR AOS VILARES,de Cibrán Tenreiro e producido pola Asociación Sociocultural Lareira de soños.

A proxección será ás 20:30 da tarde no Centro Cultural e Recreativo de Vilalba e organizado polo IESCHA Instituto de Estudos Chairegos.

Unha vez rematado o pase, de 55' de duración haberá un.coloquio entre o público e os produtores Pas Veres e Antón de Guizán da Lareira de soños.

Comenza así unha serie de proxeccions por Galicia do filme que seguirá por Betanzos, Lugo, Lalín, A Coruña, A Mariña, Costa da Morte, Ourense, e algúns festivais e mostras neste vindeiro ano.

Engadimos sinopse e teaser, e en arquivos adxuntos ficha técnica e cartel.

SINOPSE:

Tres mozos entran a unha parroquia de Guitiriz que descoñecen co encargo de realizar un documental syobre ela. Entón: 

1) Preguntan aos veciños tentando comprender a identidade do lugar seguindo unha cita de Charles Seignobos que leron na universidade: “Lamento non ter podido tratar máis que dunha maneira moi incompleta os feitos da vida cotiá, alimentación, vestido, habitación, usos de familia, dereito privado, diversións, relacións de sociedade, que constituíron o principal interese da vida para a enorme maioría de individuos”.

2) Tentan vincular o que aprenden á súa propia identidade e ás súas propias experiencias, sendo da primeira xeración das súas familias que non naceu na aldea. E cuestionan o resultado: non queren dar outra visión nostálxica do rural pero non teñen claro se o conseguen.

3) Pasean por leiras e casas abandonadas, xogan, distraense mirando aos animais e desvíanse das súas propias intencións como se estiveran facendo un vídeo doméstico.


Watch this video on Vimo:
https://vimeo.com/189907926

3 de xan. de 2017