Proyectos das FeAs

Redacción.-

As FeAs, colectivo de máis de 30 asociacións da Terra Chá e a contorna, na ultima asemblea en Muimenta, decideu coordinar as actividades socioculturais da comarca mesmo deseñando unha axenda que comprometa a todas as asociacións.

Tamén decidiron artellar un festival a prol do proxecto “Salvemos a Casa de Díaz Castro, xa que unha vez recuperada vai ser a Casa da Xente, un espazo aberto para todas as asociacións, na liña de colaborar para manter viva a nosa cultura nun rural cada volta máis despoboado. Cadran en que compre unirse para loitar polo futuro da nosa comarca que asenta as súas raíces neste xeito de convivir.

4 de ago. de 2017

Volve o Festiclown de Vilagarcía

Redacción.-

O Festival Internacional de Clown de Galicia, Festiclown, volve ter lugar por terceiro ano consecutivo en Vilagarcía de Arousa, onde do 10 ao 15 agosto celebrará a súa edición máis internacional a prol da difusión e da reivindicación das artes escénicas do circo e dos pallasos a través dun programa maioritario de teatro de rúa.

De feito, o cruzamento de dúas vías principais da zona peonil da localidade arousá acolleu esta mañá unha pequena actuación da compañía Os Sete Magníficos Máis Un para a presentar os contidos do Festiclown 2017, un dos nove festivais escénicos galegos que contan este ano con subvención da Xunta de Galicia a través das axudas da Axencia Galega das Industrias Culturais (Agadic).
 
Para deixar testemuño deste apoio, participou no acto o director da Agadic, Jacobo Sutil, xunto co alcalde de Vilagarcía, Alberto Varela, o cordinador do Festiclown, Nacho Fungairiño, da cooperativa Culturactiva, e demais representantes institucionais e privados que colaboran co certame.
 
Solidario e lúdico
Na súa intervención, Jacobo Sutil, incidiu na posta en valor do xénero clown que se fai anualmente desde este evento, tanto pola función social e reivindicativa do teatro que tradicionalmente representa, como polas súas posibilidades de achegamento escénico que lle brinda a todos os públicos en calquera tipo de escenario, “sempre buscando o sorriso, pero propiciando tamén a reflexión”, dixo.  O director da Agadic apelou tamén as características solidarias, participativas e lúdicas do Festiclown.
 
Na súa vindeira edición, o Festiclown desenvolverase practicamente na súa totalidade nas rúas para chegar a toda a cidadanía. Ademais, este ano recibe algúns dos nomes máis destacados da escena internacional, como a compañía belga Okidok, coa cómica Slips, a  Fundación Tchyminigagua, que trae desde Colombia os seus impresionantes números de zancos sobre patíns, ou a brasileira Circo no Ato, que xira por Galicia co seu espectáculo realizado tras un ano de traballo en colaboración coa Central del Circ de Barcelona, o Circo Crescer e Viver e a Escola Nacional de Circo do Brasil. Tamén estará Desastronauts, compañía integrada polo británico Girisho Gordon e por Raquel Veganzones, con sede en Galicia, que presentará o seu espectáculo Máis alto aínda.
 
Nos apartados Certame Intergaláctico Superroquiños participarán algúns dos máis recoñecidos grupos de clown, malabares e maxia, como a pallasa Natalia Outeiro “Pajarito”, con A vida tola; a compañía asturiana Vaques, con Ye orbayu; a vasca Malas compañías, con Txatarra; ou as galegas Píscore, co seu Concerto singular (e plural), e mais Circo Chosco,con Forzu2.
 
O Festiclown, que tamén ofrece un programa formativo mediante tres cursos a cargo de Antón Valén, Laura Muñoz e Mago Teto, estenderase ás parroquias da vila e a outras localizacións pola súa vocación de achegar a cultura a todos os destinos. Así, os lugares de Guillán, Carril, Castroagudín, Solobeira e Cornazo poderán gozar tamén de actuacións do mago Dani García ou de Fran Rei; os nenos e nenas ingresados no Hospital do Salnés recibirán a pallasa Laura Mandarina; e os que asisten ao campamento urbano municipal vivirán a acción inaugural do festival o 10 de agosto.  
 
O carácter solidario do Festiclown quedará tamén patente na parte do programa relacionada coa acción social. Así, a a Gala Solidaria Infantil, o domingo 13 no Salón García, presentará os magos Teto e Dani García, Os Sete Magníficos Máis Un e Jano Costas. A recadación destinarase aos proxectos que Pallasos en Rebeldía desenvolven en diferentes lugares do mundo.

-Programa de man do Festiclown 2

29 de xul. de 2017

O retorno do Pergamiño Vindel

Redacción.-

A Universidade de Vigo e a Xunta de Galicia, representados polo reitor, Salustiano Mato, e o conselleiro de Cultura, Román Rodríguez, veñen de asinar o acordo de colaboración para organizar a programación das actividades derivadas da chegada a Vigo do Pergamiño Vindel, un dos cumios da literatura medieval galego-portuguesa e un documento de excepcional relevancia para a historia cultural de Galicia. A colaboración entre ambas institucións permitiu que a primeira exposición pública da que se ten constancia deste documento de incalculable valor se realice en Galicia.

O conselleiro cualificou este fito como “moito máis que unha exposición bibliográfica, un proxecto de país”. Neste sentido, explicou que na exposición o Pergamiño Vindel estará acompañado doutras importantes pezas que axudarán a contextualizar e pór de relevancia a súa importancia no marco da lírica medieval galego-portuguesa, berce das nosa literatura e tradición musical culta, ademais de ser un fenómeno estudado en profundidade dentro e fóra das nosas fronteiras.

O conselleiro rematou a súa intervención lembrando unhas palabras de Ramón Piñeiro pronunciadas no seu ingreso na Real Academia Galega: “o pobo é a unidade natural de convivencia, a cultura é a súa forma e a lingua é o seu vehículo.”

No acto presentouse tanto a identidade corporativa deste fito cultural e deuse a coñecer a páxina web que albergará toda a información sobre a chegada do Vindel a Galicia e o ambicioso proxecto expositivo e programación cultural que se está a preparar ao seu redor, que xa está dispoñible e accesible no enderezohttps://uvigo.gal/eventos/proxecto-vindel/ .

O Pergamiño Vindel será exposto no Museo do Mar de Galicia, en Alcabre, un lugar idóneo tanto polas súas condicións técnicas –que foron validadas pola Morgan Library Museum, onde permanece depositado o pergamiño– como pola súa situación, na entrada do mar de Vigo que inspirou as sete cantigas de amigo que Martín Códax plasmou no Vindel. Ao seu carón, poderanse contemplar unhas 40 pezas de relevancia histórico-cultural datadas entre os séculos XII ao XV, distribuídas nas sete partes que conforman a mostra – comisariada por Francisco Singul- e que se corresponden coas sete cantigas recollidas no pergamiño. A mostra estará aberta ao público entre outubro de 2017 e marzo de 2018.

O acordo asinado recolle que a Consellería asume os gastos derivados da exposición do Pergamiño Vindel no Museo do Mar de Galicia como poden ser o acondicionamento dos espazos, o comisariado e o deseño da exposición, incluída a edición do libro-catálogo. Pola súa banda, a universidade faise cargo dos gastos derivados do Agreement for Outgoing Loans que inclúe, entre outros aspectos, o transporte, a mensaxería, as taxas de rexistro ou os complementos da póliza de seguro.

Asemade, contémplase a colaboración entre ambas institucións na elaboración dun programa de actividades que, xunto coa mostra, constituirá o proxectoPergamiño Vindel. Un tesouro en sete cantigas.

Historia dun retorno
Ao abeiro da colaboración entre Xunta de Galicia e Universidade de Vigo o Pergamiño Vindel, que leva 40 anos depositado na Morgan Library Museum (Nova York), sairá por primeira vez da cidade dos rañaceos para retornar a Vigo, á contorna que as inspirou.

O Pergamiño Vindel, no que o nome de Martín Códax aparece na parte superior, foi escrito en tinta negra e os pentagramas en vermello, mentres que as iniciais están ornamentadas en vermello e azul.

Escrito por unha soa cara a catro columnas con 26, 24, 23 e 17 liñas respectivamente e cunha dimensión de 34 x 45 centímetros, nada se soubo da obra de Martín Códax durante séculos ata que en 1914 o comerciante madrileño de libros antigos Pedro Vindel atopouno na garda interior dun exemplar do século XIV, aínda que encadernado no XVIII, do libro De officiisde Cicerón. O diplomático e musicólogo Rafael Mitjana comprou o pergamiño con intención de estudar a súa música e despois da súa morte foi adquirido polo bibliófilo Otto Hass e posteriormente posto á venda en Londres, onde foi adquirido pola J. Pierpont Morgan Library, onde permanece desde o ano 1977 coa sinatura MSM.979, a disposición dos estudosos que desexen traballar con el.

XXXVIII Festival de Pardiñas

Redacción.-

Os vindeiros 4, 5 e 6 agosto vaise celebrar o Festival de Pardiñas 2017 constitúe sen dúbida unha boa oportunidade para gozar en directo das actuacións de recoñecidos grupos tanto do panorama nacional como internacional.

Ao longo de dúas intensas xornadas musicais nesta nova edición do festival, declarado de Interese Turístico de Galicia, todos os asistentes poderán gozar coa mellor música no mellor ambiente.

Este certame musical está organizado pola Asociación cultural Xermolos de Guitiriz, e vense celebrando desde o ano 1979.

Programa

venres 4 agosto

20:30h V Certame de Cantos de Taberna polos bares de Guitiriz

sábado 5 agosto

17:00h XXVIII Mostra de instrumentos de música tradicional

              Pregón por Antón Corral

             XXXVIII Mostra de Artesanía

18:00h Concerto Fernando Meireles (Portugal)

19:00h XXXVIII Carreira Popular

21:00h Concerto Bloquinhos de Xermolos(Galiza)

22:15h Concerto Os Melidaos (Galiza)

23:35h Concerto Quique Escamilla (Chiapas – México)

00:10h Concerto Kalakan & Luís Peixoto (Euskadi – Portugal)

01:45h Concerto Cúig (Irlanda)

04:00h Concerto Skandalo Gz (Galiza)

 

domingo 6 Agosto

11:30h XXVIII Mostra de Instrumentos de música tradicional

             XXXVIII Mostra de Artesanía

13:00h Vermú no campo con  Vintenbaio

16:30h Concerto Kote Malabar

18:30h Concerto os viqueiras de ordes na mostra de instrumentos

19:00h Pregón con Fina Casalderre

20:30h Concerto Abobriga (Galiza)

22:00h  Concerto Davide Salvado e Banda (Galiza)

23:30h Concerto Ives Labert Trio (Canadá)

01:45h Concerto Sacha na Horta (Galiza)

27 de xul. de 2017

XVI edición do FestiGal

Redacción.-

A XVI edición do FestiGal trae artistas como Guadi Galego, Nao, Raiba, Os Amigos dos Músicos e Son da Rúa para actuar na véspera do Día da Patria en Santiago de Compostela. Na presentación, Guadi Galego, sinalou que o Festigal “reivindica un país normalizado neste espazo político, social, musical e cultural” e representa “a ilusión dun país que quere chegar a ser algo máis”.

Tania Ameneiro, da Fundación Galiza Sempre, anunciou as bandas e agradeceu o voluntariado que traballa na organización do Festigal e o autor do cartaz deste ano, Leandro Lamas. “Un pintor de referencia que fixo esta serea que está no mar, dende o seu país e coa forza e valentía da estrela que ergue na man, como quere transmitir o Festigal, nun país de artistas e creadoras”, explicou.

A xornada do 24 comeza cunha sesión de DJ con Bigote Mix; Son da Rúa, composto por Álex Arnoso e Hugo Guezeta, de Ponteareas, que foron os gañadores do concurso “Novos Valores”; Os Amigos dos Músicos, con folk-rock inspirado na canción protesta; Guadi Galego presentará o seu último traballo “O mundo está parado”; actuará Nao como banda de referencia do rock galego e Raiba que traerá o seu último disco “Marxinación” de rock-metal con letras reivindicativas.

Alberte Fernández, de Galiza Nova, explicou que os gañadores do concurso Novos Valores participaron co tema retranqueiro “O galego non mola” para denunciaren a situación da lingua galega, seguindo a liña de crítica social nas súas letras. Destacou tamén o éxito deste vídeo que chegou a máis de 10.000 reproducións de Youtube en dous días. “O Festigal ponse en marcha grazas a 200 persoas voluntarias que fan posíbel este evento que cumpre 15 anos, dispostas a traballaren na organización dun cento de actividades para festexar o Día da Patria Galega”, engadiu.

Pola súa parte, Lucía López Sobrado presentou os actos previstos para o 25 de xullo nunha aposta en feminino no café concerto cunha exhibición de regueifeiras por cortesía da asociación Oral. O punto máis cómico e desenfadado virá da man de Isa Risco, co seu espectáculo Nabiza Girl, “quen sen dúbida nos fará rir coa historia desta superheroína rural galega”. No apartado musical, o público poderá descubrir o proxecto de Áureas “En Voga”, o que será un concerto-espectáculo “co que viaxaremos ás músicas dos anos 20, coas que poderemos bailar en pleno século XXI cos ritmos das nosas avoas e avós traídos aos nosos tempos”. Rematará coas potentes voces das Tanxugueiras, chegadas desde a zona de Teo e da Barbanza e que son xa un dos grupos revelación da música tradicional galega, sinalou.

Por suposto, terán tamén espazo no Festigal “multitude de colectivos sociais que desenvolven traballo a prol do noso país”, eventos deportivos, postos de artesanía, o espazo infantil con propostas culturais para os máis cativos, un espazo de venda de libro con variedade de editoras e librarías galegas e unha completa Galería das Letras e das Ideas nas que contaremos con palestras sobre temas de actualidade política e social e un grande abano de libros a presentar. Entre eles, pódense adiantar a presentación do libro “Na casa da avoa” da poeta viguesa Marta Dacosta ou a conversa entre os escritores Carlos Callón e Nacho Taibo arredor dos seus novos libros: “Galegofalantes e galegocalantes” e “Os tres de nunca”, respectivamente.

O Festigal vén cargado un ano máis de variadas propostas culturais en todos os estilos e disciplinas e encherá na noite do 24 e durante todo o día 25 o espazo do Campus Sur de reivindicación “para celebramos o Día da Patria Galega, para celebrarmos que somos galegas e galegos orgullosos de selo”. “Por iso o Festigal é un escaparate da cultura feita desde Galiza e en galego, que conxuga e beleza e o poder da tradición coa modernidade máis punteira e amosa que queremos estar no mundo en pé de igualdade con outras nacións e que temos talento a esgalla”, concluíu Lucía López.

21 de xul. de 2017

Portugal no Culturgal

Redacción.-

A organización de Culturgal, a Feira das Industrias Culturais, adiantou hoxe algunhas das que serán as liñas mestras da súa edición de 2017, que terá lugar no Pazo da Cultura de Pontevedra do 1 ao 3 de decembro, coa cultura portuguesa como convidada especial para a celebración do décimo aniversario do encontro.

Promovido pola Asociación Culturgal, o evento, que aglutina os principais colectivos profesionais das industrias culturais galegas, volverá contar co apoio económico da Consellería de Cultura, Educación e Ordenación Universitaria a través da renovación do convenio de colaboración coa Axencia Galega das Industrias Culturais (Agadic).

Os preparativos para Culturgal 2017 parten con algunhas novidades como son a creación dun espazo propio dedicado á arte contemporánea (con presenza de artistas, galerías, estudantes, docentes e críticos), o incremento de actividades de dinamización desde os stands do recinto expositivo e, sobre todo, o reforzo na liña de internacionalización mediante a apertura do programa a culturas exteriores convidadas. Portugal é o país escollido para iniciar este percorrido, o que implica que institucións, empresas e creadores lusos participarán no décimo Culturgal cunha marca conxunta baixo a que circunscribirán concertos, expositores e presentacións. A acción conta co apoio da Secretaría de Estado da Cultura de Portugal e da Bienal de Arte de Vilanova de Cerveira.

Culturgal 2017 mantén nestes momentos aberto o prazo de reserva de stands, así como a convocatoria para creadores e profesionais, que teñen ata o 2 de outubro para facer chegar as súas propostas para configurar o programa de actividades das distintas disciplinas artísticas e para todos os públicos.

Dez anos de Culturgal

A primeira edición de Culturgal tivo lugar en 2007 en Pontevedra, impulsada fundamentalmente polos editores de Galicia. En 2008 celebrouse na Coruña. Dous anos despois, diferentes asociacións gremiais deciden constituír a asociación Culturgal para darlle estabilidade ao proxecto, que en 2010 volve a Pontevedra, onde continúa a celebrarse desde entón. Nesta década, Culturgal converteuse para persoas, colectivos e entidades públicas e privadas nun espazo de referencia para conectar os creadores culturais coas 15.000 persoas que teñen visitado cada último ano o recinto.

Hoxe forman parte de Culturgal as asociacións profesionais máis representativas do sector: Asociación Galega de Editores (AGE), Asociación Galega de Empresas de Artes Escénicas (Escena Galega), Asociación Galega de Empresas Musicais (AGEM), Empresas Galegas Dedicadas a Internet e ás Novas Tecnoloxías (Eganet) e Asociación Galega de Produtoras Independentes (Agapi).

Culturgal consolida ademais un modelo de colaboración entre as industrias culturais e as institucións que achegan o seu patrocinio: a Xunta de Galicia como principal apoio, ademais do Concello de Pontevedra, Deputación Provincial de Pontevedra e Ministerio de Educación, Cultura e Deporte.

7 de xul. de 2017

IV Convivio da Cultura Galega

Redacción.-

O Convivio é unha xornada festiva, impulsada desde a Casa-Museo Manuel María, xunto á federación Galiza Cultura de asociacións culturais galegas e a Asociación Cultural e Musical Solfa de Compostela, entendida como un punto de encontro aberto a todo o asociacionismo cultural de base que se move en Galiza a calquera nivel: colectivos, creadoras e creadores artísticos, conxuntos musicais...

O Convivio da Cultura Galega desenvolverase entre a Casa-Museo Manuel María, no centro da vila de Outeiro, onde se recibirá os participantes a partir das 11 da mañá, e a Carballeira de Santa Isabel, unha fermosa paraxe natural situada a menos de 1 quilómetro da casa natal do escritor onde as augas do Río Ladra conflúen coas do Miño. Transformada hoxe nunha magnífica área recreativa, o Campo da Santa Isabel foi tradicionalmente o lugar da festa na “tribo” natal do poeta (como el chamaba a Outeiro de Rei) e tamén o lugar dos xogos infantís e das descubertas da natureza: de aí que para Manuel María fose sempre un lugar moi querido e tan presente sempre na súa obra.

Na Carballeira desenvolverase o Convivio durante boa parte da xornada, con actuacións musicais pola mañá de, entre outras, da banda de música de Begonte-Rábade-Outeiro e da banda de música de Solfa, o xantar colectivo (cada quen deberá traer o seu), foliada aberta a grupos e persoas que queiran animar a sobremesa libremente (Milesios, Reviravolta,Cantareir@s.comTIGO, Maraxe, Parabéns...), xogos populares...

Durante a mañá, no auditorio da Casa-Museo, haberá un encontro das directivas dos colectivos culturais presentes no Convivio para compartir experiencias de traballo no ámbito cultural e tecer redes de colaboración para o futuro que poidan dar no desenvolvemento de iniciativas conxuntas e axuden a afortalar o movemento asociativo cultural galego de base.

4 de xul. de 2017

Biodiversidade e patrimonio nos Ancares

Redacción.-

Vaise celebrar unha nova edición do curso de verán "Biodiversidade e patrimonio nos Ancares lucenses: pasado, presente e perspectivas de futuro" en Piornedo (Cervantes, Os Ancares lucenses) organizado pola USC e no que colabora a AGCT.
"Biodiversidade e patrimonio nos Ancares lucenses: pasado, presente e perspectivas de futuro" ten como obxectivo formar para conservar e promover o desenvolvemento socioeconómico, utilizando a biodiversidade e o patrimonio cultural como obxectos de estudo e aproveitamento, así como expoñer experiencias de xestión na montaña galega ou en áreas con características semellantes e mostrar as posibilidades didácticas da montaña ancaresa. 

Número máximos de alumnos: 30
Número de horas: 26

Convalidable por 2 créditos para titulacións de grao e 1 crédito para licenciaturas, diplomaturas e enxeñerías.

Datas de celebración: 13 ó 16 de xullo do 2017.
Lugar de celebración: Piornedo de Ancares – Concello de Cervantes (Lugo).
Ás 13:30 do día 13 sairá un autobús gratuíto desde a parada da EPS, campus de Lugo, ata Piornedo. O día 16 ás 16:30 sairá un bus que fará a viaxe de volta a Lugo.

Matriculación:
Do 10 de maio ó 30 de xuño.
Matriculación on-line premendo no botón MATRICÚLATE na páxina web dos cursos de verán da USC ou de forma presencial nas oficinas da área de cultura da USC en Santiago ou en Lugo.
Xeral: 120 €
Reducida (estudantes, pensionistas, desempregados e persoal da USC): 70 €
Becas de matrícula: os 14 primeiros matriculados na modalidade reducida que, por medio de correo electrónico ó secretario ou ó director do curso, manifesten interese en ser becados, recibirán o reintegro do importe da matrícula unha vez que a entidade patrocinadora o poña a disposición dos organizadores.
Existe a posibilidade de aloxamento de balde no local da asociación cultural “O Teixeiro” de Piornedo.

Dirixido a:
Estudantes e titulados de carreiras ambientais e de humanidades, así como ó profesorado que imparta docencia relacionada co medio natural e co patrimonio. Tamén á poboación local interesada nos valores naturais e patrimoniais da comarca e no seu aproveitamento socioeconómico. En xeral a calquera cidadán, profesional ou non, interesado no medio natural e na cultura popular.

E-mail de contacto: a.decastro@usc.es / elena.freire@usc.es / orivaslopez@gmail.com

Máis información:
cursodeveranpiornedo2017.blogspot.com.es
http://www.usc.es/gl/servizos/cultura/veran/

2 de xul. de 2017

Europa e os tratados de libre comercio

Redacción.-

O sábado 1 de xullo estarán no Paraninfo da Universidade da Coruña (Rúa da Maestranza, 9 - A Coruña) coñecendo máis, analizando e debatindo sobre os tratados de libre comercio e do seu impacto nas nacións sen estado de Europa relevantes representantes do mundo académico e político. É unha iniciativa de carácter internacional que organiza entre o Centre Maurits Coppieters e a Fundación Galiza Sempre.

CONGRESO INTERNACIONAL
OS POBOS DE EUROPA ANTE OS TRATADOS DE LIBRE COMERCIO

Organiza: Fundación Galiza Sempre e Centre Maurits Coppieters
Colabora: Universidade da Coruña

Coordinación académica
Xosé Manuel Carril Vázquez. Profesor titular de Dereito do Traballo e da Seguridade Social. Universidade da Coruña

Data e lugar de realización
Sábado 1 de xullo de 2017
Paraninfo da Universidade da Coruña. Rúa da Maestranza, 9 15001 A Coruña

Asistencia
Entrada libre até completar aforo

PROGRAMA
MAÑÁ

10:30. Presentación da Xornada
Francisco Jorquera. Presidente da Fundación Galiza Sempre.
Xabier Macías. Presidente do Centre Maurits Coppieters.

10:40- 11:15.- A destrución do Estado do Benestar
Presenta: Francisco Jorquera. Presidente da Fundación Galiza Sempre.
Intervén: Profesor Dr. Dr. h.c. mult. Josep Fontana i Lázaro. Profesor Emérito na Universitat Pompeu Fabra.

11:15- 12:00.- Tratados de libre comercio: entre os mecanismos de desposesión do capitalismo terminal.
Presenta: Goretti Sanmartín Rei. Profesora de Filoloxía Galega da Universidade na Coruña e Vicepresidenta da Deputación da Coruña.
Intervén: Andrés Piqueras Infante. Profesor de Socioloxía e Antropoloxía Social na Universitat Jaume I e membro do Observatorio Internacional da Crise.

12:30-14:30. Mesa redonda: o impacto dos tratados de libre comercio nas nacións sen estado de Europa.
Modera: Ana Miranda. Portavoz BNG Europa e Vicepresidenta da Fundación Galiza Sempre.
Interveñen:
Ana Pontón. Portavoz Nacional do BNG.
Adolfo Araiz. Portavoz no Parlamento de Nafarroa de EH-Bildu.
Jordí Solé. Eurodeputado de ERC.
Helen Ryckamns.Deputada no Parlamento de Wallonie. Membro de Ecolo.
Gael Simon. Área de Relacións Internacionais da UDB.
Pádraig MacLochlainn. Senador do Sinn Féin.

TARDE

17:00- 17:45. O impacto dos tratados de libre comercio en América Latina.
Presenta: Elvira Souto Presedo. Escritora e activista social.
Intervén: Adrián Sotelo Valencia. Sociólogo e profesor no Centro de Estudos Latinoamericanos da Facultade de Ciencias Políticas e Sociais da Universidade Nacional Autónoma de México.

18:00- 18:45. Europa e o saqueo dos recursos do Sáhara Occidental.
Presenta: Xosé Manuel Carril. Profesor de Dereito do Traballo e Seguridade Social na Universidade da Coruña.
Intervén: Side M. Omar. Doutor Europeo, Profesor visitante na Universitat Jaume I e membro do corpo diplomático da República Árabe Saharauí Democrática e da Fronte Polisaria.

19:00-20:00. Alternativas aos tratados de libre comercio desde a soberanía dos pobos de Europa.
Presenta: Xosé Luís Armesto. Catedrático de Química Física e Reitor na Universidade da Coruña (2012-2016).
Interveñen:
María do Carme García Negro. Profesora Ad Honorem de Economía Aplicada da Universidade de Santiago de Compostela.
Dimitrios Konstantanapoulos. Xornalista, escritor e membro da Delphi Initiative e do consello editorial do proxecto de información alternativahttp://www.defenddemocracy.press.

Esta conferencia ten o apoio financeiro do Parlamento Europeo. O Parlamento Europeo non se reponsaibliza dos contidos e opinións das conferenciantes. Esta é unha iniciativa do Centre Maurits Coppieters e a Fundación Galiza Sempre.

30 de xuño de 2017

Helena Villar Janeiro na RAG

Redacción.-

No Pleno ordinario da Real Academia Galega celebrado o pasado sábado 17 na Coruña, nomeouse académica de honra a Marina Mayoral e académicos e académicos correspondentes a Takekazu Asaka (Toquio, 1952), profesor de Filoloxía Románica da Universidade de Tsudajuku, autor da primeira gramática galega para xaponeses e tradutor ao xaponés de Rosalía e outros autores das nosas letras; Marcos Bagno (Cataguases – Brasil, 1961), profesor da Universidade de São Paulo, recoñecido lingüista e defensor dunha nova visión do portugués, en que subliña a súa orixe galega; Olga Castro (Lugo, 1980), profesora de estudos de tradución da Universidade de Aston (Birmingham) e especialista na interacción entre xénero, linguaxe e tradución; Helena González Fernández (Comesaña – Vigo, 1967), profesora titular de lingua galega e investigadora do Centre Dona i Literatura da Universidade de Barcelona; Kirsty Hooper, profesora de Estudos Hispánicos da Universidade de Warwick (Coventry, Reino Unido), coordinadora do Hispanic Liverpool Project e tradutora de Cousas de Castelao; a escritora Helena Villar Janeiro (Becerreá, 1940), unha das autoras pioneiras da literatura galega para infancia e tamén unha das primeiras profesoras de Lingua e Literatura Galega no ensino secundario; e Helena Zernova (San Petersburgo, 1973), directora do Centro de Estudos Galegos da Universidade de San Petersburgo e tradutora ao ruso das obras máis senlleiras da nosa literatura.” Tamén decidouse adicar o Día das Letras Galegas de 2018 á escritora e profesora María Victoria Moreno Márquez (Valencia de Alcántara, Cáceres, 1941 – Pontevedra, 2005).

19 de xuño de 2017

Xornada sobre dixitalización de arquivos

Redacción.-

O Consello da Cultura Galega (CCG) acolle hoxe xoves unha xornada que analiza a dixitalización dos arquivos en dúas direccións: a primeira céntrase en coñecer o proceso, e a segunda busca afondar como eses documentos xa dixitalizados se poñen a disposición da cidadanía. A cita será inaugurada por Xosé López, secretario da institución e coordinador desta xornada. Aínda que non quedan prazas dispoñibles, poderase seguir en directo a través do web da institución.

Esta actividade ten como obxectivo prioritario analizar a evolución dos procesos de dixitalización dos arquivos nos últimos anos e coñecer as tendencias actuais, así como as oportunidades que hai non só para preservar mellor os fondos, senón para difundilos e poñelos accesibles á cidadanía. 

O programa
A cita arrinca coa descrición xeral do panorama, a cargo de Mercedes Caridad, da Universidad Carlos III de Madrid, que ofrecerá un estado da cuestión e das tendencias actuais. Desa mesma universidade virá Jesús Robledano Arillo cun relatorio chamado "Análises de casos de dixitalización de arquivos que resultan paradigmáticos: cara á definición dun modelo para a representación dixital do patrimonio documental”.

Ernest Abadal, da Universitat de Barcelona, falará das TIC aplicadas á documentación nos arquivos e pecha a xornada Javier Leiva Aguilera, da Universitat de Vic - Universitat Central de Catalunya, para abordar de “Os arquivos na sociedade rede e o papel do content curator”.

LUGAR
Consello da Cultura Galega
Pazo de Raxoi, 2º andar
Praza do Obradoiro, s/n 
15705. Santiago de Compostela
Tel.: 981 957 202 / Fax: 981 957 205

15 de xuño de 2017

XVII Ruta Chairega

Redacción.-

O domingo, día18 de xuño de 2017 o Iescha organiza a XVII RUTA CHAIREGA que percorrerá nesta ocasión as terras de Muras, pola Ruta A Veiga-Carelle, e as terras de Ourol, visitando unha fervenza no río Xestosa.
No Concello de Muras, a ruta de sendeirismo, duns 8,5 quilómetros, parte desde a Área recreativa A Veiga ata o complexo da Aldea Etnográfica.
Subdivídese en tres tramos: A Ruta da Fraga, de dificultade media; a Ruta  do Río, tamén de dificultade media; e a Ruta de Carelle, de dificultade media-baixa, con sinais e paneis de información ambiental e etnográfica.
A continuación, xa en terras doconcello de Ourol, visitaremos unha fervenza no río Xestosa.
Ao finalizar a ruta e a visita da fervenza, terá lugar a comida, nesta ocasión será servida no restaurante O Santi, en Muras.

10 de xuño de 2017

Miradas IV

Redacción.-

Onte venres 9 de xuño ás 20.00h no Centro Torrente Ballester inaugurouse o proxecto Miradas IV, consistente en catro pequenas mostras individuais que conforman á súa vez unha exposición colectiva. Os artistas seleccionados polo comisario David Barro son Manuel Eirís, Christian García Bello, Alejandra Pombo e Damián Ucieda. No día da inauguración preséntase unha publicación co traballo dos artistas seleccionados.

Miradas IV é un proxecto que nace como memoria e como presente, cun ollo no retrovisor e outro en obxectivos novos, noutros nomes e circunstancias, noutras posibilidades. O ollo do retrovisor mira e evoca o ciclo de exposicións de Miradas virxes, que protagonizou parte da oferta expositiva do Centro Torrente Ballester nos primeiros anos do século XXI. Hoxe a realidade que deu froito a aquel conxunto de exposicións individuais é ben distinta, seguramente menos eufórica, menos ilusionada, pero igualmente preparada e seguramente máis esixida, en tanto que menos apoiada e con menos expectativas. Manuel Eirís, Christian García Bello, Alejandra Pombo e Damián Ucieda son algúns dos máis destacados representantes desta outra xeración, catro novas miradas en catro pequenas mostras individuais entrelazadas nunha exposición colectiva

Centro Torrente Ballester
Rúa Concepción Arenal, s/n
15402 Ferrol

9 de xuño ás 20.00h no Centro Torrente Ballester inaugurase o proxecto Miradas IV, consistente en catro pequenas mostras individuais que conforman á súa vez unha exposición colectiva. Os artistas seleccionados polo comisario David Barro son Manuel Eirís, Christian García Bello, Alejandra Pombo e Damián Ucieda. No día da inauguración preséntase unha publicación co traballo dos artistas seleccionados.

Miradas IV é un proxecto que nace como memoria e como presente, cun ollo no retrovisor e outro en obxectivos novos, noutros nomes e circunstancias, noutras posibilidades. O ollo do retrovisor mira e evoca o ciclo de exposicións de Miradas virxes, que protagonizou parte da oferta expositiva do Centro Torrente Ballester nos primeiros anos do século XXI. Hoxe a realidade que deu froito a aquel conxunto de exposicións individuais é ben distinta, seguramente menos eufórica, menos ilusionada, pero igualmente preparada e seguramente máis esixida, en tanto que menos apoiada e con menos expectativas. Manuel Eirís, Christian García Bello, Alejandra Pombo e Damián Ucieda son algúns dos máis destacados representantes desta outra xeración, catro novas miradas en catro pequenas mostras individuais entrelazadas nunha exposición colectiva

Centro Torrente Ballester
Rúa Concepción Arenal, s/n
15402 Ferrol

Antón Riveiro Coello e Carlos Casares

Redacción.-

Instituto de Estudos Chairegos, seguindo cos actos programados co gallo das Letras Galegas, organizou onte venres, 9 de xuño de 2017, ás sete e media do serán na Casa de Cultura de Vilalba, unha conferencia sobre Carlos Casares impartida polo escritor Antón Riveiro Coello escritor que foi presentada por Tino Alvite, directivo do Iescha.

Antón Riveiro Coello naceu en 1964, en Xinzo de Limia. Cursou estudos de Dereito en Santiago, tocou a guitarra nun grupo de rock, vendeu ordenadores, foi funcionario do Estado, da Xunta e, por fin, xa cuns cantos anos máis, rematou dedicándose á escrita na que ten sido galardoado nuns cantos certames dos que salientan o Álvaro Cunqueiro, o García Barros, Café Dublín, Torrente Ballester (finalista), Modesto R. Figueiredo do Pedrón de Ouro, Manuel Murguía, Camilo José Cela, Breogán de Contos, Castelao de Narrativa, Casa Galicia en León, Meigas e Trasgos, Vila das Neves ou o Ourense de Contos, entre outros. 

Martiño Maseda, premio Manuel María

Redacción.-

O poemario Ti, (des)amor’, do poeta chairego Martiño Maseda Lozano, fíxose co segundo premio no V Certame de Poesía Manuel María en lingua galega, convocado pola Casa de Galicia en Donosti e que ascende a 200 euros xunto coa publicación da obra.

O 400 euros do  primeiro levounos Rocío Leira, de Cee, con ‘O teu exterminio sobre min’. O poema ‘Ególatra’, de Lucía Amaro Losada, de Monforte,  levou os 100 euros levou o terceiro posto e 100 euros.

9 de xuño de 2017

Concerto de Azougue

Redacción.-

Este sábado, día 3 de xuño, ás 20 horas, Pedro Lamas (saxo soprano e barítono, gaita, dulzaina melódica, percusións), Jacobo de Miguel (piano) Xosé Lois Romero (percusións tradicionaispoñen o ramo á tempada do Ciclo De corazón a corazón. Concertos na intimidadeque vén desenvolvendo a Casa-Museo Manuel María e que se volverá reiniciar tras o verán. Os tres talentosos músicos, con longo percurso en distintos proxectos e grupos musicais, forman parte dun novo proxecto musical, Azougue, que está próximo a gravar un traballo que as persoas asistentes ao concertodeste sábado terán o privilexio de escoitarO seu repertorio está baseado no encontro híbrido de distintas músicas que van desde o tradicional até o jazz e a música clásica (https://www.youtube.com/watch?v=gvBHjAKPA_Q&t=246s )

Pedro Lamas é un recoñecido músico e compositor galego. Compaxina a súa faceta de mestre e divulgador da música tradicional coa de intérprete e arranxista para diversas formacións como a Nova Galega de Danza, Radio Cos, Guadi Galego, Kepa Junkera, Sondeseu, Xabier Díaz, Susana Seivane, Xosé Manuel Budiño, Quique Peón Cía ou a Orquestra de Jazz de Galiza, da que é co-director xunto a Roberto Somoza, entre outras moitas. O seu paso precoz por diferentes concursos e certames de gaita celebrados no país deixa como bagaxe un dos curriculums máis laureados da música tradicional de Galiza con máis de medio cento de premios e recoñecementos no seu haber. Formou parte de producións tan exitosas como “Alento” (2003), “Engado” (2006), “Tradicción” (2009), “Alendacroa” (2011), o musical “Galicia Caníbal” (2012) ouDez” (2013), cos que acada múltiples recoñecementos como o “Premio das Ciencias e Artes da Representación” (2009) ou o 2º Premio no “XXI Certame de Danza Española y Flamenco” (2012). Recentemente participa na multitudinaria montaxe “O poder do arcabuz” (2015) en que exerce como compositor e director dunha orquestra de máis de medio cento de músicos. No presente ano recibe o Premio Martín Códax ao mellor proxecto de Folque como integrante do trío Vaamonde, Lamas e Romero.

Jacobo de Miguel é un pianista e compositor asturiano. Comeza a estudar piano clásico á idade de sete anos. Cando chega á vintena decántase pola música improvisada e o jazz. Desde este momento desenvolve un estilo en que o enfoque improvisatorio gravita arredor de todas as músicas que teñen formado parte da súa vida. Nos últimos anos, froito do seu interese por levar a improvisación a todos os xéneros musicais, pon a súa atención de novo na música clásica e comeza a interesarse polas músicas de raíz do noroeste do Estado español. En paralelo á súa faceta concertística e compositiva discorre unha labor pedagóxica en que o ensino de técnicas de improvisación ocupa un lugar preferente.Ten tocado e/ou gravado con: Carlos Barretto, Jimmy Weinstein, Rob García, Masa Kamaguchi, Matt Renzi, Matthew Simon, Paolo Porta, Walter White etc... Entre as súas últimas gravacións como líder ou co-líder encóntranse “Dúo” de Jacobo de Miguel/Ton Risco Dúo, “Eye in the Sky Proyecto”, “Ròckilo” de Jacobo de Miguel Cuarteto, “Xota pa’ Tres” de De Miguel, Wolfe & Quintana. As súas últimas colaboracións están recollidas en “Accipiter Gentilis” de Kin García Trío, “The Vanguard” de Roberto Somoza, “Right Way Down”, “The Heat” de Ethan Winogrand etc...

Xosé Lois Romero é un recoñecido acordeonista, percusionista e compositor formado na música tradicional. Foi membro de grupos referenciais como os cuartetos Lelia Doura e Luvas Verdes, así como da compañía Nova Galega de Danza, en que foi director musical nos espectáculos “Alento” (2003), Premio Opinión a Mellor Disco Galego do Ano, e “Engado” (2006). En 2008 realizou os arranxos e a dirección musical do espectáculo “Terra de soños”, que supuña o retorno aos escenarios de Fuxan os Ventos, con 30 recoñecidos artistas en directo. O concerto foi editado en 2009 en fomato libro-CD-DVD. Ese mesmo ano elabora e interpreta en directo a música do espectáculo “Ovay”, primeira montaxe da compañía de Quique Peón, editada dixitalmente como “Música para Ovay”. 
É coautor xunto a Suso Vaamonde da colección didáctica musical “Pel & madeira”, e membro do grupo tradicional da Axencia Galega das Industrias Culturais. Formou parte de aCadaCanto xunto a Guadi Galego, Xabier Díaz e Guille Fernández, e ten colaborado con innumerábeis artistas, tanto en gravacións como en directo, e obras da súa autoría forman parte dos seus repertorios: Mercedes Peón, Kepa Junquera, Susana Seivane, Guadi Galego, X.M. Budiño, Leilía, Xabier Díaz, Fuxan os Ventos, Faltriqueira, Radio Cos, Coetus, Jane Joyd, aCadaCanto, Jabbar Al Janabi, Orquestra de Jazz de Galiza... cos que ten actuado por todo o mundo, desde Amann a Nova Iorque, pasando por Zimbabwe ou Bos Aires.
Na actualidade forma parte do trío tradicómico Vaamonde, Lamas e Romero e vén de crear o grupo Aliboria en que desenvolve a súa visión renovadora da percusión tradicional. Compaxina as súas xiras e concertos coa docencia e a difusión do folclore.

Con este magnífico concertoa Casa-Museo Manuela María pon fin á esta tempada, desde outubro até maiona que pasaron polo seu auditorio, entre outros, Quico Cadaval, Milesios, Fran Rei, Pirilampo, Títeres Alakran, Grupo de zanfonas da Tradescolatentando, desta maneira, contribuír á programación e dinamización cultural da comarca chairega.

O prezo do billete para asistir a este concerto é de 5 euros e pode reservarse encontacto@casamuseomanuelmaria.gal e/ou chamando ao tel. 698177621.

Máis información:

PEDRO LAMAS (músico de Azougue): 699814004

ALBERTE ANSEDE (secretario da Fundación Manuel María):616190349

2 de xuño de 2017

Sacar a lingua é de mala educación

Redacción.-

O Instituto de Estudos Chairegos, seguindo cos actos programados co gallo das Letras Galegas, organiza para o vindeiro venres 2 de xuño de 2017, ás sete e media da tarde, na Casa de Cultura de Vilalba, a presentación do libro de Manuel Núñez Singala “Sacar a lingua é de mala educación. Oportunidades do multilingüísmo na infancia e na idade adulta”, editado por Galaxia. 

O libro -segundo podemos ler na páxina web do autor- procura argumentos e estratexias para aproveitar as posibilidades que, tanto a adultos como a nenos, lles brinda a vida nunha comunidade bilingüe que se insire nunha Europa multilingüe e nun mundo cunha extraordinaria riqueza idiomática.

Ao longo deste volume expóñense de maneira sinxela e clara os motivos polos que todos os habitantes de Galicia deberían ser competentes nas dúas linguas oficiais da comunidade e empregar esa destreza como trampolín para adquirir outras o antes posible. Porque en cuestión de linguas o importante é sumar.

O acto contará coa intervención de Manuel Núñez Singala, o autor do libro, e Marisa Barreiro Mejuto, presidenta do Iescha.

O autor
Manuel Núñez Singala naceu en Lugo en 1963, pero en Vilalba é onde transcorre a súa infancia e adolescencia. A Terra Cha é a súa primeira patria. Estuda, traballa e vive máis tarde en Compostela, que é como el mesmo di a súa segunda patria.

Sempre foi un gran afeccionado á lectura, pero a súa inclinación pola escrita, di que quizais lla deba aos certames literarios do instituto de bacharelato vilalbés. Nese centro estreou as primeiras obras de teatro, ata tres montaxes aló contra final dos anos setenta. Despois estudou en Santiago onde ficou. En Galaxia ten publicado O achado do castro (1991, Premio Xiria de Creación Teatral 1987), Comedia bífida (2007), Planificación estratéxica (2009). Narrativa: Mar de fondo (1997), Menú de enganos (2010, Premio Frei Martín Sarmiento 2011). Tamén o ensaio e os traballos de investigación sobre cuestións relacionadas coa normalización do idioma ocuparon boa parte do seu tempo, como se recolle no libro En galego, por que non? (2009).

1 de xuño de 2017

Música ao natural

Redacción.-

O vindeiro  9 de xuño, no auditorio da Casa das Insuas, en Rábade, teremos  unha nova xeira do proxecto cidadán que xunta música, natureza e cultura no rural.

Johannes Geworkian Hellman (SE)
Utilizando a zanfoña con voz propia, Johannes é coñecido coma un músico apasioado e un artista cunha expresión singular, que ama encontrarse e compartir a sua música coa audiencia. No seu proxecto en solitario Johannes invita ao ouvinte a adentrarse nunha persoal narración musical. Toda a música está composta por Johannes, inspirada en diferentes xéneros e inclúe as moitas cores da zanfoña contemporánea
Trátase dun pequeno ciclo de concertos, que tenta perpetuarse no tempo, se conta co apoio popular. Aproveitando viaxes de músicos nacionais e internacionais, organízanse unha serie de concertos no auditorio da casa das Insuas, para gozar, neste entorno natural tan singular, de música tamén ao natural, dun xeito acústico e próximo ao público.

O ciclo
Os concertos fináncianse coa colaboración do público e nun futuro, agárdase poder contar cun número suficiente de subscritores para que a iniciativa siga adiante.

Un dos propósitos deste ciclo é valorar a música como traballo, como medio de vida, e apoialo coa nosa colaboración. Pero Música ao natural, tamén considera importante valorar a artesanía, a autosuficiencia... o traballo vinculado á terra e aos oficios que nos falan da nosa tradición. Así, propoñemos unha sorte de troco: será benvido todo produto artesán, ou de cultivo propio para cambialo polo concerto.

Con esta iniciativa, pretendemos:

Abrir un espazo á creación, e poder establecer un circuíto moi singular, para gozar -a poucos centímetros- de proxectos acústicos de músicos de primeiro nivel internacional. Aprender e gozar de culturas doutros lugares.Ofrecer cultura de calidade no rural.

Despois dos concertos, poderemos conversar cos músicos compartindo comida e bebida todo aquel que queira levala.

Imprescindible reservar praza no enderezo: concertosaonatural@gmail.com
 
Colaboración: 7 euros

Máis información:
www.johannesgeworkianhellman.com

31 de maio de 2017